Руханият • 15 Қараша, 2018

Ағайын адамдардай едік

446 рет
көрсетілді
3 мин
оқу үшін

Қызметке бару, одан келу, жұмыс бабында ресми сөйлесу сияқты қалыпты өмірде адамдар бір-бірін жан-жақты біле бермейді. Білісу,түсінісу жағдайлары көбінесе ұзақ сырлас, аралас-құралас жүргендер арасында болады. Бірақ жүріс-тұрысы қарапайым, әркіммен емін-еркін сөйлесе кететін, есеппен араласуды, сақтанып сөйлеуді білмейтін бір адамдар болады, олар бір кездесіп сөйлескеннен-ақ кісіні өзіне тартып, ежелгі танысындай болып кетеді. Мен білетін Айып Қисаұлы Құсайынов осындай кісі еді. 

Ағайын адамдардай едік

Айекең 15 жылдан астам уақыт Ауыл шаруашылығы министрінің орынбасары болып істеді. Ол кезде біз бір-бірімізді ресми жағдайларға байланысты ғана біліп жүрдік. Айекең шын мәнінде ауылдың жағдайын, шаруашылығын өте жақсы білетін адам еді. Жастайынан ауылда өсіп, оның бүкіл болмыс-бітімін көзімен көрген, кейін кеңшар директоры болып қызмет істеген, ауылдың адамы мен шаруашылығына ненің қажет, ненің қажет еместігін өз өмір тәжірибесі арқылы білетін маман болатын. Сол білімі мен тәжірибесінің арқасында ол министрлікте өте абыройлы қызмет атқарды.

 Қазақстанда малды асылдандыру ісіне үлкен үлес қос­ты. Әсіресе қойды асылдандыру ісін дұрыс ғылыми жол­ға қою­да Айекең үлкен ұйым­дастыру жұмыстарын атқарды: ғалымдардың бұл жұмыспен үзбей айналысуына жағдай жасады, көмектесті, соған қажет­т­і күнделікті жұмыстарды ерін­бей-жалықпай жүйелі жүр­гізіп отыр­ды. Сондықтан оны қызмет­тес­тері, облыс пен аудан­­дағы әріп­­­тестері қатты сыйлап, әрі маман, әрі адам ретінде жоғары бағалайтын. Республикамыздың түпкір-түпкір­інде оның тілеулес адам­да­рының көп болу себебі осыдан.

Өткен ғасырдың аяғында ауыл шаруашылығы жұмыс­та­рының, жалпы ауыл жағ­да­й­­ының құлдырап кетуі Айекең­­нің қызмет бабына да белгілі дәре­жеде ықпал етті. Ол кісі министр­дің орынбасары қызметінен босап, «Асыл» деген компания құрды. Ол компанияның мақсаты Қазақ­стандағы мал тұқымын асылдандыру жұмыс­тарын жүйелі түрде жал­ғас­тыра беру еді. Бірақ ол кез­дегі жағдай ондай қажетті істі қолдай алмады, сол жағы өкініш­ті болды.

 Сыйлас азаматты ажалға қи­ма­саң да, ажал­дан арашалап қа­л­ар амалың жоқ. Өкінесің, сағы­насың, сондай жақсылар көп бол­са екен деп тілейсің.

 Міне, біз еліне елеулі, халқы­на қалаулы, кезінде мем­лекет­і­міздің өркендеуіне үлес қос­қан, әртүрлі мемлекеттік шаруа­шылық қызметтерді атқар­ған ардақ­­ты Айекеңе − Айып Қисаұлы Құсайыновтың тұрған үйіне орна­тыла­тын тақтаның ашылуына қатысып отырмыз. Бұл мәңгілік ескерткіш, болашақ ұрпаққа үлгі болатын Айып сияқты адамзат­тың жарқын бейнесі қашанда биіктен көріне берсін.

Кеңес АУХАДИЕВ, 

мемлекет және қоғам қайраткері