Оған нақты мысалдар да жоқ емес. Соның бірі ретінде айтар болсақ, Мемлекеттік қызмет істері және сыбайлас жемқорлыққа қарсы іс-қимыл агенттігі өз арасында ондай жұмысты 2017 жылы-ақ бастап кеткен еді. Содан бері, мәселен, 2018 жылы сыбайлас жемқорлық қылмысы үшін қылмыстық жазаға 7 адам тартылған. Оның 5-еуі сыбайлас жемқорлыққа қарсы күрес қызметкері болса, 1-еуі Қарағанды облысы бойынша мемлекеттік қызмет департаментінің қызметкері және 1-еуі Мемлекеттік басқару академиясынан болып отыр. Оны аз десеңіз, қазіргі күні тағы да 7 қызметкердің үстінен сотқа дейінгі тексеріс жүргізіліп жатыр. Мұның бәрі Мемлекеттік қызмет істері және сыбайлас жемқорлыққа қарсы іс-қимыл агенттігінің өз күшімен атқарылуда.
Маңғыстау облысы бойынша ұлттық бюро департаментінің ерекше істер жөніндегі А. атты қызметкері кәсіпкерден 1 млн теңгені сотқа дейінгі тексерісті тоқтатқаны үшін алып жатқан жерінен ішкі қауіпсіздік қызметі күшімен ұсталды. Сол сияқты Түркістан облысы бойынша Ұлттық бюро департаментінің Б. деген тергеушісі 200 мың АҚШ долларын ұрлағаны үшін ұсталып, қамалды. Оның кәмелет жасына толмаған балалары болса да, сот оны ауыр қылмыс жасағаны үшін екі айға қамауға санкция берді. Сыбайлас жемқорлыққа күресте басшылықтың жауаптылығы да артып отыр. Мәселен, Түркістан облысы жедел-тергеу тобының жетекшісі, қарауындағы қызметкердің 5 млн теңге пара алғаны үшін, орнынан босатылды. Мұндай мысалдар көп. Ал егер басшысы қызметкерінің қылмысын өзі ашса, онда ол қылмыстық жауаптылықтан босатылады. Жалпы сыбайлас жемқорларға аяушылық та, рақымшылық та жасалмайды.
Александр ТАСБОЛАТ,
«Egemen Qazaqstan»
