Бұл шешім бүгінгі таңда маңызды әрі қажетті екені анық. Біз өзгерісі қым-қуыт әрі тым жылдам әлемде өмір сүріп жатырмыз. Бұл ретте кез келген мемлекеттің саяси жүйесінің эволюциясы – заңды процесс. Транзиттік кезең тұрақтылық пен қоғамдық келісім кезеңіне жалғасады деп үміттенемін. Сәйкесінше, саяси партиялардың жақын арада өз кандидаттарын айқындайтынына сенімдіміз.
Ең бастысы, Президент өзі мәлімдегендей, бұл маңызды қадамға бірден келе салған жоқ. Президент Қасым-Жомарт Тоқаев Тұңғыш Президент – Елбасы Нұрсұлтан Назарбаевпен кеңесе отырып, Парламент палаталарының басшыларымен, Конституциялық кеңеспен, саяси партиялардың жетекшілерімен ақылдаса келе, бір шешімге келді. Халықтың күпті көңілін күткен уақытында дөп басып отыр. Саяси тұрақтылық пен айқын бағыт Президент өкілеттілігі толық болғанда ғана өз нәтижесін береді.
Сондай-ақ бұл тарихи маңызды кезеңде халықтың белсенділігін жақсы жағынан көріп отырмыз деуге болады. Оның үстіне, билікті тапсыруда транзиттік рөлді атқарған Қасым-Жомарт Тоқаев халыққа етене жақын екенін көрсетті.
Алда интеграция ғасыры. Қазақстан тәрізді даму жолына түскен елдің тізгіні халықаралық деңгейде де, ел алдында да, ұлт алдында да абыройы бар тұлғада болғаны дұрыс.
Біздің басты байлығымыз – тәуелсіздік пен бейбітшілік. Ішкі тұрақтылық толық орнамаған жерде ештеңе де еселенбейді. Еліміздің Ата Заңына, яғни Конституциясына сәйкес Қазақстан Республикасы Президентінің кезектен тыс сайлауын 2019 жылдың 9 маусымында өткізу туралы шешімді мен осы құбылыстарды баянды ету мақсатында жасалған шешім деп білемін.
Демократия әрқашан даму процесінде болуы қажет. Сондықтан да тарихи сәт әділеттіліктің салтанат құруы сайлаудың салмағын арттыратыны сөзсіз. Сайлаудағы басым шешімдердің көбі – халықтікі. Бірінші – біз белсенді түрде атсалысуымыз қажет. Әр азамат сайлауда дауыс беру арқылы мемлекеттік билікті қалыптастырады. Сондай-ақ өзінің және өзінен кейінгі өскелең ұрпағынының мүддесіне сәйкес шешім қабылдайтынын естен шығармағаны жөн.
Өтпелі кезеңнің өкпегі қатты болады. Біз сол қысқа мерзімде ұпайымыз түгел, ұлтымыз тұтас, ұрпағымыз аман болғанын қалаймыз.
Дулат ИСАБЕКОВ,
жазушы, Мемлекеттік сыйлықтың лауреаты
