Бір партада – үш оқушы
Облыстық білім беру басқармасының басшысы Қайырғали Кенжеғалиевтің айтуынша, өңірде 193 мемлекеттік, 4 жекеменшік мектеп бар. Оның ішінде 4 мектеп апатты жағдайда деп танылған. Жаңа оқу жылы қарсаңында 2 мектеп, 3 балабақша ашылды. Соның өзінде оқушы санының көптігінен үш ауысымда оқитын білім ұяларының қатары кемір емес. Керісінше, өсіп барады. Былтыр 9 мектеп үш ауысымда оқыса, биыл бұл көрсеткіш 11-ге жетті. 600 оқушыға арналған білім ошағында 2 мың бала сабақ оқуға мәжбүр. Осы олқылықтың орнын толтыру үшін облыс орталығындағы №34, 17, 27, 22 мектептерге қосымша ғимарат салуға жобалау-сметалық құжаттама дайындалып жатыр. Апатты жағдайдағы М.Жұмабаев пен Ғ.Мұратбаев мектептерінің шәкірттері көршілес мектептерге барып оқып жүр. Алда қаһарлы қыс келе жатқанын ескерсек, бұл жағдай балалар мен ата-аналар үшін қолайсыздық тудырары анық. Мұнайлы өңірде жыл сайын жаңа мектеп, балабақшалар салынады, ескілері жаңартылады, қосымша ғимараттар тұрғызылады, соның өзінде орын жетпеу мәселесі күн тәртібінен түсер емес. Ә.Молдағұлова атындағы орта мектеп директоры Ақсұлу Сәлиева үш ауысымда оқытудың кедергілері көп екенін айтады. Оқушы санының нормаға сай болмауы, үш-төрт баланың бір партада тығылысып отыруы білім сапасына әсер ететіні тағы бар.
380 мұғалім керек
Мұнайлы аймақтағы мектептерде 380 мұғалімнің орны бос тұр. Әсіресе бастауыш сынып пен математика пәнінің мұғаліміне сұраныс жоғары. Орыс тілінде оқытатын білім мекемелеріне де педагог кадрлар керек. Х.Досмұхамедов атындағы Атырау мемлекеттік университеті 19 педагогикалық мамандық бойынша оқытады. «Өткен оқу жылында 248 жас маман университет бітірді. Жыл сайын түлектерді жұмысқа орналастыруға арналған жәрмеңке болады. Осы шарада 136 қазақ, 22 орыс сыныптарының мұғалімдері шақырту алды. Орысша сабақ беретін 222 мұғалімге сұраныс түскен еді, бірақ соның 10 процентімен ғана қамтамасыз етуге мүмкіндігіміз болды», дейді университеттің академиялық мәселелер департаментінің басшысы Асхат Шүкіров. Орыс тілді мектептерге мұғалім жетіспеу проблемасы бұрыннан бар. Сол үшін облыстық әкімдік тарапынан мұғалім боламын деген жастарға қолдау ұйымдастырылады, мысалы өткен жылы 158, биыл 187 грант бөлінген. Грантпен оқып жатқан студенттер енді екі жылдан кейін оқу бітіреді, мүмкін сол кезде сең аздап болса да қозғалар. Әзірге мәселе ашық күйінде қалып отыр. Білім беру басқармасы көршілес өңірлердегі оқу орындарының түлектерін Атырауға шақырып, жұмыс ұсынуды да қолға алған. Соның өзінде, жағдай жоғарыдағыдай.
Балабақшаға – онлайн кезек
Балабақшаға өтінішті қаншалықты ерте берсеңіз, жолдама алу мүмкіндігі де жақындай түседі. Оқу жылының басында garden.atyrau.gov.kz сайты іске қосылды. Енді интернетпен балабақша таңдауға, мектепке дейінгі мекемелерге кезегіңізді қадағалауға, sms, e-mail хабарлама арқылы кері байланыс орнатуға мүмкіндік бар. «Бұл ата-аналардың уақытын үнемдеуге, сыбайлас жемқорлық тәуекелін болдырмауға септігін тигізеді», дейді Атырау қалалық білім бөлімі басшысының міндетін атқарушы Алмабек Абдолов. Бұрын балабақшаға кезек электронды жүйеде көрсетілгенімен, жолдаманы қалалық білім бөлімі беретін. Енді республика бойынша енгізілген бірыңғай стандарттың негізінде жүйе автоматты түрде бәрін өзі реттеп отырады. Білім бөлімінің мәліметіне сүйеніп айтар болсақ, облыс орталығындағы 42 мемлекеттік балабақшаға 13 мыңнан астам бала барып жүр. Ал кезекте әлі де 22 408 бала тұр.
Әрине мұнайлы өңірдегі білім беру саласында жақсы жаңалықтар да бар. Жақында білім күніне арналған салтанатты шарада облыс әкімі Нұрлан Ноғаев өткен оқу жылында 71 атыраулық оқушының түрлі өнер, білім жарыстарында жүлдегер атанып, 20 оқушының халықаралық байқауларда топ жарғанын ерекше атап айтқан еді. «Заман талабына сай жаңа технологияларды дамытуға және оны балалардың меңгеруіне көңіл бөліп келеміз. ІТ-сыныптар ашылып жатыр, оқу орындарының 90%-тен астамы кең жолақты интернет жүйесіне қосылған. Биылдан бастап облыстағы мектептерде 45 роботтехника сыныптары жұмыс істейді. Жыл соңына дейін білім беру саласында тағы да жаңа нысандар ашылады», деген еді өңір басшысы. Қазір өңірде 5 мектептің құрылысы жүріп жатыр, жыл соңына дейін пайдалануға беріледі деген жоспар бар. Құрылыс қарқыны осы бағытынан таймаса, жақын жылдары мектеп мен балабақшада орын тапшылығы мәселесі де өткен күннің еншісінде қалар деген үміт басым.
Бақытгүл БАБАШ,
«Егемен Қазақстан»
АТЫРАУ
