Турнир облыстық деп аталса да оған балуандар еліміздің облыстарынан, облыс аудандары мен қалаларынан және Ресей мен Қырғызстаннан да келіп қатысты. Владимир Петрович өмірінің соңына дейін грек-рим күресінен облыстағы бас жаттықтырушы болды. Оның алдынан жүздеген спортшы шәкірттер шынығып шықты. Облыстық денешынықтыру және спорт басқармасының басшысы Евгений Вильямстің айтуынша, уақытында грек-рим күресінен Қазақстан құрамасының жартысынан көбі Қостанай грек-рим күресі мектебінің түлектері болатын.
Жаттықтырушы ұстазды еске алу үшін оның спортта үлкен жетістіктерге жеткен достары мен шәкірттері келді. Олардың арасында Атланта олимпиадасының чемпионы Юрий Мельниченко, Әлем кубогінің 4 мәрте иегері, Еуропа чемпионы Бисолт Дециев, Азия және Әлем чемпионы Бақтияр Бәйсейітов және тағы басқалар бар.
Владимир Петрович грек-рим күресінен 45 КСРО спорт шеберін, 3 халықаралық спорт шеберін, бір ҚР еңбек сіңірген спорт шеберін тәрбиелеген еді. Олардың арасында өзінің Сергей және Валерий атты екі ұлы да бар. Сергей – ҚР еңбек сіңіргенг спорт шебері болса, Валерий халықаралық спор шебері атанды.
«Владимир Петрович олимпиадалық биікті мақсат тұтқан жаттықтырушы болды.Оның өмірі спортшыларға және жалпы жастарға үлгі-өнеге» деді облыс әкімінің орынбасары Марат Жүндібаев.
Турнирде балуандар 10 салмақ дәрежесінде белдесті. Соның ішінде 4 салмақта қостанайлық балуандар бірінші орынды жеңіп алды.
Нәзира Жәрімбет,
«Егемен Қазақстан»
Қостанай
