Тұсаукесер барысында электронды тазалағыштардың қалай жұмыс істейтіні көрсетілді. Толығымен автономды құрылғы еденді жуу барысында адамдарды, қабырғаларды және басқа да кедергілерді айналып өтіп, кеңістікте адамның араласуынсыз қозғалады. Сонымен қатар робот үнемдеп, қайта пайдалану мақсатымен суды ішкі қорабында тазалайды. Жасанды интеллект элементтері енгізілгендіктен бірнеше робот бір бөлмеде бір-біріне кедергі келтірмей қозғалады. Тіпті робот-жұмыскерлер қажет болған жағдайда, батарея мен суды ауыстыру мақсатында өздігінен базаға аттанады.
– Tech Garden ұсынған үш айлық акселерацияға қатысу арқылы қажетті білім алып, роботты өндірістік мақсатта құрастыруға дайын деңгейге жеткіздік. Содан соң Қазақстанда алғашқы ірі тапсырыс беруші компанияны таптық. Бірінші роботтар Астанадағы Нұрсұлтан Назарбаев халықаралық әуежайында іске қосылды, – дейді жоба авторы Николай Потапов.
Қазіргі таңда аталған стартап қазақстандық компанияларға 100 роботты жеткізуге келісім жасасқан. Сондай-ақ ресейлік компанияларға 500 роботты жеткізу туралы келіссөздер жүргізуде. Бір роботтың құны – 2,5 млн теңге. Бұл роботтың технологиялық сипаттамасы қолданыстағы аналогтарынан жоғары болғанымен, бағасы бірнеше есе арзан. Қазір елімізде осы роботтардың өнеркәсіптік өндірісін құру мәселелері қаралуда.
«Елбасы қойған тапсырмаларды орындау аясында Startup Kazakhstan бағдарламасының нәтижесін көріп отырмыз. Мақсат – отандық стартаптарды қолдау және шетелдік стартаптарды тарту арқылы Қазақстанда жоғары технологиялық компаниялар жиынтығын құру. Үкіметтің қолдауымен Tech Garden кластерінің айналасында толық экожүйе құрылып, ТМД елдерінен стартаптардың тиімді ағыны орнатылды. Бүгін Startup Kazakhstan бағдарламасының нәтижесінде якуттық стартаптың жоғары технологиялы қазақстандық компанияға айналуын көрдіңіздер. Аталған компания Қазақстанда тіркеліп, салық төлеп, ел экономикасына қатысуда», дейді Tech Garden дербес кластерлік қорының бас директоры Санжар Кеттебеков.
«Егемен-ақпарат»
