01 Наурыз, 2019

Ел бірлігін нығайтатын мейрам

325 реткөрсетілді

Елбасы Нұрсұлтан Назарбаевтың қабылдаған шешімдерінің негізінде бекітілген жалпыхалықтық мерекелеріміздің қоғамдағы орны ерекше. Олардың ел-жұртымыздың болашаққа деген сенімін арттыру, ел ынтымағын нығайту, барлық жетістіктеріміздің бастауында тұрған қоғамдық келісім мен татулықты дамыту ісіне тигізер оң әсерін жоққа шығара алмаймыз.

Осы орайда Елбасының 2016 жылдың 14 қаңтарындағы Жарлығымен тағайындалған, елі­міз осымен төртінші рет тойлағалы отырған, ә дегеннен өзіне халық­тың ықыласын арттырып, өзге ұлық мейрамдардың қатарынан лайықты орнын тапқан, 1 наурыз – Алғыс айту күні мерекесінің маңызы зор.

Алғыс айту күні қоға­мы­мыз жылы қабылдаған, жалпы­ха­лық­тық сипатқа ие болып, аз ғана уақыттың ішінде өзіндік орнын қалыптастыра білген айтулы мерекелердің біріне айналды. 

Негізінен, бұл мейрамды атап өтудегі басты мақсат – түрлі тарихи жағдайлар себебімен елімізге қоныс аударылған этностар өкілдеріне кезінде өздеріне кө­мек қолын созған, арып-ашып жеткенде жатырқамай бауыры­на басқан қазақ ұлтына, қазақ даласына құрмет көрсетіп, риза­шы­лықтарын білдіруіне мемле­кет­тік деңгейде, кең ауқымда мүм­кіндік беру. Бұл елішілік үйлесімнің, қазақстандық түрлі этностардың ұлтымызға деген сый-құрметінің арта түсуіне оң әсерін тигізеді. 

Сонымен қатар Алғыс айту күні қоғамдық келісімді нығайту бағы­тындағы мемлекеттік саясат­тың ішкі мазмұнын аша түсіп қана қоймай, қоғам мүшелерін өзара сый­ластыққа, өзара көмекке, қайы­рымдылық істерге үндейді әрі отаншылдыққа тәрбиелеуді көздейді.

Осы орайда Мемлекет басшысының 2016 жылдың 1 наурызында өткен Ал­ғыс айту күнінің алғашқы салтанатты жиы­нында: «Алғыс айту күні – енді ұлттық күнтізбедегі Еңбек күні, Отбасы күні сияқ­ты өзге де мерекелердің қатарындағы жаңа дата. Мен бұл мереке қазіргі уақытта аса қажет біздің қоғамдағы сенімді, келі­сім мен достықты бұрынғыдан да ны­ғайта түсетініне сенімдімін», деген сөзі ойға оралады.

Жалпы, осы мерекені атап өту кезінде қазақтың жомарттығы, қонақжайлылығы, қайырымдылығы мен кең пейілі барша қазақстандықтардың жадында қайта жаң­ғырады. Бұл өз кезегінде қазақ ұл­тының мерейін асыратыны анық.

Еліміздегі түрлі этнос өкілдерінің ара­сындағы саяси қуғын-сүргін жылдарының куәгерлері мен олардың ұрпақтары қазақ халқының өздеріне жасаған қамқорлығын әркез тебірене еске алады. Бұған Алғыс айту күні мерекесінің Астанада өткен ал­ғашқы алқалы жиынында Мемлекет басшысының: «Олар кезінде өздеріне де оңай болмағанына қарамастан, қазақ­тардың қайырымдылығы үшін, сол кез­дегі тыйымдарға қарамастан, батыл әрі риясыз көмегі үшін алғыс айтады. Қа­зақ­тар да бауырластарға туған өлкеге деген сүйіспеншілігі үшін, жеріміздің түр­ленуіне қосқан үлесі үшін, ұлттық мәдениетке, тілге және дәстүрге деген құрметтері үшін алғыс білдіреді», деп айтқан сөзі дәлел. 

Патшалық Ресей тұсындағы Столыпин реформасы кезінде Қазақстанға Ресей, Беларусь және Украинадан 1 мил­лион­нан астам адам қоныс аударуы елі­міздің ХХ ғасырда көпэтносты ел болып қалыптасуын бастап берді. Ал өт­кен ғасырдың 30-шы жылдарындағы ұжым­дастыру кезінде бұрынғы КСРО-ның көптеген өңірлерінен 250 мың шаруа Қа­зақ­станға жер аударылды. Бұлардан бөлек, осы кезеңдерде өнеркәсіп сала­сын­дағы құрылыстарды жүргізу үшін 1,2 миллион адам келді. Сол сияқты, Ста­лин режімінің ықпалымен 800 мыңға жуық неміс, 102 мыңдай поляк, Солтүстік Кавказ халықтарының 500 мыңнан астам өкілі, 18,5 мың корей отбасы елімізге жер аударылған. Қазақ даласына жүк ва­гондарымен, әскери көліктермен аш құрсақ, арып-ашып жеткен оларға жер­гілікті қазақтар бар мүмкіндігінше кө­мек­тесті.

Бұған қосымша, сталиндік қуғын-сүр­гін кезінде Қазақстандағы жазалау лагерь­леріне қамалған мыңдаған тұтқындар, Екінші дүниежүзілік соғыс кезінде елі­мізге эвакуацияланған 350 мың жан, ХХ ғасырдың орта тұсында тың игеруге келген 1,5 миллион адам, әскери нысандарда өзге аймақтардан келіп жұмыс істеген 150 мың маман елімізде тұрақтап қалды. 

Қазақ халқы елімізге қоныс аударыл­ғандардың ешқандай кінәсі жоқ екенін түсіне білді. Осы түсінік қазақтардың өз­ге этностарға деген ықыласын еселеп арт­тырды. 

Міне, бұл жоғарыда сөз болған та­ри­хи жағдайлардың барлығын бүгінгі және келер ұрпақ білуі тиіс. Осы орай­да ынтымақ пен бірлікті ту етіп алға басып келе жатқан көпэтносты Қазақ­стан­ның тұрақтылығын, орнықты да­муын қамтамасыз ету бағытындағы жұ­мыстарды қолға алғанда Елбасының «Эт­ностық алуандылық – біздің елдің әлсіз тұсы емес, оның байлығы», деген сө­зін басшылыққа алуымыз қажет. Сон­дай-ақ Қазақстанның халықаралық аре­надағы беделін арттыру, әлем мемле­кеттерімен екіжақты және көпжақты ынтымақтастықты нығайту бағытындағы мақсатты шараларды жүзеге асыру ба­ры­сында еліміздегі түрлі этностарды «алтын көпір» ретінде қарастыру ісі маңызды деп ойлаймыз. 

Қорыта айтқанда, Алғыс айту күні ел мүддесінің, ел тілегінің бір ортақ ар­на­да тоғысуының қаншалықты мәнге ие екенін ұқтыра түсетін мереке. Оның негі­зінде халқымызды біріктіруші күш, өзара құрмет пен сыйластыққа ша­қы­ратын ізгілік иірімдері жатыр. Оның үс­тіне, бұл мейрамда Абай атамыздың: «Адам­заттың бәрін сүй, бауырым деп...» деген өсиетіне адалдық танытқан қазақ ұлтының өзге этнос өкілдеріне көрсеткен қайырымдылығы, қамқорлығы, оларды өзі жетісіп отырмаса да шеттетпей, ба­уырына басқаны қоғам санасында қайта жаңғырып, жүректі қозғайды.

Жолдыбай БАЗАР,

«Egemen Qazaqstan»

Соңғы жаңалықтар

Ұқсас жаңалықтар