Әріптестік әлеуеті арта береді

Мемлекет басшысы ресми сапары аясында Ресей Федерациясы Федералдық Жиналысы Федерация Кеңесінде болып, Кеңес төрайымы Валентина Матвиенкомен кездесті, сондай-ақ Құрметті қонақтар кітабына қолтаңба қалдырды.

Кездесу барысында Қасым-Жомарт Тоқаев Ресейге алғашқы шетелдік сапарының символдық мәні зор екенін айтып, бұл өзара құрмет пен сенімге негізделген екіжақты стратегиялық серіктестіктің жоғары дең­гейін айғақтайтынын атап өтті.

– Қазақстанның жаңа Президенті ретіндегі менің міндетім – елдеріміз арасындағы одақтастық қарым-қатынастың да­муына мол еңбек сіңірген Елбасы Нұрсұлтан Назарбаев стратегиясының са­бақ­тастығын қамтамасыз ету, – деді Мемле­кет басшысы.

Қасым-Жомарт Тоқаев Валентина Матвиенконың ТМД Парламентаралық Ассамблеясының төрағасы лауазымындағы қызметін жоғары бағалап, Федерация Кеңесінің спикеріне екіжақты парламенттік байланыстарды нығайту жөніндегі бірлескен жұмыстар мен халықаралық құрылымдар аясындағы жемісті ынтымақтастық үшін ризашылық білдірді.

Сонымен қатар Мемлекет басшысы екі елдің интеграциялық күн тәртібі аясында өзара іс-қимылдарды кеңейту мәселелеріне арнайы тоқталды.

– 29 мамырда Нұр-Сұлтан қаласында Еуразия экономикалық одағының мерей­тойлық саммиті өтеді. Қазақстан Респуб­ли­касының Президенті ретінде еура­зиялық интеграцияның дамуына барынша жағдай жасаймын. Біздің мемлекеттеріміздің парламенттері осы үдерістерге зор үлес қоса алады деп ойлаймын, – деді Қазақстан Президенті.

Валентина Матвиенко пар­ла­мент­ара­лық қарым-қатынасты нығайтудың маңыз­ды­лығын айтып, осы сапар Қа­зақстан мен Ресейдің стратегиялық се­ріктестігіне тың серпін беретініне сенім білдірді.

 – Кестеңіздің тығыздығына қара­мас­тан, Федерация Кеңесіне келуге уақыт тап­қаныңыз үшін ризашылығымды біл­діремін. Екіжақты парламенттік өзара іс-қимылдарды және ТМД Парла­мент­аралық Ассамблея аясындағы ынты­мақтастықты дамытуға қосқан жеке үле­сіңіз үшін Сізге алғыс айтқым келеді, – деді Валентина Матвиенко.

Соңында Валентина Матвиенко Қа­сым-Жомарт Тоқаевқа биылғы сәуір айында Парламентаралық Ассамблеяның кезекті отырысы жоспарланғанын және осы жиынға Қазақстан Республикасы Парламенті Сенатының Төрағасы Дариға Назарбаеваның шақырылғаны туралы айтты.

Кездесу соңында тараптар екіжақты ынтымақтастықтың ауқымды мәселелері жөнінде пікір алмасты.

Қазақстан Республикасының Пре­зи­денті Қасым-Жомарт Тоқаев Ре­сей Федерациясы Федералдық Жина­лысы Федерация Кеңесінің төрайымы Валентина Матвиенкомен кездеспес бұ­рын Белгісіз жауынгер бейітіне гүл шоғын қою рәсіміне қатысты.

Қазақстан Президенті Белгісіз жауынгер бейітінің жанындағы Мәңгілік алауға гүл шоғын қойып, Ұлы Отан соғысында қаза тапқан батырлардың рухына тағзым етті. Рәсім соңында Мемлекет басшысы Құрмет қарауылының сап түзеп өткен салтанатты маршын көрді.

Александр бағындағы Мәскеу Кремлінің қабырғасын бойлай орна­лас­қан «Белгісіз жауынгер бейіті» Мемо­риалдық сәулет кешені Мәскеу үшін соғысқан жауынгерлердің құрметіне 1967 жылы салынды. Кешенге Ресей мәдени мұрасының нысаны, сондай-ақ Жалпыұлттық әскери даңқ мемориалы мәртебесі берілген.

Ресейге сапары қарсаңында Қазақстан Президенті Қасым-Жомарт Тоқаев «Рос­сийская газета» басылымына сұхбат берген болатын. Онда Мемлекет басшысы екі ел арасын­дағы қарым-қатынас бүгінгі жаһан­дық қалтарыстар кезеңіндегі мемле­кет­аралық байланыстардың эталонына айналғанын айтқан еді. Қазақ­стан мен Ресей арасындағы одақтастық пен стратегиялық әріптестікті нығайту тақы­рыбы кездесудегі негізгі басымдық бере­тін бағыт екенін де жеткізді. Сонымен қатар сұхбатында Қазақстанның Ұжым­дық қауіпсіздік туралы шарт ұйымының сенімді одақтасы екенін, мемлекеттер арасын­дағы өзара іс-қимылды тереңдету үшін, оның ішінде сауда-экономикалық, инвес­тициялық, ғылыми-техникалық, мәдени-гуманитарлық ынтымақтастық мәселелері бойынша үлкен әлеует барына да назар аударған болатын. Бұл ретте Қазақстан Президенті ежелгі достықтың туы желбіреп, Ресей бұрынғыша Қа­зақ­станның жетекші сауда серіктесі болып қала беретінін, бұл негізде екі ел ара­сындағы тауар айналымының жыл сайын артып келетінін, былтыр бұл көрсеткіш 17,6 миллиард долларды құрағанын айтады. Еліміздегі әрбір шетелдік үшінші кәсіпорын – ресейлік болса, олардың жалпы саны 9 мыңнан асатынын да мысалға келтірді.

Қазақстан Президенті қазіргі уа­қыт­та әлемде орын алып жатқан шынайы көріністерді былай сипаттайды. Жа­һандық және өңірлік қауіпсіздік, шие­леніскен геосаяси қақтығыстар мен санкциялар легі, көші-қон мәсе­лесі, халықаралық қатынастардағы дағ­дарыстық құбылыстар, оқшаулану және протекционизм үрдістерінің артуы, әлемдік экономикалық өсімнің бәсеңдеуі, қаржы және валюта нарық­тарындағы тұрақсыздық, әлемдік сау­дадағы ахуалдың құбылмалылығы – дамушы, дамыған елдерге салқынын тигіз­бей қоймайды. Қасым-Жомарт Тоқаев жаһандық аумалы-төкпелі кезең­ге қарамастан Қазақстан Еуразиялық кеңіс­тікте және кең ауқымда интеграциялық процестерді дәйекті түрде қолдайтынын тілге тиек етті. Қазақстан Батыс пен Ресей қарым-қатынасының жақсаратынынан үмітті. Сонымен қатар Еуразиялық эко­но­микалық одаққа мүше барлық мемле­кеттер үшін де шиеленістің тарқауы тиім­ді болмақ. Өйткені алдымен Үлкен Еу­разияның экономикалық әлеуеті ар­тады. Азия мен Еуропаның сауда-сат­тық байланысын жандандыруға негіз болатын Үлкен Еуразияның ке­ле­шегіне сенім бар. Президент өз сөзін­де Шанхай ын­тымақтастық ұйымы ғалам­шар хал­қы­ның 45 пайызын, Еуразия аума­ғының 60 пайызын, әлемдік эконо­миканың үштен бірін біріктіріп отырға­нын мысалға алған.

Сондай-ақ Еуразиядағы бейбітшілікті, тұрақтылықты, қауіпсіздікті қамтамасыз етудің маңызды факторы құрлықтағы мемлекеттердің бірлескен іс-әрекеттері негізінде жүзеге асатынын айтады. «Біздің елдеріміз көпжақты халықаралық және өңіраралық алаңдарда тығыз өзара іс-қимыл жасайды және өз күш-жігерін үйлестіреді. Қазақстан Президенті ЕАЭО құрылымдары бүгінде Еуразиялық кеңістіктегі интеграциялық процестердің қозғаушы күші екенін жеткізеді.