Қазіргі таңда жер-жерлерде Тәуелсіздігіміздің 20 жылдық торқалы тойын лайықты атап өту шараларын ұйымдастыру жұмыстары өз деңгейінде жүріп жатыр. Әр саланың қызметкерлері мереке күндері еткен еңбек пен төккен тердің арқасында түрлі марапатқа ие болып, мерейлері үстем болуда. Сондай іс-шаралардың бірі оңтүстіктегі үлкен оқу орындардың бірі – М.Әуезов атындағы ОҚМУ-да да болып өтті. Оны ұйымдастыруға оқу орнының кәсіподақ ұйымы мен студенттік кәсіподақ ұйымы мұрындық болды.
Оқу орнының басшылығы жиналғандарды Тәуелсіздіктің 20 жылдық мерекесімен құттықтап, Тәуелсіздікке қол жеткізуде кәсіподақтың да мол үлесі бар екендігін атап өтті. Атап айту керек, жыл өткен сайын кәсіподақ ұйымына сенім артушылар саны арта түсуде. Бұл деген университетте еңбек етіп жүрген қызметкерлер мен білім алып жүрген барлық студенттердің құқығы мен әлеуметтік жағдайын жан-жақты жақсартуды мақсат тұтатын ұйым жұмысының жақсы жолға қойылғанын дәлелдей түссе керек. Нәтижесі де көпшіліктің көз алдында.
Салтанатты басқосуда жылды қорытындылай келе университетіміздің жан-жақты дамуына және елімізді инновациялық тың идеялары арқылы дамыту жолында аянбай еңбек етіп келе жатқан профессор-оқытушылар құрамы кәсіподақ кеңесінің төсбелгісімен, алғыс хаттармен, дипломдармен марапатталды.
Сондай-ақ, мемлекеттік жастар саясатын жүзеге асыру жолында еңбек етіп жүрген белсенді студенттер де алғыс хаттармен марапатталса, ал ұйым қамқорлығында жүрген ата-анасынан айырылған 26 студентке қаржылай сыйақы берілді. Соңы мерекелік концертке ұласты.
Қуаныш МҰСАБЕКОВ, М.Әуезов атындағы Оңтүстік Қазақстан мемлекеттік университеті кәсіподақ ұйымының төрағасы.
Шымкент.