Жиынға Мәдениет және спорт министрі А.Мұхамедиұлы, мемлекет және қоғам қайраткері, профессор М.Жолдасбек, ҰҒА академигі С.Қасқабасов, филология ғылымдарының докторы Ш.Ыбырай және Н.Рахманов (Ташкент), Т.Садыков (Бішкек), Р.Аскер (Баку) сынды шетелдік ғалымдар қатысты.
Оқу залы қазақстандағы әдебиеттану ғылымының түркологиялық бағытта дамуына сүбелі үлес қосқан әдебиеттанушы, ғалым Бейсенбай Кенжебаев пен Немат Келімбетовтің құрметіне ашылып отыр. Түркологияның қазіргі заманауи даму тенденциясы туралы сөз қозғаған профессор Мырзатай Жолдасбек ғылымның қалыптасу жолындағы ізденістерді тілге тиек етті.
«Түркі халықтарының ежелгі дәуірде жасаған әдеби мұрасына қазақ халқының да мұрагер болуына құқылы деп таныған Бейсенбай Кенжебаев мақсатты жоспарлар құрып, орнықтырды. Бейсекең бойын жасырған тұлпар сияқты сырттай қарасаң момын, ішкі дүниесі астаң-кестең болып тұратын кісі еді. Өте ғұлама ғалым еді, Бейсекең. Сол биязылығына қарамай сұмдық батыл болатын», деп атап өтті М.Жолдасбеков.
Іс-шара көрнекті түркітанушы ғалым Немат Келімбетовтің ғылыми-шығармашылық мұрасына арналған «Қазақстанның қазіргі даму үдерісіндегі түркітану ғылымы» атты халықаралық конференциясымен жалғасты. Конференция қатысушылары түркологияны бүгінгі қоғамдық-гуманитарлық ғылым салаларының жетістіктері тұрғысынан сарапқа салып, теориялық және практикалық аспектілері туралы баяндамалар жасады. Сондай-ақ, жиын аясында қазақ, орыс, ағылшын тілдерінде басылып шыққан дүние жүзі түркологиясының тарихына арналған «Түркология. Дүниежүзі түркологиясының тарихы» атты кітабының тұсаукесері өтті. Әлемдік түркологияның жүріп өткен тарихи жолын, даму тәжірибесін, жетістіктерін жинақтау мақсатында жазылған құнды еңбек осы бағыттағы алғашқы іс-тәжірибе деуге болады. Осынау игілікті іске мұрындық болған «Астана» қаржы орталығының басқарушысы Қ.Келімбетовтің «Түркология ғылымының жаңа деңгейге көтерілуі, теориялық-әдістемелік ізденістерінің қайта зерделенуі жақын болашақтың міндеті. Бұл еңбек осы бір маңызды іске жол сілтеу болады деген үміттеміз», деген пікірі ғылымның зерттеу өрістерін жаңаша күн тәртібіне қою керек екендігін айқындай түседі. Басылымның түркологияның түрлі зерттеу бағыттарына қызығушылық танытатын ғалымдар үшін және ғылым тарихнамасымен айналысатын зерттеушілер үшін пайдалы болатынына сенімдіміз. Аталған еңбекке атсалысқан Ресей, Әзербайжан, Қырғызстан, Түркия, Өзбекстан, Қытай, Жапония, Моңғолия ғалымдары ұсынған зерттеу материалдары XVIII ғасырдан бастап түркология ғылымының даму ерекшеліктері мен көппарадигмалық қасиетін жан-жақты қамтиды.
Ая ӨМІРТАЙ,
«Егемен Қазақстан»
