Қазақстан • 05 Наурыз, 2019

Музей мамандарының мәжілісі

813 реткөрсетілді

Еліміздегі музей мекемелерінің тарихында алғаш рет «Қазақстан музейі: жаһандану және ақпараттандыру дәуіріндегі идеялар мен шындықтар» республикалық кәсіби сессиясы Елбасы кітапханасының музейінде өтті. 

 

Алқалы басқосуға еліміздің әр айма­ғы­нан келген, оның ішінде мәдениет басқармасы өкілдері, облыстық, қалалық, аудандық, ауылдық музей мекемелерінің бас­шы­лары, музей саласының сақтаушылары, реставраторлары, өзге де мамандары бар, бас-аяғы 150-ге жуық адам қатысты. Сессияны ашқан Елбасы кітапханасы директорының орынбасары Күләйша Ақтаева музей саласында ақпараттық технологияларды енгізу үрдісіне қатысты маңызды жайттарға тоқталды.

– Мемлекет басшысының «Ұлы даланың жеті қыры» атты мақаласында белгіленгендей, тарихи арте­фак­тілерді зерттеу мен насихаттаудың әдіс­тері музей мекемелерінің дәстүрлі, инновациялық, классикалық, заманауи мақсаттарына негізделеді. Тәуелсіздік дәуі­рінің бірегей тарихи мұрасы, Мем­лекет басшысының жеке қоры шоғыр­ланған мекеме ретінде Елбасы кітап­ха­насы «Н.Назарбаев: дәуір, тұлға, қо­ғам» көшпелі көрме жобасы аясында Қазақстанның бірқатар өңірінде музей, архив, кітапхана салаларының мамандарына арналған кәсіби сессия өткізуді жалғастыруда. Цифрлы жүйеге көшу дәуірінде музей жинақтарының ақпараттық әлеуетін бағаламау мүмкін емес. Музейлер заманауи технологиялар мен бағдарламаларды қолдана отырып, өзіндік мәдени ақпараттық кеңістік қа­лып­тастырады. Музей саласында ақпа­рат­тық технологияларды енгізу үрдісі жәдігер­мен жұмыс істеу әдістерін өз­гер­­тіп қана қоймай, музей жинағын зерттеу мен насихаттау сапасына да әсер етеді, – деді К.Ақтаева. Сонымен қатар Елбасы кітапханасының Музей құндылықтарын есепке алу және сақ­тау қызметінің қызметкерлері өзде­рі­­н­ің баяндамаларында электронды дерек­қорды қалыптастыру, ғылыми-қор жұмыс­тарында ақпараттық ресурстарды қол­дану, музей жинақтарын жүйелеу мен жіктеу және қалпына келтіру жұмыс­та­рын жүргізу бо­йынша өзекті мәселе­лерге тоқталды.

«Open Space» үлгісінде өткен іс-шараға қатысушылар қор ізденісінде қолданылатын ақпараттық ресурстармен танысып, өзара пікір алмасты. 

Ая ӨМІРТАЙ,

«Egemen Qazaqstan»

Соңғы жаңалықтар

Ұқсас жаңалықтар