Есімі ел есінде
Сәрсенбі, 9 мамыр 2012 7:14
Есов Уәлиахмет Шакенұлы 1922 жылдың 26 желтоқсанында Қостанай жерінде өмірге келді. Ел басына төнген үлкен ауыртпалық сын сағаты – Ұлы Отан соғысы басталғанда Уәлиахмет жүрек қалауымен туған елін қорғауға тілек білдіреді.
1942-1945 жылдары Ұлы Отан соғысының қанды шайқастарына қатысып, елі мен жері үшін жан аямай күрескен. Уәлиахмет Шәкенұлы соғыстың ең ауыр шайқастары – Курск иінінде, сонымен қатар Украина, Чехословакияны азат етуге өзінің ерлігімен атсалысты. Оның Отан алдындағы қаһармандық ерлігі 19 орден мен медальдармен, оның ішінде «Отан соғысы», «Қызыл Жұлдыз», екі «Даңқ», т.б. ордендермен марапатталды.
Сәрсенбі, 9 мамыр 2012 7:14
Есов Уәлиахмет Шакенұлы 1922 жылдың 26 желтоқсанында Қостанай жерінде өмірге келді. Ел басына төнген үлкен ауыртпалық сын сағаты – Ұлы Отан соғысы басталғанда Уәлиахмет жүрек қалауымен туған елін қорғауға тілек білдіреді.
1942-1945 жылдары Ұлы Отан соғысының қанды шайқастарына қатысып, елі мен жері үшін жан аямай күрескен. Уәлиахмет Шәкенұлы соғыстың ең ауыр шайқастары – Курск иінінде, сонымен қатар Украина, Чехословакияны азат етуге өзінің ерлігімен атсалысты. Оның Отан алдындағы қаһармандық ерлігі 19 орден мен медальдармен, оның ішінде «Отан соғысы», «Қызыл Жұлдыз», екі «Даңқ», т.б. ордендермен марапатталды.
Аман-есен елге оралып, жасы ұлғайған кезінде көптеген қатарластары сияқты С.М.Киров атындағы Қазақ мемлекеттік университетінің (қазіргі әл-Фараби) тарих факультетіне түсіп, 1953 жылы үздік бітіріп шығады. Жоғары оқуға түспестен бұрын ол университеттің босатылған студенттік кәсіподақ комитетінің төрағасы қызметіне сайланған болатын. Уәлиахмет экономист болуды жүрегі қалайды.
Мәскеудегі М.В.Ломоносов атындағы университеттің аспирантурасын тәмамдап, экономика ғылымдарының кандидаттық ғылыми дәрежесінен диссертация қорғайды. Ол көптеген ғылыми еңбектердің авторы, ғылыми-зерттеу еңбектердің өнегелі ұйымдастырушысы, мемлекеттік ғылыми мекемелердің жауапты қызметінде болды. Қазақ КСР-інің Мемлекеттік жоспарлау комитетінде 20 жылдай қызмет атқарды.
Республикада Уәлиахмет Шакенұлының еліне сіңірген өмір жолы ерекше құрметпен аталып өтті. Ол көптеген грамоталардың, Қазақ КСР-інің Жоғары және арнаулы білім министрлігінің, Кәсіподақ және КЛЖО-ның Құрметті грамоталары, КСРО, БХШК-нің дипломы мен медальдардың иегері.
Уәлиахмет Есов қай жерде, қандай жұмыс істесе де, әрдайым өз міндетіне ұқыптылығымен, жолдастарымен қарым-қатынаста сыпайы сыйластығымен, ақкөңіл адал пиғылымен, жоғары адамгершілік қасиеттерімен ерекшеленіп, зор құрметке бөленетін, абырой-беделге ие болатын. Ұзақ жылдар бойы жинақтаған мол тәжірибесін, өзінің асқан білімдарлығын, ізгі ақыл-парасатын қызмет мүддесіне қалтқысыз пайдалану арқасында әріптестер арасында үлгі-өнеге болатын.
Ұлы Отан соғысының ардагері Есов Уәлиахмет Шакенұлының ұлағатты ісі, өнегелі өмірі егеменді еліміздің дәулетін асыруға үлес қосып жүрген бүгінгі жастарға, келешек ұрпаққа үлгі болатынына күмәніміз жоқ.
Жұбайы Түтенова Дана Байкерімқызы инженер-технолог, 40 жылдан астам агрокомплекс саласында еңбек етті. Еңбек ардагері.
Ғалым ҚҰРАШ, журналист.
