Бұл қазақстандық жүргізушілер үшін өте тиімді болмақ. Өйткені жаңа жылдан бастап қазіргідей қағаз түріндегі сақтандыру полисін үнемі алып жүрудің қажеті болмайды. Неге десеңіз, Әкімшілік кодекске енгізілген өзгерістерге сәйкес, қағаз түріндегі сақтандыру полисі талап етілмейді және оның жоқтығы үшін айыппұл салынбайды. Алайда бұл жүргізушілердің азаматтық-құқықтық жауапкершілігін міндетті сақтандыру полисі енді көлік иелеріне керек емес екен дегенді білдірмейді. Ол бұрынғыша өте қажет болады. Тек бұл халық пен бизнес үшін сақтандыру бағасын арзандатып, сақтандыру төлемін алуды жеңілдету мақсатында қолданыстағы үлгіні электронды сақтандыру полисіне алмастыру дейміз. Сөйтіп міндетті және ерікті сақтандырудың барлық түрі бойынша электронды сақтандыру жасасуға жол ашылады. Жаңа жылдан кейін электронды сақтандыру жүйесі жүзеге асқан соң сақтандыру полисі онлайн арқылы рәсімделеді. Бұл қазіргі дәстүрлі түрдегідей сақтандыру компаниясына бармай-ақ, интернет арқылы (ұялы телефон немесе компьютермен) сақтандырушы компаниялардан сақтандыру полисін алуға қатысты мәлімет білуге болады. Содан кейін арада сақтандыру туралы келісімшарт жасалып, сақтандыру компаниясы шотына тапсырыс берушінің төлемі түскен соң, олар электронды сақтандыру жасалғаны туралы мәліметтерді сақтандырудың бірыңғай деректер базасына қосады. Деректер базасында жеке немесе заңды тұлғалардың келісімшарты, яғни құжаты тіркеліп, оған бірегей нөмір беріледі. Міне, осы бірегей нөмірлі құжат электронды полис деп аталады. Бұл электронды полис жеке адамның электронды поштасына да жіберіледі.
Сөйтіп жаңа жылдан бастап әкімшілік полиция қызметкері жүргізушіден қағаз түріндегі сақтандыру полисін талап етпейді. Ал жүргізушіге менде электронды сақтандыру полисі бар деп дәлелдеудің қажеті жоқ. Өйткені енді оны әкімшілік полиция қызметкерінің өзі дәлелдейді. Сондықтан электронды сақтандыру полисін уақытылы талапқа сай алған жөн. Дегенмен егер талап етілсе, сақтандырушы компания жүргізушіге азаматтық-құқықтық жауапкершілікті міндетті сақтандыру туралы полистің қағаз түріндегісін де шығарып бере алады. Бірақ қағаз түріне қарағанда, оның электронды түрінің ешуақытта жоғалмайтындығы және оны ешкімге көрсетіп дәлелдеудің де керек еместігі – артықшылығы дейміз.
Александр ТАСБОЛАТ,
«Егемен Қазақстан»
