«Қазгидромет» РМК мәліметіне сәйкес, 20 тамыз бен 21 тамыз аралығында Астананың оң жағалауында 36 миллиметр, ал сол жағалауында 45 миллиметр жауын жауған. Бұл айлық нормадан 40 процентке артық. Мұншама көп мөлшердегі жауын салдарынан қаланың кәріз жүйесіндегі ақаулар тағы да сыр бергендей. Өйткені жаңбыр суын азайтуға 11 тазарту құрылғысы, 2 су сорғыш, 11-ге жуық сорғы стансасы, 110 ассенизаторлық машина және басқа да техникалар жұмылдырылған. Айдап қотарылған судың көлемі сағатына 50 мың текше метрді құраған. Бірақ көшенің суағарлары әуелден дұрыс салынбағандықтан мұншама әрекеттің көмегі аз болғандай. Жауын суын қабылдаушы техникалар үлгермей, Нәжімеденов, Тәуелсіздік, Момышұлы көшелерінің біраз бөлігін су алып кеткен. Тек таңғы 5-ке жуық аталмыш көшелерден суды сорып, тазарту мүмкін болған.
«Мамандандырылған кәсіпорындар мен коммуналдық кәсіпорындар осы уақыт аралығында тәулік бойы дамылсыз жұмыс істеді», деген Астана қаласы әкімінің орынбасары Қ.Айтмұхаметов көшелерді су алып кету жағдайларына жол берілгені үшін халықтан кешірім де сұрады. «ОКҚ алаңын пайдаланып, қала халқына алғыс айта отырып, кешірім сұрағымыз келеді. Су алып кету жағдайларына жол берілді. Екі сағаттың ішінде мәселе ретке келгенімен, бәрібір жағдайдың орын алғанын жасыра алмаймыз», деді ол.
Әлсіз тұсы әшкереленді деген осы шығар, бас қаланың бас көшелеріндегі нөсер кәріздерінің жүйесі дұрыс есепке құрылмағандығы тағы да дәлелденді. Себебі елорда көшелерін су басу, өкінішке қарай, бұл бірінші рет емес еді.
«Тұран» даңғылы мен «Ұлы Дала» көшелерінің қиылысын су алып кетуіне жобалау кезіндегі қателік себеп болып отыр. Су іркуіштің аумағы дұрыс есептелмей, осы себепті қуаттылығы төмен су сорғылар орнатылып қойған», деді Қ.Айтмұхаметов. Әкімнің орынбасары ендігі кезекте аталмыш участокті жаңғырту жұмысы жүргізілгелі жатқанын атап өтті. «Тазарту құрылымдарын басқару – штатты басқару жүйесінде. Біз ол жерде қосымша ТЖК бөлімшелерінің қозғалмалы сорғылы стансаларын орнаттық. Сонымен қатар аталған нысан жаңғырту бойынша жоба басталды. Жұмыс 2019 жылы басталып, 2020 жылы аяқталады», деді әкімдік өкілі.
Мәліметке сүйенсек, бүгінде қаладағы нөсерлік кәріздер жүйесі 13 тазалау құрылғысынан және 3 сақтау тоғанынан, 18,9 мың бақылау және жаңбырсуы құдықтарынан, 398,8 шақырымға тарта магистралды коллекторларынан және науа арықтар жүйесінен тұрады. Олар 12,93 мың гектар аумақта жиналған жайылма судың кетуін қамтамасыз етеді. Тазарту құрылғыларының жиынтық қуаттылығы тәулігіне 215,46 мың текше метрді құрайды. Ал елордада 2016 жылға дейін тек 9 тазарту нысаны мен 3 тоған жинақтаушы болған.
Айтқандай, Астана көшелерін су басқандығы жөніндегі ақпараттар әдеттегідей әлеуметтік желілерде тез тарағаны мәлім. Соның ішінде айрықша танымал болғаны – елорда көшесінде суды белшесінен кешкен қоғамдық көлік – салоны жолаушыға толы автобус еді. Брифинг барысында сол автобустың жүргізушісі жұмыстан шеттетілгені айтылды. Бұл туралы журналистер сұраған соң Астана қаласы әкімінің орынбасары Қосман Айтмұхаметов мәлімдеді.
«Автобус жүргізушісіне ол жаққа бармау керектігі ескертілген. Оның үстіне ол жағдайды жақсы білген. Адамдармен келе жатқанын ескеруі керек еді. Біз көшені жауып тастап, патрульдік көлікті, қоршауды қойдық. Алматы ауданы әкімдігінің қызметкерлері оған кері бұрылуды сұраған еді. Бірақ ол тыңдамай әрі қарай жүре берген. Ол айналып өтуі керек еді. Момышұлы көшесіне Тоқпановты айналып өте алар еді. Басқа жүргізушілер айналып өткен. Ал аталмыш автобустың жүргізушісі олай етпеген. Оның ендігі жұмыста қалу-қалмауын «Astana LRT» басшылығы шешеді», деді Қ.Айтмұхаметов.
Динара БІТІК,
«Егемен Қазақстан»
