Оқу орнына келмейтін студенттерге 8 миллион теңге стипендия төленген

Аймақтар • 14 Қараша, 2018

Оқу орнына келмейтін студенттерге 8 миллион теңге стипендия төленген

205 рет көрсетілді

Шығыс Қазақстан облысы прокуратурасының өңірдегі колледждердің қызметіне жүргізген тексеруі кезінде біраз былықтың беті ашылды.

Egemen Qazaqstan

Прокуратураның баспасөз қызметі таратқан мәліметте тексеру барысында мемлекеттік тапсырысты орналастыру кезінде конкурстық рәсімдерді сақтамау, студенттерді жалған оқыту, гранттарды заңсыз тағайындау, оқытушылардың біліктілік талаптарына сай келмеуі, студенттерді жатақханалармен қамтамасыз етпеу, мемлекеттік мүлікті заңсыз жалға беруден табыс табу фактілері анықталғаны айтылады. «Жұмыс орнымен қамтылған түлектердің саны туралы мәліметтерді жасанды түрде арттыру, оқу орындарының әкімшілігі тарапынан түлектердің жұмыспен қамтылуына көмек көрсетілмеуі жиі орын алған. Мемлекеттік білім беру тапсырысын орналастыру ережелері бұзылып, басқа жерден келген студенттер жатақханалармен қамтамасыз етілмегеніне қарамастан, облыстық білім беру басқармасы жыл сайын Семей қаласындағы бизнес және сервис колледжіне, Аягөз қаласындағы политехникалық колледжіне және Өскемен қаласындағы екі колледжге гранттар берген. Сондай-ақ колледж әкімшіліктері студенттердің жатақханада тұру бағасына мемлекеттік тапсырыс бойынша келісімшарттың жалпы сомасына енген коммуналдық қызметтер үшін шығындарды енгізген, жатақханалардағы бөлмелерді үшінші тұлғаларға жалға берген. Күршім колледжінде 12 «студентті» жалған оқытқан.

Оқытушылар мен өндірістік оқыту шеберлері оқу сабақтарын өткізу кезінде теориялық және практикалық оқу журналдарында осы студенттерге баға қойған, оларды аралық аттестаттауға жіберген, курстан курстарға көшірген. Осы студенттерге стипендия төленіп, мемлекетке келтірілген залалдың жалпы сомасы 8 млн теңгені құраған. Осы факт бойынша сотқа дейінгі тергеу жүргізілуде», делінген прокуратураның баспасөз қызметі таратқан мәліметте.

Сонымен қатар колледждердің аумағында мүлікті жеке мақсатқа заңсыз пайдалану фактілері де анықталған. Мысалы, Өскемендегі ағайынды Абдуллиндер атындағы Шығыс Қазақстан облыстық өнер училищесінің аумағында ақылы автотұрақ орналасыпты. Прокурордың ұсынымы енгізілген соң автотұрақ жабылып, оның орнына спорт алаңшасын салу жоспарлануда.

Прокурорлар тексеру нәтижелері негізінде мемлекетке 43 млн теңгеден астам залал келгенін анықтады. Қадағалау актілері бойынша бүгінге дейін 36 млн теңге өндіріліпті. 60 тұлға тәртіптік, 4 тұлға әкімшілік жауапқа тартылды.

Азамат ҚАСЫМ,

«Егемен Қазақстан»

Шығыс Қазақстан облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз