Олимпиадаға 171 күн қалды
Дүбір
Біздің мақсатымыз – бес медаль
Алматыда ауыр атлетикадан ұлттық құраманың Олимпия ойындарына дайындық барысын талқылауға арналған жиын өтті.
Оған Спорт және дене шынықтыру істері агенттігінің төрағасы Талғат Ермегияев, Ауыр атлетика федерациясының президенті Қайрат Тұрлыханов пен спорттың осы түрінен ұлттық құраманың бапкерлері мен мүшелері қатысты. Жиынға сондай-ақ, агенттік төрағасының орынбасары Елсияр Қанағатов, Штаттағы ұлттық командалар және спорт резерві дирекциясының директоры Қайыргелді Жанпейісов те қатысып, онда зілтеміршілердің Лондон Олимпиадасына дайындығы талқыланды.
Дүбір
Біздің мақсатымыз – бес медаль
Алматыда ауыр атлетикадан ұлттық құраманың Олимпия ойындарына дайындық барысын талқылауға арналған жиын өтті.
Оған Спорт және дене шынықтыру істері агенттігінің төрағасы Талғат Ермегияев, Ауыр атлетика федерациясының президенті Қайрат Тұрлыханов пен спорттың осы түрінен ұлттық құраманың бапкерлері мен мүшелері қатысты. Жиынға сондай-ақ, агенттік төрағасының орынбасары Елсияр Қанағатов, Штаттағы ұлттық командалар және спорт резерві дирекциясының директоры Қайыргелді Жанпейісов те қатысып, онда зілтеміршілердің Лондон Олимпиадасына дайындығы талқыланды.
Басқосуға спортшылар арасынан Илья Ильин мен Светлана Подобедова ғана қатысқан жоқ. Басқаларының бәрі келіп, агенттік төрағасының, бапкерлердің ұлттық құрама алдына қойған міндет-мақсаттарын зейін қойып тыңдады. Ильин болса, Олимпиадаға жеке бағдарлама бойынша дайындалып жатыр. Ал Подобедова сұранып, Ресейге барып-келмек екен.
Жиында Қазақстан құрамасына қатысты көптеген мәселе қаралды. Алдымен агенттік төрағасы сөз алып, еліміздің Олимпиадада ауыр атлеттерімізге ерекше үміт артылып отырғанын, алтын жүлдеден үмітті спортшыларымыз болса, ол зілтеміршілер екенін атап өтті. Осыған байланысты Т.Ермегияев мемлекеттің ұлттық құраманың Олимпиадаға дайындығына ерекше көңіл бөлетінін мәлімдеді. Осыдан кейін бас бапкер Алексей Ни команданың Лондон Олимпиадасына дайындығымен таныстырды.
Ол Қазақстан құрамасының жарысқа жан-жақты дайындалып жатқанын айта келіп, жақын арада Ильиннен басқаларының бәрі Талдықорғанда жиналып, мамыр айының соңына дейін сол жерде жаттығатындарын атап көрсетті. «Осы жерде, – деді ол, – Қазақстан чемпионаты өтеді. Бұл сында біз Лондон Олимпиадасына баратын спортшыларды анықтаймыз».
Оның айтуынша, Олимпиадаға қазір ерлер – төрт, әйелдер де төрт лицензияны иеленіп отыр. Содан кейін ұлттық құрама Текеліге жаттығуға барып, сол жерден Лондонға аттанады. Осы орайда бас бапкер Қазақстан құрамасы Тұманды Альбионда бес медаль алуға ұмтылатынын, соның екеуі алтын жүлде болса деген тілегі бар екенін жеткізді.
«Қазіргі күні біздің Олимпиадаға еш алаңсыз дайындалуымызға барлық жағдай жасалуда. Спорт және дене шынықтыру істері агенттігі, республика Ауыр атлетика федерациясы және бас демеушіміз – «Самұрық-Қазына» ұлттық әл-ауқат қоры барынша қолдау көрсетуде. Сондықтан біз Талдықорғандағы чемпионаттан кейін Лондонға дейін тау бөктерінде дайындалып, Олимпиададан бес жүлде әкелуді мақсат етіп отырмыз», – деді Алексей Ни.
Басқосуда Түркиядан келген кеңесші-бапкер Әнуар Түркілери өзінің әріптесімен толық келісетінін айтты. «Біз Ұлыбританияға алтын алуға барамыз, үш алтын жүлде алып жатсақ, оған еш таңданбаңыздар», – деді ол. Негізі, Түркілери мырзаның аузы дуалы деседі білетіндер. Оның айтқанының айдай анық, дәл келетінін Афина Олимпиадасынан бергі таныстығымыздан да білеміз, Бейжің Олимпиадасы басталар алдында да оған куә болғанбыз.
Сол кезде ол Ильинге ерекше үміт артылып отырғанын, Толағайдай тау-тасты көтере алатындай көрінетін батырымыздың бас жүлдені жеңіп алатынын айтқан болатын. Енді, міне, біз тағы да Олимпиадамен қатар, үш дүркін әлем чемпионы атанған тума таланттың Тұманды Альбионда да топ жаратынына сенгіміз келеді. Солай болса деп тілейміз!
Осыдан кейін ұлттық құраманың бас бапкері қайта сөз алып, команданың кейбір мүшелерінің осыдан біраз уақыт бұрын құзырлы органдарға арнайы хат жазып, «ұлттық құрамадан бөлек, жеке өзіміз дайындалсақ» деген өтініштеріне байланысты түсініктеме бере кетті. Осы жағдайдың мән-жайын бас бапкердің өзі былай түсіндірді:
«Қазіргі кезде тек Илья Ильин ғана ұлттық құрамадан бөлек дайындалып жүр. Бірақ оның да әр қадамын біздер үнемі қадағалап отырмыз. Ал өзге спортшыларға ондай рұқсат берілген жоқ. Қазіргі күні Владимир Кузнецов, Сергей Истомин және Владимир Седов Лазарь Донның қол астында жаттығуда. Қалған мықтыларды Әнуар Түркілеридің өзі баптауда. Және де олардың жеке жаттықтырушылары да бұл іске белсене араласуда».
P.S. 2008 жылы Бейжіңде өткен Олимпиадада Қазақстан құрамасы 1 алтын, 2 күміс және 1 қоланы иеленді. Бұл жарыста Илья Ильин чемпион атанса, Алла Важенина, Ирина Некрасова және Мария Грабовецкая жүлдегерлер қатарынан көрінді. 2009 жылы Қазақстан құрамасы Гуянгте өткен әлем чемпионатында 4 алтын және 1 қола медальға ие болды. Онда Зүлфия Чиншанло, Майя Манеза, Светлана Подобедова және Владимир Седов алтыннан алқа тақса, Владимир Кузнецов қола жүлдегер атанды. Ал 2010 жылы Анталияда өткен сында Майя Манеза мен Светлана Подобедова алтын тұғырдан қол бұлғады. Былтыр еліміз Париждегі әлем чемпионатында 2 алтын және 2 күміс медальді иеленді. Зүлфия Чиншанло мен Илья Ильин алтын, Майя Манеза мен Светлана Подобедова күміс медальға ие болды.
Дастан КЕНЖАЛИН.