Сот отырысы. Екінші апта
Сейсенбі, 3 сәуір 2012 7:37
Кеше Ақтауда өткен жылдың 16-17 желтоқсан күндері Жаңаөзен қаласында орын алған оқиғаларға байланысты басталған сот отырысының екінші аптадағы мәжілісі одан әрі жалғасты.
Бұл күні де сот отырысы дәл белгіленген уақытында басталды. Сот залына процеске қатысушылармен қатар сотталушылардың туыстары, дос-жолдастары, халықаралық, республикалық бақылаушылар орналасса, арнайы жабдықталған қосалқы залда сот отырысын көруге ынта білдіргендер, сондай-ақ баспасөз өкілдері де толық болды.
Сейсенбі, 3 сәуір 2012 7:37
Кеше Ақтауда өткен жылдың 16-17 желтоқсан күндері Жаңаөзен қаласында орын алған оқиғаларға байланысты басталған сот отырысының екінші аптадағы мәжілісі одан әрі жалғасты.
Бұл күні де сот отырысы дәл белгіленген уақытында басталды. Сот залына процеске қатысушылармен қатар сотталушылардың туыстары, дос-жолдастары, халықаралық, республикалық бақылаушылар орналасса, арнайы жабдықталған қосалқы залда сот отырысын көруге ынта білдіргендер, сондай-ақ баспасөз өкілдері де толық болды.
Отырыс басында төраға А.Нағашыбаев 37 сотталушының ішінде 10 адамның денсаулығында түрлі деңгейде кінәрат барлығына байланысты соттың ұсынысы бойынша облыстық денсаулық сақтау басқармасы жанынан арнайы дәрігерлік комиссия құрылып, оның құрамына аймаққа белгілі, білікті мамандар тартылғандығынан хабардар етті. Содан соң қорғаушылар тарапынан түскен сот отырысының хаттамасымен күнделікті танысып отыруға рұқсат беру жөніндегі өтініш қанағаттандырылды.
Одан әрі сот отырысы жәбірленушілерді тыңдаумен жалғасты. Отыздан астам жәбірленуші сөз алды. Олардың көбі жеке кәсіпкерлер, автокөлік пен шағын дүкендердің, халыққа қызмет көрсету орындарының иелері болды. Осы жерде ризашылықпен атап айта кетерлігі, олардың көбі өздеріне келген шығындардың мөлшеріне қарамай қылмыстық іске байланысты берген талап-арыздарын қайтып алатындықтарын және де өздерінің енді осындай сәттердің куәсі болмайық деген риясыз көңілден шыққан сөздерін жеткізулері еді. Бұлардың арасында өздері де бұл күндері жұмыссыз кәсіпкер Г.Баймағанбетов, Р.Қабиева, Д.Абаджанова, Ш.Бекбосынова және басқалары бар. Ал ауруханада ота жасалып келе алмаған абзал ана Ә.Сәрсенованың қызы Ә.Жайшылықова сот отырысына сенімхат әкелді. Үлкен киім-кешек дүкенінің иесі қанша дүние-мүлігі өртеніп, қолды болса да «Бала-шағамыз, халқымыз аман болсын, дүние-мүлік үшін берілген талап-арызды қайтып аламыз», – деп елдіктің үлгісін көрсетіпті. Жалпы абзал аналардың, қыз-келіншектердің осы күнгі адамгершілікке толы ақ пейілдері туралы сот отырысын бақылап отырған бір топ ақсақал ағалар мұны жоғары бағалап, бұл елдіктің белгісі, түбі қайыр болатын шығар деген ризашылық сезімдерін білдірді. Біз де сондай үкілі үмітпен тарқастық. Әрине, шын айыптылардың заңға сәйкес жазасын алуы да әділдік болмақ. Өйткені, заң баршаға бірдей.
Жоламан БОШАЛАҚ,
Ақтау.