Жаңа вице-президент сайланды
21 наурыз күні Швейцарияның Лозанна қаласында өткен Халықаралық әуесқой бокс қауымдастығы (АІВА) атқару бюросының алғашқы мәжілісінде Қазақстан Бокс федерациясының президенті Тимур ҚҰЛЫБАЕВ АИБА-ның кәсіпқой боксты дамыту бойынша вице-президенті болып сайланды.
21 наурыз күні Швейцарияның Лозанна қаласында өткен Халықаралық әуесқой бокс қауымдастығы (АІВА) атқару бюросының алғашқы мәжілісінде Қазақстан Бокс федерациясының президенті Тимур ҚҰЛЫБАЕВ АИБА-ның кәсіпқой боксты дамыту бойынша вице-президенті болып сайланды.
Осы жиыннан кейін АИБА президенті Чинг Куо-Ву Тимур Асқарұлын қауымдастық жарғысының 34.1-бабына сәйкес сайланған жаңа қызметімен құттықтады. Құттықтау хатта: «Сізді АИБА-ның жаңа вице-президенті болып сайлануыңызбен құттықтаймын. Сіздің кәсіпқой боксты дамытудағы еңбегіңізді бәрі жақсы біледі. Бұл сізге және Қазақстан боксына деген құрмет. Жаңа қызметіңізде кәсіпқой боксты дамытуға қомақты үлес қосатыныңызға сенеміз», делінген.
Қазіргі таңда осы мәртебелі ұйымның құрамына Т.Құлыбаевтан басқа Қазақстан Бокс федерациясының тағы бірнеше өкілі кіреді. Олардың қатарында федерацияның вице-президенттері Серік Қонақбаев пен Юрий Цхай АИБА-ның атқару комитеті мен техникалық және бапкерлер комиссиясының құрамына кірсе, ҚБФ-ның тағы бір вице-президенті Жанболат Сәрсенов АИБА-ның әйелдер комиссиясының, ҚБФ-ның атқару комитетінің мүшесі, «Астана арланс» жартылай кәсіпқой клубының бақылаушылар кеңесінің төрағасы Алмасадам Сәтқалиев АИБА-ның Бүкіләлемдік бокс сериясы жөніндегі комиссиясының, Юсуп Шамсузов осы ұйымның медициналық комиссиясының құрамына кіріп отыр. Ал ҚБФ аппаратының жетекшісі Бекжан Бектенов АРВ атқару бюросының мүшесі болып табылады.
Дастан КЕНЖАЛИН.