Елордада өткен «Баспасөзге жазылушылар күні» мерекелік шарасына қатысқан «Егемен Қазақстан» газеті биыл да жаздырып алушыларға өз тарту-таралғысын ала барып, белсенді оқырмандарымызға «Егемен Қазақстан» кітапханасы» сериясымен шыққан кітаптарын сыйлады. Сондай-ақ жырдан шашу шашып, жиналған көпшілік қауымға ғасырмен үндескен бас басылымның ақ тілегін арнады.
«Жазылушылар күнін біз 1993 жылдан бастап дәстүрлі түрде атап өтеміз. Биыл «Қазпошта» 25-ке толып отыр. Бүгінгі шараның ерекше сипатта өтуі осымен де байланысты» - деді салтанатты жиында сөз алған «Қазпоштаның» Астанадағы филиалы директорының орынбасары Әсел Сыздықова.
Мерекелік шараға 11 газет-журнал, атап айтқанда, «Егемен Қазақстанмен» бірге «Казахстанская правда», «Астана ақшамы», «Спорт», «National Geografic», «Қазақстан әйелдері» және басқа да басылымдар қатысты. Шара барысында редакция өкілдері «Қазпоштаны» ширек ғасырлық тойымен құттықтап, газет-журналдарды оқырманға жеткізуде маңызды рөл атқаратын мекеме қызметкерлерінің жұмысына табыс тіледі.
Қарлығаш ҚҰРАМЫС,
«Егемен Қазақстан»
