Қазақстан • 08 Наурыз, 2019

Астананың ісмер арулары

906 реткөрсетілді

Астанадағы Мәншүк Мәметова атындағы атақты тігін фабрикасының бүгінгі ізбасары «Астана тігін өнеркәсібі» серіктестігінің шебер қыз-келіншектері де төл мерекелеріне жақсы жетістіктермен жетіп отыр.

Жеңіл өнеркәсіп саласы тұра­лаған тоқсаныншы жыл­дар­дағы қиын-қыстау кезең­дер­де, 2000-жыл­дардан кейін­гі аралықтағы эко­номикалық дағдарыс кезін­де тарап кетуге шақ қалған тігін­ші­лер ұжымы бүгінде қайта түлеген. Елімізде қабылдан­ған «Бизнестің жол картасы» бағдарламасы се­рік­т­ес­тіктің еңсе тіктеп, екінші ты­ны­сын ашуға дем берді деуге бо­лады. Ұзақ жылдан бері осы жерде жұмыс істейтін Ай­гүл Аюпова кетеуі кеткен фаб­ри­ка­ның ұжымын сақтап қалуға бар күш-жігерін жұмсаған жан. Қол қусырып қарап отырса атақты фабриканың жабылып қал­а­т­ы­нына көз жеткізген, на­рық­тық экономиканың талаптарын терең түсіне білген ол өзін кәсіпкерлік қыз­метте сынап көрмек болды. Сөй­тіп, аталған бағдарлама аясын­да не­сиеге ие болып, жеке ша­ңы­­рақ ретінде өз жұмыстарын қай­­та құрды. Осылайша, «Астана тігін өнеркәсібі» атал­ған жаңа серіктестіктің бар жауап­­кер­шілігі тігін өнеркәсібі саласын­да 1991 жыл­дан бері еңбек етіп, едәуір тә­жі­рибе жинақтаған ті­гін­ші келін­шектің мойнына түс­ті. Ауыртпалық та аз болған жоқ.

Ондаған жылдық тарихы бар тігін фабрикасының орнын­да құрыл­ған «Астана тігін өнер­кәсі­бі» 2012 жылдан бастап жұ­­мыс істеп келеді. Түс­кен тапсы­рыс­тар­дың көлеміне байланыс­ты тігін­шілерінің саны өзгеріп отырады. «Астана тігін өнеркәсібі» ата­ла­тын ұжымды қалада орналасқан мем­лекеттік мекемелер мен іскер­лік құры­лым­дар қазір жақсы бі­леді. Серік­тестік олардың тапсырыстарын уақытында талапқа сай орындап, сенім үдесінен шыққан. 

– Прокуратура орган­дары­ның, «Қазақстан темір жолы» АҚ-ның, медицина саласын­дағы «Меди­кер» бірлестігінің, «Апрель» ЖШС, «Астық логис­тика» ЖШС, «Цесна» кор­порациясы және бас­қа да көп­теген ұжымдардан тапсы­рыс ал­дық. Астанада өткен ЭКСПО көр­месіне қатысты тапсырыс­тарды да орындадық. Негізінен мамандандырылған арнаулы қызмет орындарының үлгілік киімдерін, ерлер костюмін, китель, белдемше, пальто, плащ, күрте, комбинезон, көйлек тігеміз. Тікпейтін киіміміз жоқ деуге болады. Соған сай, тапсырыс та аз емес. Дегенмен түйіткіл жоқ деп айта алмаймын. Мәселен, Қазақ­станда әлі күнге дейін отандық сапалы маталар тапшы. Сондықтан матаны Түркия, Ресей, Беларусь, Өзбекстан секілді елдерден қым­­батқа сатып алуға тура келе­ді. Бұл жағдай біздің бәсе­келес­тік қабілетімізге әсер етеді. Жалпы бұл еліміздің тігін өнер­кәсібінің ортақ проблемасы, – дейді Айгүл.

Ұжымда тәжірибелі тігін­шілер еңбек етеді. Олардың ара­сында ісмер Жұмагүл Әмір­шина, Айгүл Сұл­танова, Айгүл Сүлейменова, Гүл­­май­раш Жакина, Еңлік Ра­йым­бекова, есепші Антонина Руд­­новалардың алды еңбек жол­дарын Мәншүк Мәметова атын­дағы тігін фабрикасында 17-18 жас­­тарында бастаған, 30-40 жыл тә­жі­­рибе жинаған, бүкіл өмірін осын­­да өткізіп келе жат­қан жандар.

– Ұжымымыздағы қыз-ке­лін­­шектердің көбі осында тұрақ­ты жұмыс істейді. Біз жұмысты тігін­­ші­леріміздің отбасылық жағ­дайын ескере отырып ұйым­дастырамыз. Жұмысты таңғы тоғызда бастасақ, кешкі бестер шамасында үйлеріне қайтарамыз. Сенбі, жексенбі күн­дері демалады. Әрине, тапсырыс­тар төтенше көбейіп кетсе, кейде сенбі күні де жұмыс істеуге тура келеді, – дейді А.Аюпова. Есесіне тігінші қыз-келіншектердің табысы да көбейе түседі. Тапсырыс көбейгенде тігіншілер саны 70-80 адамға дейін көбейеді, олардың табысы да жаман емес.

Ісмер арулар жиналған меке­менің әлі күнге дейін шешімін таппаған бір мәселесін де айта кетелік. Серіктестік кәсіпорынға қажетті ғимарат мәселесін шеше алмай келеді. Қазіргі жұмыс орны тарлық етеді. Екіншіден, тәжірибелі тігіншілер аз. Демек, еліміздің жеңіл өнеркәсіп сала­сын дамыту үшін тігін өнер­кәсі­бінің осы тектес проблема­лары­на да назар аударған жөн. Мәселен «Жұмыспен қам­ту» бағ­дарламасы аясында тігін­ші­лер даярласа артық болмас еді.

Осылайша, арулардың төл ме­ре­кесі қарсаңында Астананың іс­­мер қыз-келіншектері еңбек ете­­тін кәсіпорынның жұмысын кө­ріп, ісмер қыз-келіншектердің қолы­­нан шыққан көздің жауын ала­тын өнімдеріне тәнті болдық. Он сау­са­ғынан өнер тамған бұл ару­лар өз­дерінің отбасын ғана емес, отан­ның өнеркәсібін де өрге сүй­реу­ге үлес қосып жатқаны анық. 

Сұңғат ӘЛІПБАЙ,

«Egemen Qazaqstan»

Соңғы жаңалықтар

Ұқсас жаңалықтар