Парламент • 04 Желтоқсан, 2018

Сенат комитеті кинематография мәселелері жөніндегі заң жобаларын қарады     

85 реткөрсетілді

Парламент Сенаты Әлеуметтік-мәдени даму және ғылым комитетінің кеңейтілген отырысында «Кинематография туралы» заң жобасы қаралды. 

Заң жобасы кинематография саласындағы құқықтық, экономикалық және ұйымдастырушылық негіздерді айқындау мақсатында әзірленді. Кинематография саласындағы қоғамдық қатынастарды реттейтін дербес заңды қабылдау киноөндірісті қолдау, ұлттық фильмдердің сапасы мен бәсекеге қабілеттілігін арттыру, халыққа арналған кино көрсету қызметінің қолжетімділігі, киноиндустрияның ашықтығы мен инвестициялардың тартымдылығы, қазақстандық киноның шетелдегі беделінің өсуі мен танылуы үшін заңнамалық деңгейде жағдай жасау қажеттілігімен негізделген.

Заң жобасымен жалғыз құрылтайшысы және акционері Қазақстан Республикасының Үкіметі болып табылатын Ұлттық киноны қолдау мемлекеттік орталығының (бұдан әрі − Орталық) жұмыс істеуі үшін құқықтық негіз жасалған. Ұлттық киноны қолдау мемлекеттік орталығы ұлттық фильмдер деп танылуға үмітті киножобаларды және ұлттық фильмдерді мемлекеттік қаржылық қолдауды ұсыну, сондай-ақ кинематография саласындағы субсидияларды төлеу жөнінде бірыңғай оператор болып табылады.

Фильмді ұлттық деп тану жөніндегі ұсыныстарды тұжырымдау мақсатында Орталықтың жанынан Сараптама кеңесі – шығармашыл қызметкерлер мен сарапшылар қатарынан консультативтік-кеңесші орган құрылады. Заң жобасымен сондай-ақ ұлттық киноны мемлекеттік қаржыландырудың жаңа үлгісін енгізу ұсынылады. Мемлекеттік қаржылық қолдау ұлттық фильмдерді шығаруды, прокаттау мен көрсетуді және осыған байланысты іс-шараларды ұйымдастыру, сондай-ақ ұлттық фильмдерді шетелде ілгерілету үшін ұсынылады.

Ұлттық фильмдерді мемлекеттік қаржылық қолдау мәселелері бойынша ұсыныстар мен ұсынымдарды тұжырымдап дайындау мақсатында Қазақстан Республикасы Үкіметінің жанынан консультативтік-кеңесші орган – Ұлттық фильмдерді мемлекеттік қаржылық қолдау мәселелері жөніндегі мекемеаралық комиссия құрылады. Заң жобасы қабылданған соң Фильмдер мониторингінің бірыңғай автоматтандырылған ақпараттық жүйесі құрылатын болады, ол Қазақстан Республикасының аумағында фильмдерді жүйеге келтіру және есепке алуды қамтамасыз етеді. Сондай-ақ заң жобасымен ұлттық мәдени игіліктің ажырамас бөлігі ретінде ұлттық фильмдерді және жекелеген заңды тұлғаның жұмыс істеуі арқылы бастапқы материалдарды сақтау жолымен ұлттық кинематографияны қолдау көзделіп отыр.

Заң жобасына сәйкес фильмді фестивальдарда, семинарларда, ретроспективада көрсету жағдайларын қоспағанда, Қазақстан Республикасының аумағында фильмді прокаттау және көрсету ол Мемлекеттік фильмдер тізілімінде тіркелген кезде ғана және берілген прокаттау куәлігіне сәйкес жүзеге асырылады. Сонымен қатар, Қазақстан Республикасында шығарылған барлық фильмдерге және Қазақстан Республикасының аумағында прокаттау мақсатында әкелінетін (жеткізілген) фильмдерге жас санаттары беріле отырып, жасқа сыныптау жүзеге асырылады. Қазақстан  Республикасының аумағында фильмдерді прокаттау қазақ тілінде және басқа да тілдерде жүзеге асырылады. Ұлттық фильмдерді прокаттау қазақ тілінде және қажеттілігіне қарай басқа да тілдерде жүзеге асырылуға тиіс.

Прокатталуы шектеулі фильмдерді қоспағанда, Қазақстан Республикасының аумағында кинозалдар мен осы мақсаттарға арналған өзге де орындарда прокатталатын және көрсетілуі қазақ тілінде жүзеге асырылмайтын фильмдер қазақ тіліне дубляж жасалуға не субтитрленуге, не кадр сыртындағы аудармамен қамтамасыз етілуге тиіс. Комитет отырысында сондай-ақ «Қазақстан Республикасының кейбір заңнамалық актілеріне кинематография мәселелері бойынша өзгерістер мен толықтырулар енгізу туралы» заң жобасы қаралды. Негізгі заң жобасының тұжырымдамалық бағыттарын ескере отырып, Қазақстан Республикасының Әкімшілік құқық бұзушылық туралы кодексіне, «Салық және бюджетке төленетін басқа да міндетті төлемдер туралы» Қазақстан Республикасының Кодексіне және «Мәдениет туралы» Қазақстан Республикасының Заңына өзгерістер мен толықтырулар енгізу ұсынылады.

Аталған түзетулер салалық сипатқа ие және кинематографиямен байланысты мәселелерді құқықтық реттеуге арналған.   Қазақстан Республикасының Әкімшілік құқық бұзушылық туралы кодексіне енгізілетін түзетулер Қазақстан Республикасының мәдениет туралы заңнамасының талаптарын бұзғаны үшін тиісті жауаптылықты көздейді. «Салық және бюджетке төленетін басқа да міндетті төлемдер туралы» Қазақстан Республикасының Кодексіне енгізілетін өзгерістер мен толықтырулар ұлттық фильмдерді өндіру және прокаттау үшін салықтық преференцияларды қолдануды көздейді.

Аталған түзетулерге сай Қазақстан Республикасының кинематография туралы заңнамасына сәйкес ұлттық фильм деп танылған фильмді Қазақстан Республикасының аумағындағы кинозалдарда көрсетуден түсетін кірістер бойынша корпоративтік табыс салығы 100 пайызға азайтылуға жатады. Заң жобасымен «Мәдениет туралы» Қазақстан Республикасының Заңына қайталанатын нормаларды алып тастау және «Кинематография туралы» Қазақстан Республикасы Заңының жобасына сәйкес келтіру бөлігінде өзгерістер мен толықтырулар енгізіледі.

Аталған түзетулерге сәйкес мәдениет саласындағы мемлекеттік саясатты жетілдіру мақсатында уәкілетті орган консультативтік-кеңесші органдарды – театр, музыка қызметі және концерттік қызмет, цирк өнері, музей ісі және археология, бейнелеу өнері, сәулет және дизайн, әдебиет және кітап басып шығару жөніндегі салалық көркемдік кеңестерді құрады. Осы заң жобасы қабылданған жағдайда Қазақстан Республикасында кинематографияны дамыту үшін қажетті жағдайлар жасалады.

Құжаттар Палатаның қарауына жіберілді.

 
Баннер
Соңғы жаңалықтар

Біз - «BIRGE»!

Сайлау • 24 Мамыр, 2019

Мергендер Мюнхенде жүр

Спорт • 24 Мамыр, 2019

Мас араны омартаға кіргізбейді

Экология • 24 Мамыр, 2019

Ұқсас жаңалықтар