Бүгінгі таңда елімізде партияның 1 миллионнан астам мүшесі бар. Бұл дегеніңіз үлкен күш. Партия құрылғалы бергі уақыттың ішінде елімізде елеулі өзгерістер орын алды. Алайда, мәселесіз қоғам болуы мүмкін емес. Бұл орайда «Нұр Отан» партиясы халықтың талап-тілегіне де құлақ асып, әрбір мәселенің оң шешілуіне атсалысып келеді. Партия әрбір кезеңде өз бағдарламасын қабылдап, оның орындалуына жоғары деңгейде мән беріп отыр. Таяуда Елбасының қатысуымен Астана қаласында өтетін партияның съезінде бас партия 2030 жылға дейінгі өз бағдарламасын қабылдайды. Бұл еліміз үшін жауапты кезең. Ал партия жарғысына өзгерістер мен толықтырулар енгізудегі басты мақсат – Елбасы Жолдауында айтылғандай, азаматтардың әл-ауқатын арттыру. Қазіргі кезде елімізде Елбасы Жолдауында айтылған жалақы көлемін арттыру, тұрғын үй, жастар мәселесі сияқты басым бағыттар жүзеге асып келеді. Тек қана жеткен жетістікпен өмір сүрмей, әрі қарай да үлкен мақсат керек. Сапалы түрде өзгеру қажет. Әлі де болса ел ішінде шешілмеген мәселелер бар. Міне, «Нұр Отан» партиясының жарғысына өзгерістер мен толықтырулар енгізумен бірге түрлі мәселелердің де шешімі табылады.
Бүгінгі таңда «Қазфосфат» жауапкершілігі шектеулі серіктестігінде 6200 адам жұмыс істейтін болса, оның 2163-і «Нұр Отан» партиясының мүшелері. Бір қуантарлығы, бұлардың көбі жастар. Бізге қарасты зауыттарда да партияның бастауыш ұйымдары бар. Ұйымдардың жұмысы да өндіріске үлкен үлес қосуда. Өзім де «Нұр Отан» партиясы Саяси кеңесінің мүшесі ретінде қоғамдық жұмыстарға араласамын. Елбасының Жолдауында айтылғандай, біз де еңбек өнімділігін және өндіріс көлемін жыл сайын 20 пайызға арттырып отырмыз. Мәселен, өткен жылы кәсіпорында 112 миллиард теңгенің өнімі өндірілсе, бұл көрсеткішті биыл 130-140 миллион теңгеге жеткізуді жоспарлап отырмыз. Бұл арқылы да халықтың әл-ауқаты артып, әлеуметтік жағдайы жақсара түседі.
Мұқаш ЕСКЕНДІРОВ,
«Нұр Отан» партиясы Саяси кеңесінің мүшесі, «Қазфосфат» ЖШС бас директоры, Қазақстанның Еңбек Ері
Жамбыл облысы