12 Наурыз, 2019

Зайсанда 130 шақырымдық бәйге өтті

2286 реткөрсетілді

Осыдан бірер күн бұрын Зайсан ауданында өзгеше ат жарысы өтті. Өзгешелігі сол, жүйріктер бұл жолы 130 шақырымдық бәйгеге қосылды. Сайысты ұйымдастырушылардың бірі Қайрат Тоқтасынұлы мұндай бәйге елімізде бұрын-соңды өтпегенін айтады. «Шабандоз мәреге шауып жете ме, желіп немесе аяңдап өте ме – ерік өздерінде. Ең бастысы, 130 шақырымды тоқтамай жүріп өту және озу. Жарыста шабандоз ауыстыруға болмайды. Ат пен шабандоздың бірі шаршап қалса, бәйгеден шеттетіледі. Біз жарысқа осындай талап қойдық. Бас жүлдеге 1 миллион теңге тігілді»,  дейді атқұмар азамат.

Еліміздің түкпір-түкпірінен 33 жүйрік қатысқан бәйге таңғы сағат 7.45-те Зайсанның Сәтпай ауы­лы­нан басталып, сәйгүліктер «Май­қап­шағай-Омбы» жолының бойымен Тарбағатай ауданының Байтоғас ауы­лына дейін тізгінді босатып, кері қайтыпты. Жуан­ның жіңішкеріп, жіңішкенің үзілетін шағында 130 шақырымға шабу оңай ма? Жарыс барысында жолай бір аттың сырғасы тайып, бірі аяғын інге тығып, бірнеше қыл құйрықты сайысты мезгілінен бұрын аяқтауға мәжбүр болды. Со­ны­мен, бәйге қорытындысында 130 ша­қырымды 6 сағат 38 минутта жүріп өткен Катонқарағай ауданының жүй­рігі «Тарпаң» 1-орынды иеленіп, ие­сіне 1 миллион теңгенің жүлдесін тарту етті. Бұдан кейінгі екі орынды да Төр Алтайдың сәйгүліктері қан­жығаларына байлады. Төртінші орын Аягөз ауданына бұйырса, 5,6,7-орындар Зайсан ауданының өзін­­де қалды. Жүз отыз шақырымда бас жүлде алған тұл­пардың иесі Ерболат Тоқсанов аты жылқы ішінде бос жүргенін, бұрын-соңды бәйгеге түс­пе­генін, жартылай асыл тұқымды екен­­дігін айтады. «Шабандозы – Сергей Рыбин деген жұмысшым. 15 жасынан бері менің жанымда мал бағып, ат баптап келеді. Қазір жасы – 28-де. Осы «Тарпаңды» бәйгеге да­йын­даған да өзі. Таңдауы теріс бол­ма­ған сияқты», дейді Ерболат Тоқсанов.

Азамат ҚАСЫМ,

«Egemen Qazaqstan»

Шығыс Қазақстан облысы, Зайсан ауданы

Соңғы жаңалықтар

Басылым басшылары - Ұзақ БАҒАЕВ (1930-1973)

Басылым басшылары • Кеше

Ұқсас жаңалықтар