Шараның ашылу салтанатында сөйлеген сөзінде облыс әкімінің бірінші орынбасары Айдарбек Сапаров Елбасы Жолдауында өңірлік деңгейдегі резервтерді тауып, бұқаралық спорт пен денешынықтырудың қолжетімділігін арттыру міндеті қойылғанын, елімізде кем дегенде 100 денешынықтыру-сауықтыру кешенін салу тапсырмасы берілгенін, оның алғашқы қадамы Қызылжар өңірінде бастау алғанын атап өтті. «Өңірде бірнеше көше батыр есімімен аталады. Оның атындағы мектеп алдына еңселі ескерткіш қойылған. 14 жасынан атқа қонып, қолына найза ұстап, қазақ жерін жоңғар шапқыншылығынан қорғауда небір ерлік көрсеткен, қол бастаған бабамызды қалай ұлықтасақ та жарасады. Абылай хан оның ақылдылығын, ержүректігін үлгі еткен. Солтүстікқазақстандықтардың 30 пайызға жуығы спортпен шұғылданып, жастарға саламатты өмір сүру үлгісін көрсетіп келеді. Жуырда Петропавл қаласында мемлекеттік-жекеменшік әріптестігі шеңберінде әмбебап теннис орталығы тұрғызылды. Бұл үрдіс алдағы уақытта да өз жалғасын табады», дей келіп, Айдарбек Сейпілұлы аймақ басшысы Құмар Ақсақаловтың жылы лебізге толы құттықтауын жеткізді.
Батыр Баянның алтыншы ұрпағы Зейнолла қажы Олжабаев, облыстың құрметті азаматы, даңқты спортшы Жамбыл Тасеменов, ауыр атлетикадан облыстың аға жаттықтырушысы Ерік Әлібаев, тағы басқалары қуанышқа ортақтасып, ұлт денсаулығының маңызына тоқталды. Аудан әкімі Асқар Бегманов байрақты бәсекелерде олжа салып жүрген жергілікті спортшылар мен жаттықтырушыларды марапаттап, ақшалай сыйақылар табыс етті. Олардың арасында ауыр атлетикадан Азия чемпионы Айдар Қазовтың есімі ерекше аталды. Жерлесіміз қазір әлем біріншілігіне дайындалуда.
1100 шаршы метр аумақты алып жатқан кешенді салуға қазынадан 80 миллион теңге бағытталды. Мұнда енді ауыл балалары күрес, ауыр атлетика, спорттың басқа да түрлерімен еркін айналысатын болады.
Салтанатты рәсім қазақ күресінен Батыр Баян атындағы республикалық жарысқа ұласып, осымен екінші рет ұйымдастырылған ашық турнирге алаң иелерімен қатар Ақмола, Түркістан, Қарағанды облыстарынан сайдың тасындай іріктелген палуандар жиналды. Олар 80 килодан жоғары салмақ бойынша өзара күш сынасып, «Түйе палуан» атағын сарапқа салды.
Боз кілемге бірінші болып көтерілген Түркістан облысының өкілі Ерсұлтан Мұзапаров Солтүстік Қазақстан облысының намысын қорғаған қарсыласын таза жықты. Ол екінші белдесуінде де алаң иесі Алпысов Дулатты еркін ұтып, бас жүлдеден үміткерлердің бірі екенін танытқан еді. Алайда 2014 жылғы «Қазақстан барысы», екі дүркін әлем чемпионы Мұхит Тұрсыновтан жеңіліс тапты. Мұхит Шығыстың тумасы болғанымен, бүгінде «Қызылжар арландары» күрес орталығында жаттығады. Мұхиттың алдын Азия жеңімпазы, халықаралық дәрежедегі спорт шебері Сейтен Айбат орап кетті. Ол ақтық белдесуде М.Жұмабаев ауданының палуаны Ақжігіт Ораловтың осал жерін дөп басты. Белдесу аяқталуға санаулы секундтар қалғанда оның босаңсығанын пайдаланып, қапы қалдырды.
Сөйтіп «Ұзынкөл» шаруа қожалығының жетекшісі Қанат Әлмұратов бас жүлдеге тіккен жеңіл көлікті қанжығаға байлады.
Өмір ЕСҚАЛИ,
«Егемен Қазақстан»
Солтүстік Қазақстан облысы