Иран БҰҰ-дан күмәнданады
Сенбі, 21 қаңтар 2012 7:42
Иранның ядрошы-ғалымы Мостафа Ахмади Рошанды өлтірушілерге БҰҰ-дан алынған ақпараттың көмегі тиген болуы мүмкін.
Бұл туралы Иранның БҰҰ-дағы тұрақты өкілінің орынбасары Эшага әл-Хабибтің мәлімдемесіне сілтеме жасай отырып, Рейтер агенттігі хабарлаған. Әл-Хабибтің айтуынша, қанішер БҰҰ Қауіпсіздік Кеңесі мен Халықаралық атом энергетикасы жөніндегі агенттіктің мәліметтер базасындағы ақпараттарға қол жеткізген. Оның айтуынша, халықаралық ұйымдар Иранда жүргізілген инспекцияның мәліметтерін құпия түрде сақтай алмай отыр.
Сенбі, 21 қаңтар 2012 7:42
Иранның ядрошы-ғалымы Мостафа Ахмади Рошанды өлтірушілерге БҰҰ-дан алынған ақпараттың көмегі тиген болуы мүмкін.
Бұл туралы Иранның БҰҰ-дағы тұрақты өкілінің орынбасары Эшага әл-Хабибтің мәлімдемесіне сілтеме жасай отырып, Рейтер агенттігі хабарлаған. Әл-Хабибтің айтуынша, қанішер БҰҰ Қауіпсіздік Кеңесі мен Халықаралық атом энергетикасы жөніндегі агенттіктің мәліметтер базасындағы ақпараттарға қол жеткізген. Оның айтуынша, халықаралық ұйымдар Иранда жүргізілген инспекцияның мәліметтерін құпия түрде сақтай алмай отыр.
АУҒАНСТАНДАҒЫ ТІКҰШАҚ АПАТЫ
Ауғанстанда НАТО контингентіне қарасты тікұшақ апатқа ұшырап, соның салдарынан алты әскери қызметші қаза тапқан.
Оқиға елдің оңтүстігіндегі Гильменд провинциясында орын алған. Қарулы күштер қолбасшылығы әзірге тікұшақтың апатқа ұшырау себептерін, сол сияқты қаза тапқан солдаттардың қай ұлттан екенін айтудан бас тартқан көрінеді. Сонымен бірге 20 қаңтар күні тікұшақ құлаған ауданда заңсыз қарулы құрылымдар мүшелерінің белсенділігінің байқалмағаны да белгілі болып отыр.
ПЕРРИ БӘСЕКЕДЕН БАС ТАРТТЫ
Техас штатының губернаторы Рик Перри республикалық партия атынан АҚШ президенттігіне кандидаттыққа ұсынылу құқы жолындағы күрестен бас тартты.
Оңтүстік Королинада өткен баспасөз мәслихатында осы жөнінде ресми мәлімдеме жасай отырып, Перри өзінің республикалық партиядан түсетін келесі кандидат Ньют Гингричке қолдау көрсететінін хабарлаған. Өткен жылдың тамызында өз кандидатурасын ұсынғысы келетін ниетін білдірген кезде Перри өзге үміткер-республикалықтар арасынан аз уақытқа болса да қара үзіп шыққан болатын. Бірақ халық алдында сөйлеген сөздерінің әлсіздігі оның танымалдығының құлдырап кетуіне әкеліп соқтырды.
ПАЛЕСТИНА ТӘУЕЛСІЗДІГІН МОЙЫНДАДЫ
Таиландтың БҰҰ-дағы миссиясы Палестинаның тәуелсіздігін мойындайтынын мәлімдеген.
Палестина мемлекеті 1967 жылғы шекаралары бойынша мойындалып отыр, олай болса оның құрамына Иерусалим ғана емес, сонымен бірге израильдік елді мекендер бар аумақтар да кіруге тиіс. Палестина сыртқы істер министрі Рияд әл-Малики Бангкок ел тәуелсіздігін 131-ші болып мойындады деп мәлімдеген. Осыған дейін Палестинаны ең соңғы мойындаған ел Исландия болатын.
ЗАҢ ЖОБАСЫНАН КІНӘРАТ ТАБЫЛДЫ
Франция сенатының комиссиясы басым дауыспен армян геноцидін жоққа шығарғаны үшін жауапкершілік енгізуді қарастыратын заң жобасы конституцияға қайшы келеді деп есептейді.
Заңнама жөніндегі комиссия жетекшісі Жан-Пьер Сюэрдің айтуынша, егер заңды сенат қабылданған жағдайда оның азаматтардың, сөз еркіндігін қоса алғандағы, конституциялық құқыларын бұрмалау қаупі мол. Түркияда сенат комиссиясының ұстанымы жоғары бағаланып отыр. Айта кету керек, аталған заң жобасы бойынша дауыс беру 23 қаңтар күні өтетін болады. Бұған дейін, яғни 2011 жылдың 22 желтоқсанында заң жобасын ел парламентінің төменгі палатасы қуаттаған болатын.
ТЫҢШЫЛЫҒЫ ҮШІН ЕЛДЕН ҚУЫЛДЫ
Ресей мен Канада арасында тұтанған тыңшыларға қатысты жанжалдың соңы екі ресейлік дипломаттың Оттавадан шығарылуына апарып соқтырды.
Канада арнайы қызметінің пайымдауына қарағанда, Ресей елшілігінің қызметкерлері таяуда ғана орыс агенттеріне құпия мәліметтер беру кезінде ұсталған әскери-теңіз барлау қызметінің лейтенантымен байланыста болған. Ресей елшілігінің төрт қызметкері отанына қайтарылып отыр. Олардың арасында атташе Константин Колпаков пен әскери атташе, подполковник Дмитрий Федорчатенко бар. Ал қалған екеуі техникалық қызметкерлер.
СОЛТҮСТІК ИРЛАНДИЯДАҒЫ ЖАРЫЛЫС
Солтүстік Ирландияның Лондондерри қаласының орталығында екі бірдей жарылыс болды.
Би-Би-Си таратқан мәліметтерге қарағанда, бір бомба ірі сауда орталығының жанында, екіншісі мемлекеттік ғимараттар кешені маңайында жарылған. Төтенше оқиға салдарынан зардап шеккендер жоқ. Екі сағат бұрын террорлық акт болатыны туралы хабар алған полиция халықты қауіпті жерден көшіріп үлгерген. Қазіргі уақытта бірде-бір ұйым теракт үшін жауапкершілікті өз мойындарына алмай отыр.
ЛОББИШІЛЕР ДЕ ТІРКЕЛУДЕН ӨТЕДІ
«Дэйли телеграф» басылымының хабарлауынша, Ұлыбритания өкіметі лоббишілер үшін арнайы тіркелу енгізуді жоспарлап отыр.
Басылым қолына түскен құжатта келтірілгендей, «лоббиші» сөзі кең мағынаға ие болған көрінеді. Кәсіподақтар, қайырымдылық ұйымдары, түрлі қысым жасау топтары мен сараптама орталықтары осы ұғымға енгізілген. Тіркелуден өткеннен кейін оларға өздерінің қаржыландырылу көздерін ашуларына тура келеді. Дәстүрлі мағынадағы лоббишіге келсек, олар өз клиенттерінің аты-жөндерін жариялауға мәжбүр болмақшы. Ал тіркелуден бас тарту елеулі айыппұлмен немесе тіпті түрмеде қамау жолымен жазаланатын болады.
Интернет материалдары негізінде әзірленді.