Қазақстан • 21 Наурыз, 2019

Наурыз мейрамын ЮНЕСКО-да атап өтті

631 реткөрсетілді

Білім, ғылым және мәдениет мәселелері жөніндегі Біріккен Ұлттар Ұйымының (ЮНЕСКО) Франция астанасындағы бас пәтерінде өткен арнайы салтанатты іс-шараға қатысқандардың пікірінше көктем мен жаңару мейрамы ретінде Наурыз күллі адамзатқа жақын құндылықтарды ұлықтайды. Бұл туралы Сыртқы істер министрлігінің баспасөз қызметі xабарлады. 

Мерекелі күннің қарсаңында жыл сайын ұйымдастырылатын дәстүрлі дипломатиялық қабылдауға ЮНЕСКО басшылығы мен мүше мемлекеттердің Ұйым жанындағы тұрақты өкілдіктері, ғылыми және шығармашылық орталардың, Наурызды атап өтетін халықтардың Франциядағы диаспораларының өкілдері қатысты.

Іс-шараға ЮНЕСКО-ның Бас директоры Одрэ Азуле қатысып, баршаны Наурыз мерекесімен жылы құттықтады және бұл тамаша мейрам күллі адамзаттың ортақ мәдени құндылығы екендігін атап өтті.

Іс-шараға жиналғандардың назарына Наурызды мерекелейтін елдердің дәстүрлі өнерлері мен ұлттық тағамдары ұсынылды.

«Франциядағы Қазақстан достарының жастар қауымдастығына» (Jeune Alliance des Amis du Kazakhstan en France) мүше отандастарымыз қазақтың дәстүрлі би өнерімен тамсандырды. Ал қазақ дастарханынан қонақтар бауырсақ, қазы, манты, құрт, жент және, әлбетте, Наурыз көжеден дәм татты.

Естеріңізге салсақ, Біріккен Ұлттар Ұйымының Бас Ассамблеясы 2010 жылы қабылдаған 64/253 қарарына сәйкес жыл сайын 21 наурызда бүкіл әлем Халықаралық Наурыз күнін атап өтеді. Ал ЮНЕСКО-да Наурызды мерекелеу дәстүрі Ауғанстан, Әзербайжан, Ирак, Иран, Қазақстан, Қырғызстан, Өзбекстан, Пәкістан, Тәжікстан, Түркия, Түрікменстан және Үндістанның ортақ ұсынысымен Адамзаттың материалдық емес мәдени мұрасының Репрезентативтік тізіміне енгізілді.

Баннер
Соңғы жаңалықтар

Петропавлда екі зауыт салынады

Аймақтар • Бүгін, 10:03

Ұқсас жаңалықтар