2019 жылдың 9 маусымында өткізілуі жоспарланған сайлау – егемен еліміз үшін саяси-экономикалық һәм рухани даму мен өркениетті елдердің көш басына шығу жолында жасалып жатқан тарихи мәні бар маңызды шешімдердің бірі. Президент сайлауын өткізу уақытының белгіленуі ұлтымыз үшін үлкен саяси қадам екені даусыз. Бұл сайлау арқылы елімізде дамудың жаңа сатысы басталмақ. Сондықтан да айтулы тарихи да маңызды оқиғаға Қазақстанның әрбір азаматы үлкен жауапкершілікпен қарайды деп ойлаймын. Осы тұрғыдан келгенде, П.И.Чайковский атындағы Алматы музыкалық колледжінің ұжымы Президент Қасым-Жомарт Тоқаевтың Үндеуін кеңінен талқылай отырып, алдағы сайлаудың әділ де ашық өтетіндігіне зор сенім білдіреді.
Тұңғыш Президент – Елбасы Нұрсұлтан Әбішұлының қажырлы еңбегінің арқасында тәуелсіз мемлекетіміз апыл-тапыл басқан қадамын нықтап, елдіктің биік тұғырына көтерілді. Әлем Қазақстанды бейбітшілік сүйгіш, қонақжай, достық пейілді зайырлы мемлекет ретінде таныды. Ендігі сайлау Елбасымыздың осы уақыт аралығында қалыптастырып, қазығын қағып кеткен Мәңгілік ел идеясын сәтімен жалғап, саяси-экономикалық, рухани-мәдени тұрғыдан жаңа сатыға көтеретіндігіне сенеміз. Бұл – біздің жолымыз! Біздің таңдауымыз!
Біржан ХАСАНҒАЛИ,
П.И.Чайковский атындағы Алматы музыкалық колледжінің директоры
