Коньки спорты
Коньки спортынан әлем кубогы Жапонияда басталып, АҚШ-та өз мәресіне жетеді. Халықаралық конькишілер одағы (ISU) жариялаған күнтізбе бойынша алғашқы кезең 14-18 қараша аралығында Жапонияның Обихиро қаласында өтеді. Бес кезеңге созылатын әлем кубогының үшеуі Еуропа, екеуі Азия құрлығында ұйымдастырылады. 1-кезең – Жапония (16–18 қараша), 2-кезең – Қытай (23–25 қараша), 3-кезең – Германия (7–9 желтоқсан), 4-кезең – Нидерланды (14–16 желтоқсан), 5-кезең – Норвегия (1–3 ақпан).
Былтырғы әлем кубогында қазақстандық конькишілер арасында ең үздік нәтижеге Екатерина Айдова қол жеткізді. Ол 1000 метрлік сайыста 131 ұпай жинап, 12-орынға табан тіреген. Командалық жарыс бойынша Қазақстан құрамасы 9 және 12-орын иеленген-ді.
Шаңғы жарысы
Шаңғышылар биылғы маусымды 25 қараша күні Финляндияның Рука қаласынан бастайды. 23 кезеңге жалғасатын байрақты бәсеке 2019 жылдың 24 наурызында Канаданың Квебек қаласында өз мәресіне жетеді. Сондай-ақ осы аралықтағы негізгі жарыс әлемнің 10 еліндегі 18 қалада өтеді. Олардың арасында Лиллехаммер, Осло (Норвегия), Давос (Швейцария), Дрезден (Германия) және тағы басқа ірі қалалар бар.
Өткен маусымда қазақстандық шаңғышы Алексей Полторанин Италия, Финляндия және Словенияда өткен 15 шақырымдық қашықтықта топ жарды. Сонымен қатар бір рет күміс жүлде, бір рет қола медаль иеленді. Әлем кубогының қорытындысы бойынша Полторанин 796 ұпай жинап, әлемдегі ең үздік 7 шаңғышының қатарынан көрінді.
Фристайл (могул)
Фристайлдың могул түрінен әлем кубогы 2018 жылдың 7 желтоқсанында Финляндияның Рука қаласында басталып, 2019 жылдың 3 наурызындағы Алматыдағы Шымбұлақта аяқталады. Шымбұлақ – тұңғыш рет әлем кубогын қабылдайды. Мұның өзі Қазақстанның могул спортынан бәсі биік екенін білдіреді. Өйткені былтырғы маусымда ерлер арасында отандасымыз Дмитрий Рейхерд төрт рет екінші орын, үш рет қола жүлде алса, Павел Колмаков бір рет үздік үштіктің қатарынан көрінді. Ал қыздар арасында Юлия Галышева бір реттен алтын, күміс, қола жүлде иеленді. Сондай-ақ 2018 жылғы Олимпия ойындарында қола жүлдеге қол жеткізді. Биылғы әлем кубогы жарысы Қытай, Канада, АҚШ және Жапонияда өтеді.
Шорт-трек
Шорт-тректен әлем кубогының алғашқы кезеңі 2 қараша күні Канаданың Калгари қаласында басталып, отандасымыз Абзал Әжғалиев 500 метрлік бәсекеде финалға дейін алқынбай жетіп, күміс медальды иеленді. Ол Канадада 40.136 секунд нәтиже көрсетіп, Қазақстанның жаңа рекордын тіркеді. Сонымен қатар Абзал былтырғы маусымда дәл осы қашықтықта да күміс жүлде алған. Ал 1000 метрде Нұрберген Жұмағазиев мәреге үшінші келіп, қоланы қанағат тұтқан-ды.
Жалпы шорт-тректен 2018-2019 маусым алты кезеңнен тұрады. Ең қызығы, әлем кубогының үшінші кезеңі тұңғыш рет Қазақстанда, 7-9 желтоқсан күндері Алматы қаласында өтеді.
Биатлон
Биатлон спортынан 2018-2019 маусымындағы әлем кубогы жарысының алғашқы кезеңі 2018 жылдың 2–9 желтоқсан аралығында Словенияның Поклюка қаласында басталып, 18–24 наурызда Норвегияның Холменколлен қаласындағы 9-кезеңмен аяқталады. Әлем кубогының биылғы кестесі мынадай: 2-кезең – Аустрия (10–16 желтоқсан), 3-кезең – Чехия (17–23 желтоқсан), 4-кезең – Германия (7–13 қаңтар), 5-кезең – Германия (14–20 қаңтар), 6-кезең – Италия (21–27 қаңтар), 7-кезең – Канада (4–10 ақпан), 8-кезең – АҚШ (11–17 ақпан). Ал әлем чемпионаты Швецияның Эстерсунд қаласында 7–17 наурыз аралығында өтеді.
Айта кетейік, былтыр Швецияның Эстерсунд қаласында өткен әлем кубогының алғашқы кезеңіндегі аралас эстафетада отандастарымыз Максим Браун мен Галина Вишневская мәре сызығын үшінші кесіп, биатлон спортындағы алғашқы қола жүлдені ел қоржынына салған еді.
Мәнерлеп сырғанау
Мәнерлеп сырғанау спортынан жылдың негізгі ірі турнирлері тамыз айында басталды. Бүгінге дейін Lombardia Trophy, U.S. International Figure Skating Classic, Skate America және Skate Canada секілді халықаралық бәсекелері өтті. Қазақстандық спортшылар арасынан Элизабет Тұрсынбаева үш халықаралық турнирге қатысып үлгерді. Словакияда өткен Ondrej Nepela Trophy-2018 турнирінде екі бағдарлама бойынша 192.30 ұпай жинап, екінші орыннан көрінсе, араға 20 күн салып Финляндияда ұйымдастырылған Finlandia Trophy бәсекесінде күміс жүлдегер атанды. Бұл турнирде отандасымыз 200,74 ұпай жинады. Ал Skate Canada турнирінде бесінші орын иеленді.
Алдағы уақытта отандық мәнерлеп сырғанаушыларды Alpen Trophy (Аустрия), Trophée de France (Франция), Golden Spin (Хорватия), Гран-при жарысының финалы (Канада), Төрт құрлық чемпионаты (АҚШ), әлем чемпионаты мен командалық әлем чемпионаты (Жапония) күтіп тұр.
Әли БИТӨРЕ,
«Егемен Қазақстан»
