Егемендік жолында айрықша ерлік көрсеткен өр рухты бабалардың болмысын бүгінге жеткізіп, солардың абыройлы ісін жалғастыра білген Елбасының да ерен еңбегін айта кеткеніміз жөн. Тәуелсіздік күні – ең қасиетті күндеріміздің бірі. Ол қоғамдық сананың үлкен сілкінісінен, қазақ жұрты тәуелсіздіктен үміт үзе бастаған шақта келді. Сонысымен де қымбат, сонысымен де қастерлі, аяулы.
Қазіргі менің замандастарым, әдебиеттегі, саясаттағы барлық қатарластарым егемендіктің қазығын қағуға, буынын бекітуге, рәмізін әзірлеуге ар-ұждандарымен қызмет етті. Тікелей атсалысты. Саяси, әдеби элитаның халықтың рухын көтерудегі орындары айрықша. Ал халықтың еңбегі – дұрыс тіршілік етулерінде. Саясаттағы бүгінгі үлкен буынның тәуелсіз Қазақстанның алғашқы тәй-тәй басқан уақытында істеген жұмыстарын, қажырлы еңбектерін жоғары бағалаймын, құрметтеймін.
Егемендікке жетудің қиян кескі жолы, тауқыметті тарихы бар. Жазылғаны, жазылмағаны бар. Ол өз алдына даңғайыр тақырып. Ал сол тәуелсіздікті сақтай отырып, Мәңгілік Елге айналу да бүгінгі айқын мақсатымыз. Дамыған елдердің қатарына кіру үшін тек экономика емес, руханият та қажет. Экономикаң дамып, руханиятың ойсырап тұрса, ешқандай дамыған елдің қатарына кіре алмайсың. Елбасының «Рухани жаңғыру» бағдарламасы міне осыны көздейді. Кеше ғана жарық көрген «Ұлы даланың жеті қыры» еңбегі де сондай терең толғаныстан, үлкен сезіністен туған мақала. Әр қазақтың көкейінде өзі орындайтын миссиясы болуы керек. Әркім ынта-шынтасымен хәлі жеткенше экономикаға, әдебиетке, мәдениетке үлес қосуы тиіс. Сонда ғана алға озамыз.
Халықтың жүрегі, ойы, санасы егемендікпен бірге оянған. Әрине әлі де ұлттық сана толық ояна қойған жоқ. Бірақ осы ұмтылыс толастамауы керек. Елбасының «Ұлы даланың жеті қыры» деген үлкен еңбегі осы жолда да зор серпіліс болды. Жердің, елдің тарихы әлі де терең зерделеуді қажет етеді. Елбасының жасап беріп отырған бағдарламалары арқылы сол олқылықтың бәрін толтыруымыз керек. Ал сол еңбектің бәрі де тәуелсіздік үшін екенін бір сәт естен шығара алмаймыз.
Тәуелсіздігіміз баянды болғай.
Әнес Сарай,
жазушы, Мемлекеттік сыйлықтың лауреаты
