25 Наурыз, 2019

Іріктеу кезеңін ірі жеңіспен бастады

498 реткөрсетілді

Футболдан Қазақстан ұлттық құрамасы футболдан 2020 жылғы Еуропа чемпионатының іріктеу кезеңін жеңіспен бастады. Елордадағы «Астана Арена» стадионында өткен кездесуде жерлестеріміз ФИФА рейтингінде 40-орында тұрған Шотландия құрамасын 3:0 есебімен тізе бүктірді. 

Бұл кездесу ұлттық құрама және жаңадан тағайындалған бас бапкер Михал Билек үшін ресми кездесудегі алғашқы ойыны еді. Яғни, футболшылар мен жаңа жаттықтырушының нағыз сыналатын сәті. 2019 жылдың басында бас бапкер болып тағайындалған чех маманы ақпан айында Түркияда Молдова құрамасына қарсы жолдастық кездесу өткізіп, ұлттық құрама футболшыларын бір тексеріп алған-ды. Билек еліміздің бас құрамасын бұған дейін басқарған жаттықтырушыларға қарағанда аз уақыттың ішінде ресми кездесу өткізсе де, ТОП-50 құраманың қатарындағы команданы жеңді.

Шотландияға қарсы кездесу ал­дын­да Михал Билек журналистермен тілдескенде футболшылар жанкүйер­лерге тосын сый дайындап жатқа­нын айтқан еді. «Біз Шотландия құра­ма­сының Ұлттар лигасындағы бірнеше ойынын көрдік. Жинақы команда екенін, допты өз аймағынан шабуыл­шыларға жылдам жеткізетінін байқа­дым. Дегенмен, ертең біздің жігіттер жан­кү­йерлерге тосын сый дайындау­да».

Матч алдында Қазақстан құра­ма­сының ойыншылар тізімі шығысымен экс-бас бапкер Стоиловтың кезінде көбіне қосалқы құрамда отырған бір­неше футболшыны байқадық. Қақпаны қорғау «Ордабасы» қақпашысы Дмитрий Непогодовқа сеніп тапсырылса, орталық қорғаушы болып тағы бір Шымкент командасының ойыншысы Темірлан Ерланов шықты. Сонымен қатар сол қапталдағы қорғаушы ретінде «Қайрат» ойыншысы Ян Вороговский орналасты. Ал жартылай қорғаныста Нидерландының «Хераклес» клубында ойнайтын Александр Меркель мен «Астана» футболшысы Юрий Перцух та бірінші минуттан бастап негізгі құрамда шықты. Қалған футболшылар бұған дейін де негізгі құрамда шығып жүрген болатын. Шотландияға қарсы ойында Темірлан Ерланов ұлттық құрамадағы дебют матчын өткізсе, Александр Меркель араға төрт жыл салып ұлттық құрамаға қайта оралды. Бір қызығы, Шотландия құрамасын жеңуге біз есімін атаған футболшылардың септігі көп болды. 

Матчтың алғашқы 5 минутында екі құрама да бір-бірін алыстан байқасып жүрді. Ал ойынның 6-минутында отандастарымыздың алғашқы шабуы­лы бірден голға айналды. Александр Мер­кель­дің әуелете асырған добына бірінші Юрий Перцух жетіп, есепті ашты. Есепте алға шыққан қазақстандық ойыншылар 27 мың жанкүйерлер жиналған «Астана Аренада» өте сенімді қимылдай бас­тады. Кездесудің 10-минутында Исламбек Қуаттан пас алған Ян Вороговский құрамамыздың екінші голын соғып, жанкүйерлерді бір желпіндіріп тастады. Бұл голдан кейін футболшыларымыздың жеңіске деген ұмтылысы арта түсіп, қорғаныс пен шабуылда сәтті ойын көрсете бастады.

Кездеудің екінші таймы да алғашқы бөлімнің сценарийімен басталды. Екінші таймның 6-минутында, ал жалпы кездесудің 51-минутында Бақтиер Зайнутдинов Қазақстан құрамасының ойындағы үшінші голын соқты. Зайнутдиновқа нәтижелі пас асырған Ғафуржан Сүйімбаев екенін айта кетейік. Үшінші голдан кейін Шотландия құрамасы ойын тізгінін өз қолына алатын шығар деп ойлағанбыз. Бірақ біздің футболшылар өз позициясында өте сауатты ойнап, қарсыластардың адымын аштырмады. Нәтижесінде, кездесу 3:0 есебімен Қазақстан құрамасының жеңісімен аяқталды.

«І» тобында сынға түсіп жатқан Қазақстан-Шотландия құрамасының кездесуі аяқтала салысымен Кипр мен Сан-Марино арасындағы матч басталды. Бұл ойында Кипр футболшылары 5:0 есебімен жеңіске жетті. Ал біздің топтың үздіктері санал­ған Бельгия мен Ресей футболшылары Брюссельде кездесті. ФИФА рейтингінде көш бас­тап тұрған Бельгия аталған матчта 3:1 есебімен солтүстіктегі көршімізді жеңіп кетті. 

«Чемпионат» сайты Қазақстанның Шотландия құрамасын жеңгенін сен­са­цияға бағалап, біздің құрамаға таңғал­ғандарын жазады. Сондай-ақ Ресей құра­масының бас бапкері Ста­нислав Черчесов үшін Қазақстанға қар­сы ойын 2018 жылғы әлем чемпиона­тынан кейінгі ең маңызды кездесу бол­мақ дейді. Ал аты әлемге әйгілі Euro­sport басылымы қазақстандық футбол­­­шыларының Шотландия қақпа­сына соққан голдары адамға нағыз эсте­ти­калық ләззат сыйлады деген материал жариялады.

Әли БИТӨРЕ,

«Egemen Qazaqstan»

Баннер
Соңғы жаңалықтар

Ұқсас жаңалықтар