MEGA Silk Way – ойын-сауық орталығына жиналған 500 балаға сыйлық табысталды және оларды Аяз ата, Ақшақар, Жалмауыз кемпір мен заманауи мультфильм кейіпкерлері – трансформерлер, миньондар, аю, темір адам келе жатқан Жаңа жылмен құттықтады. Мерекені инклюзивті алаңда қарсы алған балалар даун, аутизм синдромдары, spina bifida, қимыл-тірек аппаратының күрделі зақымы, обыр (ДЦП) ауруларымен күресіп келеді. Айта кетейік, ойын-сауық орталығындағы алаң қоғамдық қорға тегін ұсынылды.
2015 жылы құрылған «Асыл бала» республикалық қауымдастығы өз жұмысында негізгі үш принципті ұстанады. Біріншісі – денсаулығы ерекше күтімді талап ететін балаларға қамқорлық көрсету және қаржылай көмектесу, екіншісі – ауруханаларды ең қажетті жабдықтармен қамтамасыз ету және қазақстандық дәрігерлердің біліктілігін арттыруға атсалысу, үшіншісі – қауымдастыққа мүше болған үкіметтік емес ұйымдарға мемлекеттік органдармен қарым-қатынас орнатуға көмектесу және елімізде ғана емес, әлемде емдеу тəсілдері қарастырылмаған ауруларға шалдыққан балаларды сауықтыру методикаларын құрастыру», деді «Асыл бала» қоғамдық қорының баспасөз қызметшісі Гауһар Омарбек.
Жоғарыда атап өткен үш принциптің әсіресе соңғысы еліміздегі бүлдіршіндер мен олардың ата-аналары үшін ауадай қажет. Сондықтан «Асыл бала», «Мир равных возможностей», «Солнечный мир», «Микротия және атрезия», «Co-make», «Разные дети», «Spina Bifida», «Орда», «Олимпионик», «Марцана», «ҚАРАБЕКОВ», «Nomad Star» және «Каратэ-до федерациясы» сияқты үкіметтік емес ұйымдарымен осы бағытта тығыз жұмыс істеуде. Яғни туғаннан бастап аутизм, даун синдромы, spina bifida (омыртқаның және жүйке тамыр түтігінің дамуындағы туа біткен патология), ми салдануы ауруларына шалдыққан балаларды оңалту орталықтарын тек қаржыландырып қана қоймай, олардың жұмыс тәсілдерін зерттеп, еліміздің өзге өңірлеріне таратуды қолға алған.
Рауан ҚАЙДАР,
«Егемен Қазақстан»
