Іс-шара О.Мұхамеджановтың туғанына 70 жыл толуына орай ұйымдастырылды. Оған Мәжіліс Төрағасы Нұрлан Нығматулин, Парламент депутаттары, қоғам қайраткерлері, О.Мұхамеджановтың жары Шолпан Ғалымжанқызы, отбасы мүшелері, туған-туыстары және жақындары қатысты.
Алдымен жиналғандар Орал Байғонысұлының өмірі мен қызметіне арналған фотокөрменің ашылуына куә болды.
О.Мұхамеджанов облыстық тұтынушылар одағынан бастап, комсомол және партия ұйымдарында, ауылдық әкімшіліктерде, сонымен бірге облыстық халық депутаттары кеңесінде басшылық қызметтерде болды. Жоғарғы кеңеске де депутат болып сайланды. Кейін Үкімет аппаратында, Президент Әкімшілігінде көп жылдар жауапты қызметтер атқарды. Содан соң, 9 жыл бойы өмірінің соңғы күндеріне дейін Парламент Мәжілісінің екі рет төрағасы, депутаты болып елге, халыққа қызмет етті. Экс-спикердің осы жылдардағы өмірінің ең жарқын сәттері арнайы көрмедегі фотосуреттер арқылы баяндалып тұрды.
О.Мұхамеджанов көзі тірісінде «Құрмет», «Парасат», Достық (РФ), «Содружество» (ТМД ПАА) ордендерімен марапатталған.
Еске алу конференциясын Мәжіліс депутаты Нұртай Сабильянов жүргізді. Ол алғашқы сөзді Мәжіліс Төрағасы Нұрлан Нығматулинге берді.
Мәжіліс Төрағасы өз сөзінде 2013 жылы өмірден озған мемлекет және қоғам қайраткер О.Мұхамеджановпен танысқан сәтін қызметтес болған кездерін еске алып, көрнекті тұлғаның кісілік, адамгершілік қасиеттеріне тоқталды.
– Орал Байғонысұлының өзінің қызметін туған жері – Қостанай облысынан бастап, өмірінің соңына дейін елім деп, жерім деп еңбек етті. Қазақстанымыз егемендік алған бірінші күннен бастап, Елбасымыз Нұрсұлтан Әбішұлы Назарбаевтың қасында болып, әрқашанда Президентіміздің саясатын қолдап, еліміздің дамуына үлкен үлес қосқан азамат еді. Елбасымыздың барлық бастамаларына белсене араласып, қай жерде, қандай қызмет атқарса да, іскерлігімен, жауапкершілігімен адамгершілік және парасаттылық қасиеттерімен танылды. Әрқашанда абыройы жоғары, беделі биік болды, – деді Н.Нығматулин.
Орал Байғонысұлының жан-жақты қабілеті зор, мақсатқа берік, қызметке адал болғанын алға тартқан Мәжіліс Төрағасы оның есімі еліміз тарихында, соның ішінде Мәжілістің тарихында мәңгілік сақталатынын айтты.
Орал Байғонысұлының сөзге шешендігі, заң шығарушы органның жұмысына қосқан ерекше үлесі айтылды.
Мәжіліс Төрағасының сөзінен соң О.Мұхамеджановтың ғұмырынан сыр шертетін бейнефильмнің көрсетілімі болды.
Сонымен қатар мемлекет және қоғам қайраткері Оралбай Әбдікәрімов, Сенат Төрағасының орынбасары Сергей Громов, Қоғамдық даму министрі Дархан Калетаев, IV шақырылымдағы Мәжіліс Төрағасының орынбасары Владимир Бобров, Қостанай облыстық мәслихатының хатшысы Сайлаубек Есжанов және басқалар Орал Байғонысұлының ғибратты ғұмыры мен өнегелі еңбек жолын ерекше тебіреніспен баяндап берді.
Серік ӘБДІБЕК,
«Егемен Қазақстан»
