Жастар жылы өскелең ұрпаққа өз тәжірибелері мен білім көкжиегін кеңейтуге жол ашады

• 25 Қаңтар, 2019

Жастар жылы өскелең ұрпаққа өз тәжірибелері мен білім көкжиегін кеңейтуге жол ашады — студент

23 қаңтарда Мемлекет басшысы Н. Назарбаев Жастар жылының салтанатты ашылу рәсімінде Жастардың стартаптарына қолдау көрсететін қор құруды тапсырды. Президенттің шешімін жастар өкілдері қолдады. Бұл туралы Премьер-Министрдің баспасөз қызметі хабарлады.

Egemen Qazaqstan

Алматы қаласындағы Назарбаев Зияткерлік мектебінің (НЗМ) 12 сынып оқушысы Иван Крепактың айтуынша, Стартаптарды қолдаудың арнайы қорын құру — бұл жастарға еліміздің игілігі үшін барынша еңбек етуге, стартаптар құрып, түйген-білгенімен бөлісуге ынталандырады.

Алматы қаласындағы НЗМ физика-математика бағытының 12 сынып оқушысы Иван Крепак — бағдарламашы, робот технигі және АТ-қауіпсіздік саласының маманы. Иван Қазақстандағы алғашқы ақылды құлып — «bLock»-ты әзірледі, сондай-ақ жастардың түрлі жарыстарға қатысу үлесін арттыруды көздейтін «Zharys» мобильді қоымшасын әзірлеп шығарды. Бұған қоса, ол «Qiianat Etpe» лаңкестікке қарсы антенна» жобасының әзірлеушісі және сөйлеу мен есту қабілеті бұзылған адамдарға ишарат тілін меңгермеген адамдармен байланыс орнатуға мүмкіндік беретін «VoiceKomek» мобильді қосымшасының авторы.

«Бүгінде барлық халықаралық байқауларда, олимпиадаларда еліміздің атын зияткерлік мектептердің балалары танытуда. Жастарымыздың халықаралық деңгейде бәсекеге қабілетті екеніне көзім жетті. Еліміздің мықты білім беру әлеуеті бар. Мемлекет елімізде білімділер ортасы дамып, жастарға оқып, түрлі жобаларды іске асыруға қолдан келгеннің бәрін жасап жатыр. Нұрсұлтан Назарбаев айтқандай, өткен буынның тәжірибесін қайталап қана қоймай, сауатты, бәсекеге қабілетті әрі тәжірибелі жастарды өсіруіміз керек. Елімізде “Amazon”-ы бар Джефф Безос, өзіміздің “Uber” компаниямыз және “Alibaba” секілді интернет алыбы болатынына кәміл сенемін», — деді Иван Крепак.

И. Крепак бір елмен қоса, күллі әлем пайдаланатын жаңалықтар, серпілісті әрі ауқымды идеялар адамның жас кезінде ойлап табылады деп есептейді. Жастар күрделі мәселелерге жеңіл қарайды, қиын міндеттерді орындаудан қорықпайды. Жастар тың идеяларды іске асырудан тайсалмайды. Сәтсіздіктерден сескенбейді.

«Барлық сәтті шыққан стартаптар бірден табысты болған емес, табысты стартаптар – бұл бастан өткен сәтсіз әрекеттер мен талпыныстардан алынған тәжірибенің жемісі. Мен "Жарыс" мобильді қосымшасын іске қосқанға дейін көптеген басқа мобильді қосымшаларды әзірледім. Кейбіреулері көпшілікке танылмады, кейбірі жөнді аяқталмай қалды, кей жерлерде тәжірибем аз болды, дегенмен, АТ бойынша жарыстарға, олимпиадаларға, хакатондарға және басқа да мектеп пәндеріне қатыса бастаған кезде, жалғыз интернеттің көмегімен алысқа бармайтынымды түсіндім, адамдармен жиі араласып, кәсіби мамандармен ақылдасудың қажет екенін түсіндім. Одан кейін ниеттес, мақсатымыз бір адамдарды жолықтырдым. Елбасымыз Стартаптарды қолдаудың арнайы қорын құру туралы шешім қабылдағанына өте қуаныштымын», — деп жас өнертапқыш пікірімен бөлісті.

Сондай-ақ, ол Жастар жылы өскелең ұрпаққа өздерінің білім көкжиектерін кеңейтіп, оқу саласындағы білімдерін жетілдіруге, кәсіпкерлікте және экономика мен қоғамның басқа да салаларында ақпараттық технологияларды дамытуға жол ашатынына сенім білдірді.

«Жастар жылы – бұл Қазақстан үшін жаңа бір белес. Бұны ребрендинг деуге болады. Бүгінде Қазақстан көптеген көрсеткіштер бойынша ТМД елдерінен ғана емес, сондай-ақ АҚШ-тан, Канададан, Жапониядан, Қытайдан озық тұр», — деді И. Крепак.