Кеше католиктер Рождествосын тойлады

Кеше, сенбі күні  кешке облыс әкімі  Сергей Кулагин Қостанайдағы  «Успения Богородицы» рим-католик приходына келіп, котолик діні өкілдерін Рождествомен құттықтады. Әкім приходтықтарға  денсаулық, отбасыларына бақыт тіледі. Әкім сонымен қатар еліміздегі  достық пен  келісім, ынтымақ пен береке қазақстандықтардың басты байлығы екенін айтты. Кең байтақ Қазақстанда  алаңсыз өмір сүріп отырған әркім өз дінімен қатар өзге дінге де толеранттықпен,  құрметпен қарауы тиіс. Біздің Президентіміз Нұрсұлтан Назарбаев әлемдегі барлық конфессияларды ынтымаққа  шақырып, үлгілі іс бастады. Бұл алдымен  әр қазақстандыққа  өнеге болуы керектігін де  ескертті әкім. Желтоқсанның 24-нен 25-ші жұлдызына қараған түні  бүкіл әлемде  сочельник атап өтіледі. Бұл дәстүрді  демократиялық  жолмен дамып келе жатқан Қазақстан католиктері де атайды.  Соған орай Қостанайдағы католиктердің приходында рождестволық  діни шара өтті. Онда  діни салт бойынша музыка ойнап, ән айтылып, өлеңдер оқылды. Мұнан кейін діни салтпен  «Успения Богородицы» рим-католик приходындағы сочельникте кешкі ас берілді, онда  түрлі мүсіндер бейнесінде пісірілген  жұқа нан сындырып, таратылды. Нанның сынығын кімге ұсынса оған  жақсы тілектер айтылды.  Түн ортасына қарай салтанатты литургия басталды. Онда католик дінін ұстайтындар құдайға құлшылық жасап, дұға оқыды. Оның соңы діни ойын-сауыққа ұласты. Нәзира ЖӘРІМБЕТОВА ҚОСТАНАЙ Сурет: adzinstva.by