![Үлескерлерді үптеп кеткендер жазалануы тиіс - Тұрғын Сыздықов](/article_photo/1540185720_article_b.jpeg)
Бізге Астана қаласындағы бірқатар үлескерлерден хат келді. Онда үлескерлер өздеріне жауап беруге тиісті «Номад строй ЭК» ЖШС лауазымды адамдарының жауапкершіліктен қашып отырғанын айтады. Олар «Есіл ЭК» ТҚК және «Future home» тұрғын үйлеріне салынған ақшаларын жымқырды деп айыпталуда. Осы істе үлескерлер бірнеше жылдан бері әділдікке қол жеткізе алмай келеді екен. Жәбірленушілер мұндай келеңсіздікке мемлекеттік органдардың және қалың көпшіліктің көз алдында жол беріліп жатқанына қынжылады.
Үлескерлер өздерінің құрылысқа арнаған қаражаттарын «Астана финанс холдинг» микроқаржылық ұйымы арқылы қолма-қол ақшамен және несие ретінде салғанын айтады. Ал осы қаржылық ұйымды «Номад строй ЭК» ЖШС басшылары ашқан екен.
Ақшаларын қайтара алмай, үйлерін де ала алмай пұшайман болған тұрғындар өздерінің хатында соттың шешімдеріне, сот орындаушылары мен салық органдарының көптеген тыйымдарына, банктегі шоттардың 20 реттен артық тұтқындалғанына қарамастан, Астананың құрылыс басқармасы аталмыш ЖШС басшыларын мемлекеттік бағдарламаға сәйкес салынатын әлеуметтік нысандар тұрғызу құрылысының мемлекеттік сатып алуларына қатыстырып, жеңімпаз деп танығанын айтады. Оның үстіне сот 2015 жылдың сәуір айындағы шешімімен бұл ұйымды сенімсіз қатысушы деп те шешім шығарған екен. Ал олардың қағанағы қарқ, сағанағы сарқ. Мемлекеттік сатып алу бойынша жеңіп алған бір құрылыс шарты бойынша ғана мемлекеттік бюджеттен қаржыландыруды 1,8 млрд теңгеге арттырып, құрылыс мерзімін жалғастырып алған. Алайда көппәтерлі үйлердің құрылысын аяқтамаған. Тіпті басшылары сотталғаннан кейін де тендерге қатысып, 1 млрд теңгенің құрылысын салу тапсырмасын жеңіп алған...
Қорыта айтқанда, «Номад строй ЭК» ЖШС мемлекетке және жеке азаматтарға 7 млрд теңгеден артық зиян келтірген. Мұның ішінде төленбеген еңбекақы және кредиторлық қарыздар жоқ. Оларды қоссақ бұл фирманың зиянкестігі шектен шығып кетеді. Осының өзі Астана қаласында анықталған фактілер. Ал бұлар басқа аймақтарда да жұмыс істеп, халықты қан қақсатуы мүмкін. Үлескерлер өз хатында Астана қаласының Сарыарқа аудандық прокуратурасына қайырылғандарымен ешқандай нәтиже болмағанын айтады.
Міне, осындай заңсыздықтарды көрген соң біз тиісті органдарға қайырылып, тексеруді талап еткен хаттар жібердік.
Тұрғын СЫЗДЫҚОВ,
Мәжіліс депутаты