Қазақстан • 08 Қараша, 2018

Қағаз азайды, қарекет көбейді

110 реткөрсетілді

Батыс Қазақстан облысында k-vrachu.kz мобильдік қосымшасы енгізілгеніне биылғы қарашада бір жыл толды. PlayMarket, App Store дүкендері арқылы тегін жүктелетін бұл қосымшалар арқылы өңір тұрғындары дәрігердің қабылдауына смартфонмен-ақ жазыла алады. Бүгінде бұл қосымша 22 548 мәрте жүктелген.  

ХХІ ғасырдың адамы үшін уақыт – ең қымбат қазына. Ал уақытты тиімді пайдалану ең керекті, ең пайдалы өнерге айналып отыр. Денсаулық сақтау жүйесінде ақпараттық технологияны, мобильді цифрлы қосымшаларды белсенді пайдалану, электронды денсаулық төлқұжатын енгізу және «қағаз­сыз» ауруханаларға көшу ар­қылы медициналық көмек­тің қолжетімділігі мен тиім­ділігін арттыру – Мемлекет басшысының жыл басындағы Жолдауында арнайы айтылған мәселе болатын. Яғни мемле­кет­тік дәрежеде көңіл бөлініп отырған бастама деген сөз.

Батыс Қазақстан облысы медициналық құжаттар­ды қағаз­сыз жүргізуге енгізу қа­нат­­­қақты режімде 2018 жыл­­дың қаңтарынан басталды. Жоба шеңберінде өңірде­гі ме­ди­­цина ұйымдарында «Kazmedinform» медициналық ақпараттық жүйесі, Орал қала­сындағы 6 емханада электронды кезекті басқару жүйе­сі, жедел медициналық жәрдем­ді басқарудың «АДИС» автомат­тан­дырылған жүйесі енгізілді.

Мобильдік қосымша ар­қы­лы дәрігерлердің жұмыс кестесімен танысуға, тұрғы­лық­ты жері бойынша тіркел­ген учаскені анықтауға, дәрі­гер карточкасын қарауға, об­лыс­тың медициналық ұйым­дарын қарауға және оларды ка­ртадан табуға, дәрігерді үй­г­е шақыруға, дәрігердің қ­а­­б­ыл­­дауына жазылуға және қажет болған жағдайда жазылу уақытын өзгертуге болады. Оған қоса Push хабарламалар және дәрігерге бару жөнінде ескерту функциялары бар.

Дәрігердің қабылдауына жа­зы­луға арналған k-vrachu.kz веб-порталында тіркелген учас­кені іздеуге, дәрігердің (жалпы, тәжірибелік дәрігер) қыз­мет көрсететін ауданын қарауға, дәрігерді үйге шақы­руға, дәрі­гердің қабыл­дауы­на онлайн жазылуға, дәрігердің кес­те­сін, оның біліктілігін қарау­ға, дәрігерді бағалауға болады. 

Медициналық-санитария­лық алғашқы көмек ұйым­дарын­да кезекті азайту үшін қаланың барлық емханасында «Электронды табло» электронды кезекті басқару бағдар­ламасы енгізілген. Қаланың 6 емханасында және «Деркөл» дәрігерлік амбулаториясында «Казмединформ» медицина­лық ақпараттық жүйесі­мен ин­те­грацияландырылған элект­рон­ды кезекті басқару жүйесі жұмыс істеп тұр. 

Қазіргі таңда өңірдегі 121 нысанның 105-і қағазсыз қыз­мет көрсетуге көшірілген. 

Облыстық жедел медицина­лық жәрдем қызметі онлайн режімінде жұмыс істеуі үшін ситуациялық орталық орнатылып, автоматтандырылған жүйе жаңғыртылды. Қалалық жедел жәрдем стансасы 32 дана мобильдік АРМ планшеттермен 100% қамтылған. Ал облыс бойынша 138 дана сани­тарлық автокөлік түгелімен GPS-мониторингке қосылған. 

Тағы да сандарды сөйлетсек, өңірдегі медициналық ұйым­дар компьютерлік техника­мен 100% жарақталған, бұл дегені­ңіз − 4500-дей компьютер! Қай салаға да ауадай қажетті құралға айналған бұл техниканы жаңартып отыруға облыс басшылығы жыл сайын көңіл бөліп келеді. Тіпті «Батыс Қазақстан облысында денсаулық сақтау басқармасын цифр­ландыру жөніндегі жол картасы» атты арнайы бағдар­лама әзірленіп, оның орындалуын облыс әкімінің орынбасары қадағалайды.

Әрине проблема да жоқ емес. Соның бірі – орталықтан шалғай елді мекендердің интернетпен толық қамтылмауы. Бүгінде 383 медициналық меке­менің 120-сы интернет желі­сіне қосыла алмай отыр. Бұлар негізінен алыстағы шека­ра­лас аудандардың медиц­и­налық, фельдшерлік-акушерлік пункт­тері. Таяуда өңірде болған Ақпарат және коммуникация­лар вице-министрі Нұргүл Мауберлинова шекаралық елді мекендерді сапалы байла­ныс, интернет жүйесімен қам­тамасыз ету мәселесін шешу үшін республикалық деңгей­­де жұмыс атқарылып жат­қанын айтқан болатын. Ен­деше кешікпей бұл түйткілдің де түйіні тарқатылар.

– Орал қалалық №3 емханасы бір кезекте 100 науқасты қабыл­дауға арналғанымен, толық қуаты 320 пациентті бір­­ден қабылдауға жетеді, – дей­ді емхана директоры Сан­дуғаш Кеңесова. – Об­лыс орта­лығының тарихи аума­ғында орналасқан мекеме 46 500 адамға қызмет көрсетеді. 

Бір ерекшелігі осы аумақта 11 мектеп, 10 балабақша, 4 колледж, бір мемлекеттік университет орналасқан. Сонда бұл емханаға балабақшаның 1639 тәрбиеленушісі, 6837 оқушы, 8212 студент қаралады. Ем­ха­нада қызмет ететін 305 дәрі­гердің иығындағы жауап­кер­шілік жүгін бағамдай беріңіз.

Өңірдегі барлық медици­на­лық мекеме сияқты №3 ем­хана да жыл басынан бас­тап қағазсыз құжат жүргізуге көш­кен. Бұл үшін барлық жағ­дай жасалған.  Дәрігерлер де, нау­қас­тар да денсаулық сақ­тау саласына жаңа жүйенің, ақ­па­рат­тық технологияның енуін қуана құптап отыр. 

Қазбек ҚҰТТЫМҰРАТҰЛЫ,

«Егемен Қазақстан»

Батыс Қазақстан облысы

Баннер
Соңғы жаңалықтар

Ең қысқа әңгіме. Қанат Әбілқайыр

Ең қысқа әңгіме • Бүгін, 11:33

Ең қысқа әңгіме. Арман Әлменбет

Ең қысқа әңгіме • Бүгін, 11:26

Күлкі керуені № 2

Руханият • Бүгін, 10:27

Қылқаламның ұшында – Қарағанды

Руханият • Бүгін, 09:48

«Қоянқасқа» тұлпар топ жарды

Руханият • Бүгін, 09:11

Қазақ дастарқанынан дәм татты

Аймақтар • Бүгін, 09:03

Баянғали туралы баян

Руханият • Бүгін, 08:52

Жаңа аялдамаға жаны қас

Аймақтар • Бүгін, 08:31

Жаңаөзенде жаңа жоба басталды

Аймақтар • Бүгін, 08:24

Тағзым мен тағылым тоғысқан той

Руханият • Бүгін, 08:19

Экономикада тұрақты өсім бар

Экономика • Бүгін, 08:06

Краудфандинг қазаққа да жат емес

Қазақстан • Бүгін, 08:00

Ұқсас жаңалықтар