Руханият • 08 Сәуір, 2019

Жыр қарлығашы – Фариза

Биыл Қазақстанның халық ақыны, Мемлекеттік сыйлықтың лауреаты Фариза Оңғарсынованың 80 жылдық мерейтойы. Осыған орай еліміздің түкпір-түкпірінде ақынды еске алуға арналған тағылымды шаралар үздіксіз ұйымдастырылып келеді.

Назерке ЖҰМАБАЙ

Өлеңін өміріне балап, ғұмыр бойы аялап өткен поэзия патшайымының рухына тағзым етуге бағытталған сондай жарқын кеш өткен аптада елорда төріндегі жетекші оқу орны – Назарбаев Университеттің «Рухани жаңғыру» мәдени орталығында өтті. «Жыр – менің планетам» деп аталатын театрландырылған әдеби-сазды концерттік бағдарламада Назарбаев Университет студенттері өнер көрсетті. Ақын өмірінің түрлі кезеңдеріндегі айтулы естеліктері мен ер-азаматқа бергісіз адамдық мінезі жан-жақты бейнеленген сахналандырылған көріністер, сондай-ақ қазақтың біртуар аймаңдай ұлдары Асанбай Асқаров, Мұқағали Мақатаев, Әбіш Кекілбаев, Асқар Сүлейменов сынды замандастары арасындағы рухани қарым-қатынас, шығармашылық ізденіс іздері шынайы суреттелген айтулы кеш жиналған көпшілік көрерменнің көңілін бірден баурап алды.

Жалпы, Назарбаев Университет – әлемдік стандартқа сай жаратылыстану мен медицина бағытында білім алатын студенттерді тек салалық дамытумен шектемей, жастарды рухани кемелдендіру, ұлтымыздың тарихы мен дәстүрін тел еміп өскен патриот азамат етіп тәрбиелеуде өлшеусіз үлес қосып келе жатқан жетекші оқу орны. Оның айқын айғағы – бүгінгі біз куә болған «Жыр – менің планетам» атты әдеби-сазды кеш. «Рухани жаңғыру» орталығының жетекшісі Гүлтас Құрманбайдың жетекшілігімен ұйымдастырылған тағылымды шарада студенттердің шығармашылық қарымы мен мүмкіндігі көрерменін тәнті етті.

Сондай-ақ танымдық шараның тағы бір елеулі сәті – кеш аясында «Жыр қарлығашы – Фариза» атты байқау жеңімпаздарының есімі жария етіліп, жүлдегерлерге арнайы дипломдар мен бағалы сыйлықтар табыс етілді. Атап айтар болсақ, негізгі үш бағыт бойынша ұйымдастырылған әдеби конкурста «Ф.Оңғарсынованың өлеңдерін мәнерлеп оқу» аталымы бойынша университет студенттері: Аяжан Сейданова, Саян Катренов, Назерке Лес, Қуандық Мақсұтов бастаған жастар марапатталса, «Ф.Оңғарсынованың өлеңдерін ағылшын тіліне аудару» аталымында Дарина Жүнісова, Айтбек Қасымжомарт және Әсет Жұматай жеңімпаз атанды. Ал «Ф.Оңғарсынованың өлеңдерін орыс тіліне аудару» аталымындағы сыйлықты Мирас Қабибулла мен Мәдина Тлеуғабыл теңдей бөлісті. Кеш соңында Мырзагелді Кемел, Оңайгүл Тұржан, Ирак Елекеев, Алтынай Нөгербек бастаған құрметті қонақтар жастарға батасын беріп, ақ жол тіледі. Поэзия падишасының отты жыры оқылып, әсем ән мен рухты күйден шашу шашылған концерт осылайша өз мәресіне жетті.

Күннің маңызды және өзекті жаңалықтарын «Егемен Қазақстан» телеграм каналынан оқыңыз