07 Ақпан, 2019

«109» - апатты жағдайда арыз-шағым айтатын орталық

229 реткөрсетілді

Орал қаласының тұрғындары енді коммуналдық қызметтің кез келген түрінен ақау болған жағдайда орталықтандырылған «109» нөміріне хабарласып, арыз-шағым, өтінішін қалдыра алады. Бүгінде «109» call-center-дің штаты жасақталып, операторлар арнайы курста білім алып жатыр.

– Апырым-ай, мына жарыққа не болды?! Қалалық электр жүйесі мекемесінің телефоны бар ма? 54-34-84 нөміріне хабарлассам, үнемі бос емес...

– Қап, ыстық су тоқтап қал­ды ғой. Кімге хабарласу ке­рек еді? «Батыссуарнасы» ма, «Жайық­жылуқуат» па? Телефонын айтып жіберіңізші, көрші!

Қалада тұратын ағайынға мұндай диалогтар әбден таныс шығар. Аяқ астынан жарық сөніп, су тоқтап, газ кідіріп, жы­­лу берілмей қалса, жалма-жан коммуналдық апаттық қыз­мет­терге қоңырау шалып, көмек сұрайтынымыз рас қой. Өйткені қала деген – алып ағза сияқты, бір қызметтен ақау шықса, сол жерде «кептеліс» пайда болады. Әдетте іркіліссіз беріліп тұрған сан түрлі қызметтің қадірін аяқ астынан тоқтап қалғанда ғана білесіз. Сөйтіп бірде лифт мекемесінің, бірде байланыс қызметінің телефондарын іздеп, сабылып қаласыз.

– Көп кешікпей Орал қала­сында авариялық-коммуналдық қызмет бойынша қалалық бір­ыңғай «109» Call-орталығы ашылады. Бүгінде орталыққа қажетті жиһаздар мен техникалық құ­ралдар түгелдей сатып алынды, онда қызмет ететін персонал ар­найы курста білім алуда. Осы курс аяқталған соң орталық іске қо­сылады, – дейді облыстық бас­­пасөз қызметінің жетекшісі Дәурен Сәкенұлы. 

Айта кетейік, мұндай орталық дамыған елдер тәжірибесінде әуелден бар. Орал қаласы әкімдігі мен Батыс Қазақстан облысының ақпараттандыру, мемлекеттік көр­сетілетін қызметтер және ар­­хив­тер басқармасы бірлесіп қол­ға алған жаңа жобада осы елдер тәжірибесі толық ескеріл­ген. Мәселен, АҚШ-та газ, су, жылу, электр, тұрғын үй-ком­муналдық шаруашылық, қатты тұр­мыстық қалдықтар және бас­қа коммуналдық қызмет түр­лерінде болған ақау мен апатты жағдайларды «311» нөміріне хабарласып, шешуге болады екен. Оралдық жаңа жобаға балама ретінде осы қызмет алынып отыр. 
Қанатқақты жоба осы жыл­дың бірінші тоқсанында іске қо­сылмақ. Операторлар Smart Uralsk ғимаратының бірінші қабатында орналасатын болады. 
Call-орталықтың басты мақ­саты – қала тұрғындарына қолай­лы жағдай жасау, комму­нал­дық мәселелерді жедел әрі бір ор­та­лықтан шешу. 

– Расында бұған дейін апаттық-коммуналдық мәселелерді шешу үшін әр коммуналдық қызметке бөлек қоңырау шалушы едік. Бұл тұрғындарға ыңғайсыз екені түсінікті ғой. Жаңа жобаны ен­гізсе, апатты жоюға уақыт та үнем­деліп, мәселені жедел шешуге мүмкіндік туады деп ойлай­мыз, – дейді Орал қаласының тұрғыны Берік Шадығали.

Саралап қарасақ, апаттық қызметтің қазіргі жағдайы шы­нында да сын көтермейді. Жо­ғарыда айтылған комму­налдық қызметтердің сайтын ашып қа­расаңыз, наразы тұрғындардың ашу-ызаға толы хаттарын көресіз. Олар апаттық нөмірге ұзақ қо­ңырау шалып ала алмайтынын, шағым тіркеуші маманның қы­змет сапасы төмендігін, кейбір өтінішті қағаз түрінде талап ете­тінін, өтініштер базасының және оған бақылаудың жоқтығын айтып, дабыл қағып-ақ жатыр. 

Ал жаңа жоба қандай болмақ? 

«109» Call-орталығына ха­барласқан адамға 5-10 секунд ішінде жауап беріледі» деп сен­діреді жобаны ұйымдас­ты­рушылар. Және «109» қызметі аптаның жеті күні 24 сағат бойы қызмет етеді. Яғни бір минут та демалыс болмайды.

Осы жоба арқылы тұрғын­дар­дың жергілікті органдарға жеке келуін қысқарту, өтінішке жауап беру уақытын қысқарту көзделіп отыр. Сондай-ақ әр өтініш жіктеліп, ашық орындалады. Жергілікті атқарушы орган­дардың тұрғындар мен бизнес құрылымдармен өзара әрекеті жақсарады. Жиі кездесетін типтік мәселерді шешу үшін арнайы «Білім базасы» құрылады. Апатты жоюмен айналысатын әрбір орындаушымен тікелей байланыс орнатылып, тапсырыстың орындалу мерзімі бақылауда болады. 

Орал қаласында «Smart city – Ақылды қала» атты кешенді жоба қолға алынғанына екінші жылдың жүзі болды. Басты мақ­сат – тұрғындар өміріне қо­лайлы жағдай жасау, олардың қауіпсіздігін қамтамасыз ету, қор­шаған ортаны қорғау. Бұйырса жақында іске қосылғалы отырған «109» Call-орталығы да осы ба­ғыттағы бір асу болмақ.

Қазбек ҚҰТТЫМҰРАТҰЛЫ,

«Egemen Qazaqstan»

Батыс Қазақстан облысы

Соңғы жаңалықтар

Әлемдегі ахуал қандай?

Коронавирус • Бүгін, 10:57

Қызылорда: Тағы 3 адам тіркелді

Аймақтар • Бүгін, 09:57

ММА: UFC-ді сынға алды

Спорт • Бүгін, 09:20

Жұдырықтай жұмылайық

Руханият • Бүгін, 07:45

«Москваның» мәселесі көп

Аймақтар • Бүгін, 07:36

Зауалды бірлік жеңеді

Қоғам • Бүгін, 07:35

Жастар ауылдан кетпейді

Аймақтар • Бүгін, 07:34

Игіліктің бәрі халық үшін

Саясат • Бүгін, 07:25

Тұрғын үй бағасы қалай құбылады?

Экономика • Бүгін, 07:24

Ескінің жазығы – жаңаның қазығы

Руханият • Бүгін, 07:17

Гүлзада тіккен бетперде

Аймақтар • Бүгін, 07:12

Штаб құрылды

Аймақтар • Бүгін, 07:08

Елін өрге сүйрейтіндер

Руханият • Бүгін, 07:06

Ұқсас жаңалықтар