Риддер қаласында жүрегіне ізгілік ұялаған Галина Гильдерман есімді жан тұрады. Ол кісіні шағын шаһарда танымайтын кісі жоқ деуге болатын шығар. «Гильдерманның отбасы жиырма жылдан астам өңіріміздегі жетімдерге көмек беріп, әлеуметтік жобаларға белсене қатысады. Екі жылдан бері баспанасы жоқ, қаңғырып жүрген жандарды жинап, олардың құжаттарын қалпына келтіріп, қоғамға пайдалы азамат ретінде қайта қосылуына көп күш-жігерлерін салып жүр. Гильдерманның отбасы – интернационалды. Жолдасы Бай-Эли Саидсолимовичтің ұлты – чешен, өзі неміс қызы. Екеуінің де әке-шешесі 1957 жылы Қазақстанға қоныс аударылыпты. Осы жерде үшінші ұрпақтары дүниеге келгендіктен, Қазақстанды Отанымыз деп құрмет тұтады», – дейді Риддер қалалық ішкі саясат бөлімінің басшысы Анар Оралқызы.
Галина Гильдерман жақында Риддерде «Рухани жаңғыру» бағдарламасының аясында өткен «Жомарт жүрек» қайырымдылық форумында «Жыл тұлғасы» аталымы бойынша марапатталыпты. Жүрегі жомарт кәсіпкер жыл басынан бері қаладағы қайырымдылық шараларына үш миллион теңгеден астам қаржысын жұмсапты. Өзінің «Рябинушка» деген дәмханасында мүгедек жандар мен жалғызілікті зейнеткерлерге, ұзын саны 57 адамға күн сайын бір мезгіл тегін ыстық тамақ беруді дәстүрге айналдырған екен. Осындағы жетім балаларға арналған арнайы коррекциялық мектеп-интернаттың тәрбиеленушілеріне де үнемі жәрдемдесіп тұрады. Жүйке аурулары диспансерінде жатқан 41 мұңлыққа да Галина Михайловнаның жүрегі ауырады. «Олардың барлығын туыстары ұмытып кеткен, ешкімге керектері жоқ. Мәңгілік мекеніне осы жерден аттанатындары да кездеседі. Жарымкөңіл жандарды бір уақыт қуанту үшін мерекелік іс-шаралар ұйымдастырамыз. Енді бір теледидар сыйлайық деп жүрміз», дейді ол.
Реті келгенде айта кетейік, Риддер қаласында соңғы екі жылда 70-тен астам әртүрлі қайырымдылық шаралары ұйымдастырылып, қолы ашық жандардың қолдауымен 100 миллион теңгеден астам қаражаттың әлеуметтік көмегі көрсетіліпті. «Жомарт жүрек» қайырымдылық форумында Атымтай жомарт азаматтар «Ерен еріктілік», «Жыл тұлғасы», «Жылдың үздік ұйымы», «Туған өлкем», «Жыл меценаты» аталымдары бойынша марапатталыпты.
Азамат ҚАСЫМ,
«Егемен Қазақстан»
Шығыс Қазақстан облысы,
Риддер қаласы
