Түркістанда халықаралық журналистер форумы өтті

Келелі кеңеске Түркия, Қыр­ғызстан, Әзербайжан және Татар­стан елдерінің ақпараттық агент­тіктері мен белді басылым­дарының жетекшілері, отандық  БАҚ басшылары мен өкілдері, ғалымдар және журналистика бөлімінің студенттері қатысты. 
Жиында Түркістан облы­сы­ның басты брендін қалып­тас­тыру, облыстың оң имиджін көте­ру, сондай-ақ Түркістан қа­ла­сын түркі әлемінің рухани ор­та­лығына айналдыру сөз болды. 

Форумның ашылуында облыс әкімі Жансейіт Түйме­баев аталған жиынның маңыз­ды­лығына тоқталып, медиа кеңістікті дамыту, киелі шаhар­ды түркі әлемінің рухани орта­лы­ғына айналдыру жолында осындай келелі кеңестердің оң ықпал ететіндігін айтты.

«Елбасы Түркістан қала­сын Түркі әлемінің рухани орта­лығына және әлем туристері ке­луге асығатын қалаға айналдыру жөнінде тапсырма берген бо­латын. Қазақстан халқына арна­ған «Қазақстандықтардың әл-ауқатының өсуі: табыс пен тұрмыс сапасын арттыру» Жолдауында да туризм мәсе­лесіне ерекше тоқталды. Туризмді дамытуда ақпараттық жұмыстың маңызы зор. Бүгін шетелдік ақпарат құралдары өкілдерін, еліміздің жетекші телеарналары мен басылымдарының басшыларын, өңірдегі редакторлар мен журналистердің басын қосудағы мақсатымыз – баршаңызды бір­лесіп жұмыс істеуге жұмылдыру. Қа­ланы көркейтуге және отан­дық журналистиканы дамытуға ар­налған ұсыныстарды тың­дауға әзірміз. Бүгінде облыс ор­та­лығына мемлекеттік қызмет­кер­лермен қатар бірқатар журналистер көшіп келді. Олар Түр­кістанның жаңа жылнамасын жазып жатыр. Сіздерді де Түркі әлемінің рухани орталығына жұмыс істеуге шақырамын, – деді Ж.Түймебаев.

Өңірдегі игілікті істерді түркі ­тілдес елдер БАҚ-тарында тарату және өзге мемлекеттер­мен ақпараттық салада ынты­мақ­тастықты арттыруды мақсат тұтқан жиында сала білгірлері отандық журналистиканы дамыту бағытындағы тың идеялар мен бастамаларын ортаға салды.

Осы форумға түркі тілдес ел­дерден арнайы шақырылған ақпарат құралдарының жетек­ші­лері мен өкілдері алдағы уақытта облысты халықаралық деңгейде насихаттауға үлес қосуға дайын екендіктерін жеткізді. Сондай-ақ шынайы әрі сапалы ақпарат арқылы Түркі әлемінің рухани орталығы – Түркістанның туризм саласын дамытып, инвес­тиция тартуға көп көңіл бөліп отырғанын тілге тиек етті. 

Жиында баяндама жасаған БАҚ басшылары Түркістан шаһарында түркі тілдес мемлекеттерге ортақ ақпарат тарататын интернет ресурс құру ұсынысын айтты. Спикерлердің пікірінше, ақпараттық сайт жүйелі жұмыс істеген жағдайда түркі дүниесі елдері арасындағы тілдік кедергілерді жоюға септігін тигізбек.

Форум аясында Түркістан облысы ішкі саясат басқармасы мен шетел басылымдары ара­сында келісімдерге қол қойыл­ды. Тарқатып айтар болсақ, Түркияның «TRT» телеком­па­ниясының Астанадағы өкілдігінің директоры Абдулхамит Авшар мен Түркістан облыстық ішкі саясат басқармасының басшысы Бейсенбай Тәжібаев БАҚ саласындағы әріптестік жә­не іскерлік байланыс орнату жөніндегі меморандумға қол қойды. Сонымен қатар Қыр­ғызстанның «Кабар» ұлттық ақпарат агенттігінің ІТ депар­таментінің директоры Калнур Жаныбаевпен, Татарстанның «Татар-информ» ақпарат агент­тігі бас директорының орынба­сары Рамис Латиповпен жә­не Әзербайжанның ITV теле­ра­диокомпаниясының Қа­зақ­стан­дағы өкілі Мажиди Фузулимен де өзара меморандум жасалды.

Осы айтулы күнге орай облыс әкімінің қатысуы­мен «Түркістан медиа» халық­аралық орталығы ашылып, облыс туралы ақпараттар түркі тілдес елдердің ақпарат құралдарында 5 тілде (әзербайжан, түрік, өзбек, қырғыз, орыс) тарату жөнінде шетелдік ақпарат құралдарымен келісім жасалды.
Қазіргі таңда «Түркістан медиа» халықаралық орталығы түркіге ортақ  ақпараттық кеңістік құрудың алғашқы кезеңін бас­тап кетті. Бүгінде орталықта Қ.А.Ясауи атындағы қазақ-тү­рік университетінде білімін шың­даған түркі дүниесінің сту­денттері өз ана тілдерінде ақпар таратуға кірісті. 

Нұршат ТӨКЕН,

журналист

Түркістан