Дәрігердің жауапкершілігін еселеп арттырады

«Нұр Отан» партиясының кезекті XVIII съезінде еліміздің денсаулық сақтау саласын дамы­туға қатысты жауапты мін­дет пен нақты тапсырма жүк­тел­ді. Мем­лекет басшысы Нұр­сұл­тан Назарбаев атап айт­қан­дай, ме­дицина саласына бөлін­етін қо­сымша қаржы ұлтымыз­дың ден­саулығын сақтауға қызмет етіп, саламатты ұрпақ қалыптастыруға жұмсалуы тиіс.

Анығында, «Отандық медицина, ең алдымен, профилактика мен саламатты өмір салтын ын­таландыруды бағдар еткені жөн. Қоғамдық денсаулық сақ­тау қызметі мен бастапқы меди­ци­налық-санитарлық көмек шы­ғыс­тары денсаулық сақтау­ды қар­жы­ландырудың жалпы көле­мінде 40-тан 60 пайызға дейін ұлғайтылуы тиіс. Бұл – әлемдегі барлық дамыған елдің тәжірибесі. Денсаулық сақтау саласын дамытуға қосымша 120 миллиард теңге бөлуді тапсырамын», деген Елбасы сөзі барлық әріптесіме өзіміз таңдаған қыз­мет­тік саламызды қолдау ғана емес, дәрігердің парызы мен жауапкершілігін де еселеп арттыруды міндеттейді. 

Рас, адам жанына араша тұру дәрігердің кәсіби пары­зы болғанымен, қазіргі заман­ғы техниканың дамуы медицина үшін арқа сүйейтін маңыз­ды бөлікке айналды. Яғни, да­мы­ған технология дертті дер кезінде анықтауға, күрделі ота жасаудағы дәлдікті қамтамасыз етуге таптырмас көмекшінің орнын басты. Демек, біздің қызметіміз әрдайым осы құрал-жабдықпен тығыз байланыста бола бермек. Осы орайда біздің Алматы облысындағы денсау­лық сақтау саласының жұмысы­на көз жүгіртіп, атқарылған іске тоқтала кеткен орынды. Бүгінгі аймақтағы емханаларды қажетті құрал-жабдықпен қамту жұмысы оң бағытта жүріп жатыр. Өңірде медициналық жабдықтар­мен қамтамасыз ету деңгейі 83 па­йызға дейін жетті. Оның ішінде науқасқа бірінші қол ұшын созатын жедел жәрдем қызметіне ерекше жағдай жасалуда, яғни санитарлық автокөлікпен қамту 78 пайызға дейін артты. 
Қазіргі күні денсаулық са­ла­­­сының жұмысын цифр­лы бағыт­қа көшіру мамандар үшін де, тұр­ғын­дар үшін де тиім­ді болып отыр. Осы бағытта ай­мақ­та «Жеті­су» медициналық ақ­па­рат­­тық жүйесі енгізілуде. Бұл бо­­йын­ша тұрғындар қажетті сұ­рақ­­тары мен керекті қызметті мо­бил­ь­ді қосымшалар арқылы алу­ға қол жеткізеді. Дәрігер қабыл­дауы­на жазылу, қажетті маман ке­ңе­сі, аурухана кезегі сияқты қыз­мет­тер оңтайланып, науқасқа қо­лай­лы жағдай туды. Осы жерде азаматтарды «Электронды ден­саулық паспортымен» қамту тура­лы айтқан жөн. Қазір облыс тұрғындарының 83 пайызын­да бұл құжат бар. Ал медицина ме­ке­ме­лері­нің 53 пайызы қағаз­сыз құ­жат айналымына өтті.

Өңірдегі адам денсаулығын қорғауға бағытталған шараның ма­ңыз­дысы, медициналық қыз­мет көр­сететін емхана мен ауруха­на­лардың тиімділігін арттыру болып отыр. Өкінішке қарай, көп ауданда мекеме ғимараттары ес­кір­ген, орын жетіспеушілігі бар. Қуа­ныш­тысы, облыс әкімдігі бұл мәселені шешуді қолға алды. Өткен жылы облыс бойынша ден­саулық сақтау саласында 15 ны­сан жаңадан салынды. Биыл тағы 12 нысанның құры­лы­сы аяқталмақ. Әсіресе аудан ор­та­лық­тарындағы ауруха­на­­лардың күр­делі жөндеуден өтіп, жаңа ғи­маратқа көшуі дәрігерлердің жұ­мысына жәрдем беріп, ем-дом сапасын арттыратыны анық. 

Негізі, жақсы сөзді көп айт­қан дұрыс. Мен өткен жылы әріптестерімнің кәсіби қызметі­нің арқасында облыстағы жалпы өлім-жітім көрсеткішінің 3,6 пайызға азайғанын атап кеткім келеді. Бұл мемлекетіміздің медицина саласына жасаған қолдауы мен ақ желеңді жандардың жұмыс сапасына маңыз беруінің айқын көрінісі. Ал «Нұр Отан» пар­тия­сының кезекті XVIII съезінд­е денсаулық сақтау саласын дамы­туға қатысты Елбасы бер­ген тапсырма осы жұмысты ши­ра­тып, одан әрі жандандыра түседі.

Өмірзақ НИЗБЕКОВ,

Алматы облыстық Денсаулық сақтау басқармасы басшысының орынбасары

ТАЛДЫҚОРҒАН