Байқау комитеті Алматының қоғамдық көліктегі табыстың ашықтығына цифрлы технологияны пайдалануы, оған сарапшылар мен бизнестің қатысуы, МЖӘ механизмінің ұтымды қолданылуы, экологияны жақсартуға басымдық беруі сынды бірқатар жүйелерін айрықша бағалаған.
Биыл шаһарда автобус парктерін жаңарту деңгейін 80%-ға жеткізу көзделуде. Жеке инвестиция есебінен үшінші буындағы электробустар шығаратын автобус паркі мен зауыт салынды. Электробустарды қала бағыттары бойынша жүргізу шаһардың экологиясына оң әсер етіп отыр. Мегаполисте ел аумағы бойынша алғаш рет BRT жүйесі іске асты, қоғамдық көлік үшін 110 км арнайы жолақ жасалып, қаланың 10 орталық көшесіне біржақты көлік қозғалысы енгізілді. Орталық аумақтарда тұтастай велодәліз жасалды. Алматыны тыныш аудандармен және кейін қосылған елді мекендермен байланыстыру мақсатында қос бірдей метро бекетінің құрылысы қарқынды жүріп жатыр. Қоғамдық көліктердегі барлық транзакциялардың 97 пайызы қолма-қол ақшасыз жүргізілгені тұрғындар үшін тиімді болған. GPS-жүйесі арқылы диспетчерлік басқарудың автоматты жүйесі жұмыс істеуде, барлық автобустарға бейнебақылау орнатылған. Оған қоса тасымалдаушыларды субсидиялауға қатысты жолаушылардан түскен шағым бойынша айыппұл салу ісі жүзеге асқан. Қалада ЖКА-ға қатысты фото-бейнетіркеу жүйесі жұмыс істейді. Әзірге 709 қозғалыс жолағы бақылауға алынған болса, келер жылдан бастап бақылау нүктелері екі есеге ұлғаймақ.
Көлік жүйесін реформалауда қала басшылығы үздік халықаралық мамандармен бірігіп жұмыс істеуде. Олардың арасында қоғамдық көліктер мен көшелерді жаңғыртумен айналысатын «Gehl architects», «Тұрақты көлік» жобасы бойынша жұмыс істейтін БҰҰ ДБ, көлік қозғалысының кешенді сызбасын жасайтын «A+S Транспроект»,«Systra» компаниялары және Алматының шебер-жоспар концепциясын жасауға кіріскен канадалық-америкалық «HATCH» компаниясы бар.
Айта кетерлігі,«Smart city» форумы Люблянада 2011 жылдан бастап өтуде, ол Еуропа мен Азия қалалары арасында ынтымақтастықты нығайтуға, «Ақылды қалалар» цифрлы трансформациясын бірігіп жүзеге асыруға бағытталған. Елу ең үздік әлемдік тәжірибе мен инновациялық жобалардың үштігіне Алматымен қатар Анкара мен Загреб қалалары да еніп отыр.
Арман ОКТЯБРЬ,
«Егемен Қазақстан»
АЛМАТЫ
