Бәрін көзімізбен көрдік, бізде аты бар, заты жоқ қирандыға айналған ҚазКСР дейтін республиканы ол кезде ешкім білмеді, ешкім танымады. Не жұрттың алатын айлығы жоқ, жалақысы қат, жалаң аяқ, жалаң бас қалған кезеңде осы елді мемлекет етемін, деп тәуекелге бел буған адам ол – Нұрсұлтан Назарбаев. Құдайға шүкір, Қазақстанды іргелі ел етіп, мемлекет қатарына қосты. Экономикасын қалыптастырып, ұлтымыздың жақсы атын әлемге мәшһүр ете білді. Бір сөзбен айтқанда, қазақтың есіктегі басын төрге оздырды.
Сөйтіп тәуелсіз мемлекет орнатқан күннен бастап, Нұрсұлтан Әбішұлы елдің туының тұғырлы болуына, ынтымағының ыдырамауына ықпал етуге бар күшін салды. Егемен елде бірлік пен ынтымақ болмаса, біз бүгінгідей мемлекет құра алмайтын едік. Бұл үлкен сарабдал саясатты қажет етеді. Тәубе, қазір Қазақстан іргелі мемлекет болды, әлем санасатын жағдайға жеттік. Әр елден елордамызға келіп ақыл-кеңес сұрайтын, дәрежеге көтерілдік. Осындай бір жақсы кең жолға түскенімізді сеземіз. Қазақстанның бұл дамуындағы Елбасының рөлі орасан зор.
Осы ретте ерекше айта кететін тағы бір таңғаларлық нәрсе ол – Елбасының ат ауыстырғаны болды. Билік алмасты, өз еркімен Конституциямызға сәйкес билікті Сенат Төрағасына берді. Және ол дана шешім өте дұрыс бағыт алды.
Біз Қасым-Жомарт Тоқаевты көптен білеміз. Елбасының біраз уақыттан бері жанында келе жатқан, ішкі, сыртқы саясатты орнықтыруға үлкен еңбек еткен, кейінгі уақытта Сенаттың Төрағасы ретінде де Қазақстанның маңызды қадамдарына ыңғайлы ықпал етіп, еңбегі сіңіп келе жатқан азамат.
Бұл қазақтың көшелі, өресі биік парасат пайымы терең тұлғасы. Бірнеше шет тілді білуімен қатар, адамгершілігі, кісілігі жоғары жан. Мен ол кісінің барлық шешімін жан-тәніммен қолдаймын.
Тектінің ұрпағы, әкесі жақсы жазушы, үлкен азамат болды. Ал, енді бүгінде сол тектіден қалған тұяқ өресі биік өнегелі жан екенін көрсетіп отыр.
Президентті халық сайламайынша, оның өкілеттігі де толық жүре қояды деп ойламаймын. Сондықтан, енді не де болса тәуекелге бел буып, уақыты келген тұста Президент Қ.Тоқаев сайлауды мерзімінен бұрын тағайындады. Және бүкіл әлемге аталған сайлаудың ашық, заңға сәйкес дұрыс өтетініне кепілдік беретінін жеткізді.
Бұл сайлау біздің ішкі экономикамызға да, сыртқы саясатымызға да ықпал етеді. Сайлау нәтижесінде лайықты азамат ел тізгінін алады деп сенемін.
Құдай қаласа, еліміздің Президентін сайлап алсақ, бұдан да биік белестерді бағындыратынымыз сөзсіз.
Мырзатай ЖОЛДАСБЕКОВ,
мемлекет және қоғам қайраткері
