Мақсатымыз – бірлік пен береке
Сенбі, 14 қаңтар 2012 8:26
Бұл – Маңғыстаудағы этномәдени бірлестіктер мүшелерінің нық ұстанымдары
Маңғыстау аймағы – 60-жылдары мұнай-газ кен орындарының ашылуына байланысты Кеңестер Одағының түкпір-түкпірінен келген ұлттар мен ұлыстардың құтты мекені. Содан да болар сол бір кездерде өндірісті өлкеміз халықтар достығының ордасы атанды.
Сенбі, 14 қаңтар 2012 8:26
Бұл – Маңғыстаудағы этномәдени бірлестіктер мүшелерінің нық ұстанымдары
Маңғыстау аймағы – 60-жылдары мұнай-газ кен орындарының ашылуына байланысты Кеңестер Одағының түкпір-түкпірінен келген ұлттар мен ұлыстардың құтты мекені. Содан да болар сол бір кездерде өндірісті өлкеміз халықтар достығының ордасы атанды. Алып құрылыстар алаңына айналған аймақта жаңа қалалар пайда болды. Өлкеміз еліміздің негізгі экономикалық аймақтарының бірі бола бастады. Өлкеміздің жұлдызы өрге жүзіп, кемелдене түсуіне ғасырлар бойы күткен ел тәуелсіздігінің шапағатының тигізген әсері ерекше. Соның бірі ел тәуелсіздігінің алғашқы жылдары республикамызда алғашқы болып Ақтауда ұлттар мен ұлыстардың басын біріктіріп, бір мақсат-мүддеге жұмылдыруды көздеген «Халық келісімі» қоғамдық бірлестігінің өмірге келуі болды.
Осы қоғамдық бірлестіктің алғашқы мүшелерінің естерінде қалып, мақтан тұтып жүрер оқиға еліміздің тұңғыш Президенті Нұрсұлтан Назарбаевтың Маңғыстауға жұмыс сапары кезінде бірлестіктің мекен-жайында болып, қолға алған жұмыстарын құптап, ақ жол тілегені. Сонда Елбасы құрметті қонақтар кітабына былай деп жазыпты: «Келісім халықтардың бір-біріне деген сенімі мемлекетіміз үшін баға жетпес байлық. Бірлік болса алға қойған мақсатымыз орындала береді. Бірлестікті құрған азаматтарға алғыс айтамын. Сіздерге сәттілік, бақыт тілеймін. Президент Н.Назарбаев 13.06.1994». Міне, содан бері қоғамдық бірлестіктің құрамындағы этномәдени бірлестіктер саны 7-ден басталып бүгіндері 20-ға жетті. Және де бір қуанарлығы – ол ұлттық орталықтардың саны ғана емес, елге, жас ұрпаққа үлгі-өнеге боларлықтай жұмыстарының сапасы мен мән-мазмұны да жаңа сатыға көтерілді. Әрбір этномәдени бірлестік өз ұлттарының салт-дәстүрін, әдет-ғұрпын, өнерін, мәдениеті мен тілін дамытып қана қоймай, ортақ үйіміз қазақ елінің негізгі халқының салт-дәстүрін тереңірек біліп, өнерін дәріптеп, тілін үйренуде де жүйелі жұмыстарды жүзеге асырып келеді. Баршамыз көріп жүргендей, облыс орталығында өтетін саяси-мәдени мерекелік іс-шараларға этномәдени бірлестіктер белсене араласады. Ол шаралардың сәнін келтіріп, салтанатын асырады. Мысалы, Ақтауда соңғы жылдары өмірге келіп, тұрғындардың, қонақтардың ерекше сезіммен қарсы алып, атап өтіп жүрген «Амал келді, жыл келді» атты наурыз мерекесі өлкеде тұрып өмір сүретін халықтардың ортақ мерекесі болып отыр.
Маңғыстаулықтарға башқұрт халқының «Сабантойы», қырғыздың ұлттық тағамы «сяк-сяк» пен дағыстан халқының ұлттық асхана көрмелеріндегі тәтті тағамдары да жақсы таныс. Әзербайжанның әндері, грузиндердің билері – бәрі-бәрі де ортақ үйдің ортақ қазына, байлығы болып жүр. Сайып келгенде, осының бәрі бірлікке, достыққа, бауырмалдыққа бастайтын, халықтарды жақындастыра түсетін жарқын көріністер емес пе?
Жалпы деректерге қарасақ, Ақтауда алғаш армян этномәдени бірлестігі құрылыпты. Одан кейін «Қазақстан корейлері ассоциациясының» филиалы, «Булгар» атты татар этномәдени бірлестігі, сосын Т.Шевченко атындағы украин этномәдени бірлестігі, «Вайнах» чешен-ингуш, әзербайжанның «Достлуг», башқұрттың «Салават», т.б. этномәдени бірлестіктері өмірге келген. Көптеген этномәдени бірлестіктердің жұмыстарындағы ізгі ізденістер де құптарлық. Олай дейтініміз, олар соңғы кездері өз халықтарының өнерін, мәдениетін ауылдық жерлерде де насихаттап, жергілікті халықтың салт-дәстүрімен жете танысу үшін аудан, қалаларға да барып жүр.
Сондай-ақ кейбір этномәдени бірлестіктер жексенбілік мектептер ашып, онда балаларға өз этносының тілін, мәдениетін, салт-дәстүрімен қатар қазақ тілін оқытуды да қолға алған. Тіл демекші, Ақтауда жыл сайын «Мемлекеттік тіл – өз тілім» атты байқау өткізу дәстүрге айналып, оған қатысушылар саны да өсіп келеді. Ал ол байқауда жоғарыда айтқан жексенбілік мектептер жұмыс істейтін этномәдени бірлестіктердің өкілдері жүлделі орындарды иемденіп жүр. Осы жерде бұл күндері «Халық келісімі» қоғамдық бірлестігінің төрағасы, білікті инженер Ю.Шахшаевтың Дағыстанның ғана емес, әлемнің әйгілі ақындарының бірі Расул Ғамзатовтың «Ертең ана тілім жойылатын болса, мен бүгін өлуге дайынмын» деген сөзін айтып жүретіні бар. Содан болар, ол басқарған этномәдени бірлестік мемлекеттік тілге мән беруде, өзгелерге үлгі болуда. Маңғыстаудағы этномәдени бірлестіктер жайлы айтқанда, «Халық келісімі» қоғамдық бірлестігінің алғашқы төрағасы, елге сыйлы ардагер-аға Жаздырхан Сейдалиевтің көп жылғы еңбегі еске түседі. Ағамыз әлі де қатарда, жастардың ақылшысы, елдің құрметтісі. Сондай-ақ әзербайжан халқының өкілі, аймақ адамдарының сый-құрметіне бөленіп жүрген сексеннің сеңгіріндегі Жамиль Габибов жайлы бірер сөз.
Ол Ақтауға қоныс тепкелі 50 жыл. «Ерен еңбегі үшін» медалімен, «Достық» орденімен марапатталған. Ақтау қаласының құрметті азаматы. Бұл күндері бірлестіктегі ақсақалдар кеңесінің төрағасы. «Байтақ еліміздегі адамдардың пейілі кең, жүректері толы ізгілік пен мейірім. Түрлі ұлт өкілдерінен тұратын халқы тату, ынтымақты өмір сүруде. Бұл – үлкен бақыт. Баршамыздың бақытымыз. Осының бәрін Елбасымыз Нұрсұлтан Назарбаевтың есімімен байланыстырамын. Аллаға шүкір деп балаларым мен немерелеріме осы сөзді қайталап айтып отырамын», – дейді абыз ақсақал. Ұлттық этномәдени бірлестіктер, олардың ұлттар достығы, бірлік пен татулық жолында жасап отырған жұмыстары жайлы сөз болғанда 20 жылдан бері башқұрттың «Салават» атты этномәдени бірлестігін үздіксіз басқарып келе жатқан Қазақстан халқы Ассамблеясының мүшесі М.Байбулатова, корей этномәдени бірлестігінің төрайымы Р.Маденова, Т.Шевченко атындағы украин этномәдени бірлестігінің төрайымы Т.Лесниченко, қырғыздың «Ала-Тоо» этномәдени бірлестігінің төрағасы Құрбанали Ғазибеков, лезгиннің «Самур» этномәдени бірлестігінің төрағасы Гаджи Селимов, чешен-ингуштың «Вайнах» этномәдени бірлестігінің төрағасы М.Лорсанов және басқалардың есімдерін құрметпен атау ләзім.
Мұның себебі бар. Мысалы, Қ.Ғазибеков этномәдени бірлестіктің жұмысын ғана дөңгелентіп отырған жоқ. Ол – білікті агроном ретінде мұнайлы Маңғыстау жерінде бау-бақша өнімдерін өсіруді қолға алған азамат. Ол осыдан 6-7 жыл бұрын бақ егіп, алма, өрік ағаштарын отырғызып, өнім алды. Елді егіншілікке жұмылдырды. Ал соңғы жылдары «Көктем» кәсіпорнына агроном болып орналасып, тәлімбақ өсіруді қолға алды. Бұл күндері Ақтау қаласының көшелері үшін жас шыбықтар, түрлі-түрлі ағаш көшеттері басқа жақтан емес, Құрбаналидің бағынан әкелінуде. Қала мен әуежай аралығындағы жол жиегіндегі ағаштарда да оның қолтаңбасы бар. Аталған бақта гүлдердің де сан түрі мен жеміс ағаштары өсіп келеді. Иә, байқап қараған адам облыстағы этномәдени бірлестіктердің де жұмыстары кең қанат жайып, өз жемісін беруде екендігін анық көреді. Өйткені, көп ұлтты халқымыздың мақсаты, тілегі бір. Арман, мүддесі айқын. Ол – халықтар арасындағы бірлік пен береке.
Облыстағы 20 этномәдени бірлестіктегі жұмыс ел тәуелсіздігінің 20 жылдығын атап өткен жылы ерекше есте қаларлықтай болды. Тәуелсіздігіміздің мән-маңызын, қадір-қасиетін халыққа тереңдете түсіндіру ниетімен өткен іс-шаралар көпшілік көңілінен шықты. Ең негізгісі Елбасының: «Көп ұлтты ел болуымыз – біздің баға жетпес байлығымыз, мақтанышымыз», деген аталы сөзі бағдар болды. Игілікті іс-шаралардың арқауына айналды. «Ортақ үйіміз – Қазақстанда тұратын барлық ұлттар мен ұлыстар бірлігін, достығын, татулығын тереңдету жолындағы жұмыс әлі де жалғаса береді. Өйткені, біздің басты мақсатымыз – бірлік пен береке, – дейді облыстық Қазақстан халқы Ассамблеясы хатшылығының меңгерушісі М.Камалов.
Иә, бақыт та ырысты, ынтымағы ұйыған жерде болады. Оны Ақтаудағы этномәдени бірлестіктер мүшелері жүректерімен ұғып, игілікті істерімен дәлелдеп келеді.
Жоламан БОШАЛАҚ.
Ақтау.