Тіл – тәуелсіздіктің бір тұғыры

Тәуелсіздік туралы бай­ып­ты да терең әңгіме жалғаса бермек. Дегенмен, Елбасы сөзінен алған алғашқы әсерді бір ауыз сөзбен жеткізе кеткім келеді. Ол – бірлік пен ынтымақты ту еткен елдің «бүгіннен нұрлы, бүгіннен кемел болашағы» мен ұлы мақсаттарды ал­дына қойған ұлт­тың жарқын келешегіне деген сенімділік! Тәуелсіз Қа­зақ­станның эконо­ми­касымен бірге ұлы рухани құнды­лық­тары – тіл, мә­де­ниет, білім мен ғылым да жаңа кезеңде өрлеу мен дамудың жаңа сатысына көтерілетініне күмән жоқ. Ол сенімге арқау Елбасы сөзі – «Дүниеде қазақ деген ел барда қазақ тілі мәңгі жасай береді!!» Бүгінде қазақ тілі ел халқын біріктіруші басты фактор ретінде қазақстандық қоғамда өзінің мем­лекеттік мәртебесіне сай қол­даныла бастады. Елбасы атап өткендей, «қазақ тілі – тұтас ұлыстың ортақ тіліне ай­налды». Бұл – тәуелсіздіктің басты жетістігі. Өйткені, тәуел­сіздікпен бірге қайта түлеген тілмен бірге, ұлттық санамыз түледі. Ал алда атқарылар іс бұдан да ауқымды. Ендігі міндет – қазақ тілінің мемлекеттік тіл ретіндегі қоғамда толық қолданылуына қол жеткізу бағытында тиісті мемлекеттік органдар мен қоғамдық ұйым, бірлестіктер арасындағы бірлескен жұмысты жаңа сапалық дең­гейге көтеру, ұлттық мүддеге қызмет ететін ұлттық идеяны тереңдету, «санның артуы мен сананың орнығуына» бастай­тын тың қадамдар жасау. Со­нымен бірге, қазақ тілін азат елдің халықаралық деңгейдегі бәсекеге қабілетті, тәуелсіз тілі ету жолында барлық қазақ­стандықтардың жұмыла еңбек етуі, әр алаш баласының «ұлт үшін деген ұлы іске» (А.Байтұрсынұлы) үн қосуы шарт. Еріне сүйеу болар еліміз, еліне тіреу болар еріміз аман болса, тәуелсіздік тұғыры туған тіліміз де мәңгі жасайтыны сөзсіз. Болат ЖЕКСЕНҒАЛИЕВ, Халықаралық «Қазақ тілі» қоғамы» қоғамдық бірлестігі Батыс Қазақстан облыстық филиалы басқармасының төрағасы, «Ағартушы» мемлекеттік тілді оқыту орталығының директоры.