Қазақстан • 04 Наурыз, 2019

Қарағандыға қара қасқырды сыйға тартты

1485 реткөрсетілді

Қарағандының хайуанаттар бағы канадалық қара қасқырмен және маймылдың ергежейлі игрунка деген түрімен толықты. Бұлардың екеуі де Ресейдің Новосібір қаласынан жеткізілген: қасқырды жергілікті хайуанаттар бағы сыйға тартса, маймыл сатып алынды.

Қарағандыдағы хайуанаттар бағында Виля есімді ұрғашы ингрунка бар екен. Ол сегіз жылға жуық уақыт жалғыз өзі өмір сүріп келген. Енді оның Новосібірден келген Мигель есімді досы пайда болды.

 – Мигельдің жасы бірге толды, өзі өте ширақ. Екіге толғанында жыныстық қабілеті дами бастайды. Сәтін салса, бұлардан ұрпақ аламыз ба деген ойымыз бар, – дейді маймыл және аквариум залы бөлімінің меңгерушісі Елена Морозова.

 Жалпы, маймылдың бұл түрі Бразилияда мекен етеді екен. Он беске дейін маймылдан тұратын үйірде бір ғана жұп өмірге ұрпақ әкелетін көрінеді. Бұл маймылдың балалары үш айға дейін сүтпен қоректеніп, одан кейін барып құрт-құмырсқаға көшеді, дейді мамандар.

Канада қара қасқырының сыйға келген ұрғашысы осындағы хайуанаттар бағын жеті жыл жалғыз мекен еткен тұқымдасымен одақ құрды. Екеуінің қазір жұбы жазылмайды. Бұлар да өмірге ұрпақ әкеледі деген үміттегі хайуанаттар бағы қызметкерлерінің қуанышында шек жоқ.

 

Қайрат ӘБІЛДА,

«Егемен Қазақстан»

Қарағанды

 

Соңғы жаңалықтар

Ұқсас жаңалықтар