![Алпысбай Қазығұлов. Көңіл көктемі](/article_photo/1553832901_article_b.jpeg)
Автордың балалық шағынан қалыптасқан таным-түсінігі мен қоршаған орта туралы қиял көкжиегі көрініс тапқан «Менің балалық шағымның ауылы», «Белдесу», «Керуен», «Ойын» сынды туындылары көрме төрінен орын теуіпті. Құлпырған өң мен мазмұнға бай композициясы автордың өзіндік қолтаңбасын бірден даралайды. Жарасымды жолақтар көктен тік құйылған қалпы мұнартқан атырап көрген түстей бұлыңғырлана келе, кенет жарқ етіп барып, ішкі сырын қаз-қалпында алдыңа жайып салады.
Талант тасты да жарып шығады. Бейнелеу өнеріне мүлдем тосыннан келген А.Қазығұловтың өнерін үстем етіп, мерейін асырған табанды еңбегі мен төгілген тері. Оның Абай атындағы Қазақ педагогика институтының көркемсурет-графика факультетіне аяқасты оқуға түсіп әрі үздік аяқтауы таңғаларлық дүние.
– Жылына жүздеген картина жазамын, бірақ соның арасында көңілімнен шығатыны аз. Адамды алып шығатын да, танытатын да ізденіс пен еңбек, – дейді суретшінің өзі. Әйгілі жазушы Шыңғыс Айтматовты да осы бір шыншыл, тұңғиық +болмысымен баурап алса керек. «Қазақтың дарқан даласына, туған еліне, Жер-Анаға деген сүйіспеншілік сезілетін Алпысбайдың суреттері мені бірден баурап алды. Суретшінің қылқаламынан туған дүниелерде жалғандық жоқ», деген жазушы автордың мәңгілік тақырыптарға тайсалмай бойлайтынына таңданыс білдіреді.
Алпысбай Қазығұлов қырық жылдық шығармашылық ғұмырында 7 мыңнан астам туынды жазған дарынды суреткер. Шығармаларының бас кейіпкері – аспан мен жерді астастырған ұлан-ғайыр кеңістік. Туындылары Ә.Қастеев атындағы Мемлекеттік өнер музейінде, еліміздің бас резиденциясы Ақордада, өзге де көркемсурет музейлері мен шетелдердегі дербес коллекциялар қорынан орын алған. Сондай-ақ Чехияның бірінші президенті Масарик атындағы халықаралық сыйлықтың иегері (2003 ж., Прага).
Ая ӨМІРТАЙ,
«Egemen Qazaqstan»