Қақтығыс қайта басталды
Сенбі, 14 сәуір 2012 7:17
Сирия мен Түркияның шекарасында Сирия армиясы мен оппозициялық күштердің арасында қарулы қақтығыс жүріп жатыр.
Бұл оқ атуды тоқтату туралы халықаралық келісімнің алғаш рет елеулі түрде бұзылуы болып табылады. Ұлыбританияда орналасқан Сирияның адам құқықтары жөніндегі қадағалаушы кеңесінің мәліметтері бойынша, жанжал шекарадағы Хирбет әл-Джоз елді мекені маңайында туындаған. Сол сияқты олар қақтығыс басталғанға дейін елді мекен аумағына үкімет әскерлерінің танктері енгізілгенін де атап көрсеткен. Өңірде мылтық дауыстары естілгенімен, ауыр артиллериялық атқылаулар мен бомбалаулар туралы хабарлар түспеген көрінеді.
Сенбі, 14 сәуір 2012 7:17
Сирия мен Түркияның шекарасында Сирия армиясы мен оппозициялық күштердің арасында қарулы қақтығыс жүріп жатыр.
Бұл оқ атуды тоқтату туралы халықаралық келісімнің алғаш рет елеулі түрде бұзылуы болып табылады. Ұлыбританияда орналасқан Сирияның адам құқықтары жөніндегі қадағалаушы кеңесінің мәліметтері бойынша, жанжал шекарадағы Хирбет әл-Джоз елді мекені маңайында туындаған. Сол сияқты олар қақтығыс басталғанға дейін елді мекен аумағына үкімет әскерлерінің танктері енгізілгенін де атап көрсеткен. Өңірде мылтық дауыстары естілгенімен, ауыр артиллериялық атқылаулар мен бомбалаулар туралы хабарлар түспеген көрінеді.
ИРАН МӘСЕЛЕСІ ТАЛҚЫЛАНБАҚ
14 сәуірде БҰҰ Қауіпсіздік кеңесінің бес тұрақты мүшесі мен Германия Ыстамбұлда Иранның ядролық проблемасына қатысты келіссөздерді одан әрі жалғастырмақ.
Иранның ядролық проблемасының тағдырын айқындауда тағы бір шешуші кезең туындап отыр. Иран келіссөздерге қатысу арқылы қысым көрсетуді әлсіретіп, ықтимал деген әскери араласудың алдын алғысы келетін тәрізді. Ал АҚШ болса, келіссөздер кезінде Иранға жасалған санкциялар мен қысымдардың қалайша ықпал еткенін көрмек ниетте. Осындай жағдайда Израиль АҚШ-ты Иранға қатысты қатаң позиция ұстануға шақыруда. Ыстамбұлдағы келіссөздің нәтиже береріне сенушілер аз.
ГВИНЕЯ-БИСАУДА ТӨҢКЕРІС БОЛДЫ
Гвинея-Бисау армиясы мемлекет басшысы сайлауының екінші туры қарсаңында әскери төңкеріс жасады.
Әскерилер астананың үлкен бөлігін, билік партиясының штаб-пәтерін басып алып, сондай-ақ ұлттық радио хабарларын тоқтатқан. Премьердің жеке күзеті мен қазіргі билікті жақтайтын әскери бөлімдердің қарсылық көрсетуінен ел премьер-министрінің резиденциясын басып алудың сәті түспеген көрінеді. Соған қарамастан, үкімет басшысы және президент міндетін атқарушы Раймундо Перейраның тағдыры белгісіз күйінде қалып отыр. Ереуілге президенттікке кандидаттардың бірі Кумба Яланың сайлау барысында көптеген бұрмалаушылықтар орын алғаны туралы жасаған мәлімдемесі себепкер болған сыңайлы.
БҰРЫНҒЫ ПРЕМЬЕРЛЕРГЕ ҚАРСЫ ЗАҢ
Египет парламенті елдің экс-президенті Хосни Мубарак аппаратында жұмыс істеген премьер-министрлер мемлекет басшысы лауазымына сайлана алмайды деген заң жобасын қабылдады.
Аталған заң жобасы бұрынғы вице-президент және үстіміздегі жылдың 23-24 мамырында өтетін сайлауда президенттікке кандидат Омар Сулейманға қарсы бағытталған көрінеді. Бұл заң жобасы Х.Мубарактың үкіметінде соңғы он жыл ішінде қызмет істеген кез келген премьер-министрге қатысты болмақ. Египетті басқарып тұрған әскери кеңес парламент ұсынысын қуаттаған жағдайда О.Сулейман сайлауға түсе алмайтын болады.
ЭКС-ПРЕЗИДЕНТ ТҰТҚЫНҒА АЛЫНДЫ
Моңғолия өкіметі елдің бұрынғы президенті Намбарын Энхбаярды қамауға алу жөнінен арнайы операция өткізді.
Моңғолияның бұрынғы басшысына жаппай тәртіпсіздіктер мен жемқорлыққа қатысы бар деген айып тағылып отыр. Арнаулы бөлімдер бұрынғы мемлекет басшысының қарсылығын тойтарып, оны тұтқынға алған. Ал Энхбаярдың өзі болса, өз атына тағылған айыптардың саяси астары бар деп есептейді. 2005-2009 жылдары билікте болған Энхбаяр 2008 жылы Улан-Баторда орын алған тәртіпсіздіктерге байланысты тұтқындалып отыр.
ЗІЛЗАЛАНЫ ПАЙДАЛАНЫП, ТҮРМЕДЕН ҚАШҚАН
Индонезияда орын алған жер сілкінісінен кейін ондаған қылмыскерлер түрмеден қашып шыққан.
Кейбір ақпараттарға қарағанда, Суматра аралындағы Ачех қаласындағы түрмеден кем дегенде 32 сотталушы заңсыз қашып кеткен. Түрме басшылығы зілзала мен цунами қаупіне байланысты жасалған дабылға орай 221 тұтқынды өзге жерге көшірген көрінеді. Түрмеден қашқан 63 қылмыскер осындай қолайлы сәтті пайдаланған. Кейінірек 13 адам өз еріктерімен түрмеге оралса, тағы 18 адамды полиция қызметкерлері ұстаған. Қазіргі уақытта 32 адамның қашып жүргені белгілі болып отыр. Дегенмен, округ полициясының басшысы қашқындардың қай жерде жасырынып жүргендігін білетінін мәлімдеген.
КОРЕЯ МЕРЕКЕГЕ ДАЙЫНДАЛУДА
Зымыран ұшырудың сәтсіз аяқталғанына қарамастан, КХДР Ким Ир Сеннің 100 жылдығын атап өтетін болады.
Радио және телеарналар арқылы берілген «Кванменсон-3» спутнигінің сәтсіз ұшырылғаны туралы хабарлар ел астанасындағы ахуалға онша әсер ете қоймаған сыңайлы. Мұнда Ким Ир Сеннің туғанына 100 жыл толу мерекесін 15 сәуір күні атап өту үшін қызу дайындықтар жүруде. Қаланың орталық алаңында, арасында студенттер мен мектеп оқушылары бар, мыңдаған жастар мереке күні көрсетілетін шеруге әзірліктерін одан әрі шыңдау үстінде. Ресми емес мәліметтерге қарағанда, осы күні алаңда әскери парад өтпекші.
Интернет материалдары негізінде әзірленді.
