![Халықаралық бизнес-форумға қатысуға шақырды](/media/2019/04/09/tuymebaev.jpg)
Кездесуде тараптар өзара сенімді нығайту, бірлік пен келісімді сақтау саласындағы екіжақты қатынастардың мәселелерін талқылады. ҚХА Төрағасының орынбасары өзара қарым-қатынас жоғарғы деңгейде екенін және ҚХА өз тарапынан осы ынтымақтастықтың дамуына барынша ықпал ететінін атап өтті.
Ж.Түймебаев қазіргі уақытта Қазақстанда татар этносының 200 мыңнан астам өкілі өмір сүріп жатқанын хабарлады. Сондай-ақ Ассамблея Төрағасының орынбасары барлық татар-башқұрт этномәдени бірлестіктері «Қазақстандық татар және башқұрт конгресі» бірыңғай республикалық қоғамдық бірлестігінің құрамына енетінін айтты. Қауымдастық татар мәдениетін сақтау мәселелері бойынша ғылыми-тәжірибелік конференциялар өткізеді, кітап басып шығарады, сонымен бірге жыл сайын «Ертіс әуендері» музыкалық фестивалі мен түрлі іс-шаралар ұйымдастырады.
«Өткен жылы Қазақстанның Тұңғыш Президенті Нұрсұлтан Назарбаев Татарстан Республикасына барды. Биыл мамыр айында Татарстан Республикасының Президенті Рустам Миннихановтың Қазақстанға сапары күтілуде. Алматы облысында Сабантой мерекесін өткізуді жоспарлап отырмыз», – деді Ж.Түймебаев.
Денис Валеев қазақ және татар тілдерінің ұқсастығын атап өтті. «Қазақстандағы отандастармен соңғы кездесу кезінде этнос арасында татар тілін сақтау туралы кезекті сұраққа орай біздің Президентіміз Рустам Минниханов: «Қазақ тілін үйреніп, татар тілін жақсы білетін болыңдар» деді. Біздің тіліміз соншалықты ұқсас», – деді спикер.
Татар этносының қоғамдық ұйымдарына қатысты өкілетті өкіл бүкіл республика бойынша татар ұлттық мерекелерін өткізуге қолдау көрсетілетінін және этнос өкілдері Қазақстанда өз үйлерінде тұрып жатқандай сезінетінін атап өтті.
Сонымен бірге Денис Валеев айтып өткендей, жаңа индустриялық жобалар, соның ішінде аутсорсингтік технологиялар, мұнай химиясы және басқа да салалар әзірленуде.
Жансейіт Түймебаев ҚХА сауда саласын дамытуды жоспарлап отырғанын хабарлады. «Біздің институттың құрамында Қазақстан халқы Ассамблеясының Кәсіпкерлер қауымдастығы жұмыс істейді. Қазан айында біз Ассамблеяның Халықаралық бизнес-форумын және тарихи шығу тегі бір елдермен жүзеге асырылатын түрлі этнос кәсіпкерлерінің бірлескен жобаларының көрмесін өткізуді жоспарлап отырмыз. Бізді сіздердегі бизнес-жобалар қызықтырады, осыған байланысты Татарстан бизнесмендерін аталған іс-шараға белсенді қатысуға шақырғаныңыз жөн болар еді», – деді ол.
Кездесу соңында Жансейіт Түймебаев Татарстан Республикасының өкілетті өкіліне «Қазақстан халқы Ассамблеясы ел тарихында» кітабын табыс етті.