Сегізінші жолдама
Сейсенбі, 10 сәуір 2012 7:09
Астанада Азия аймағы бойынша Олимпиадаға жолдама беретін халықаралық турнир жалғасуда.
Біздің құрамада турнирдің төртінші күні 64 кило салмақтағы Данияр Елеусінов Олимпиада лицензиясына ие болды. Былтыр Бакуде өткен әлем чемпионатында бірінші кездесуін ұтып, екіншісінде жеңіліс тапқан Данияр сол жолы кеткен есесін өз елінде, өз жерінде қайтарды. Негізі, Елеусіновтің сол кездің өзінде жолдаманы алатындай жөні бар еді. Алайда, боксшының Бакуге келмей жатып сырқаттануы, дене қызуының көтеріліп, 38 градусқа дейін баруы оған жарысты жалғастыруға еш мүмкіндік бермеді. Енді, міне, Данияр Бакуден кейін қыс бойы жаттыққан соң турнирдегі соңғы мүмкіндігін жібермеді.
Сейсенбі, 10 сәуір 2012 7:09
Астанада Азия аймағы бойынша Олимпиадаға жолдама беретін халықаралық турнир жалғасуда.
Біздің құрамада турнирдің төртінші күні 64 кило салмақтағы Данияр Елеусінов Олимпиада лицензиясына ие болды. Былтыр Бакуде өткен әлем чемпионатында бірінші кездесуін ұтып, екіншісінде жеңіліс тапқан Данияр сол жолы кеткен есесін өз елінде, өз жерінде қайтарды. Негізі, Елеусіновтің сол кездің өзінде жолдаманы алатындай жөні бар еді. Алайда, боксшының Бакуге келмей жатып сырқаттануы, дене қызуының көтеріліп, 38 градусқа дейін баруы оған жарысты жалғастыруға еш мүмкіндік бермеді. Енді, міне, Данияр Бакуден кейін қыс бойы жаттыққан соң турнирдегі соңғы мүмкіндігін жібермеді.
Осы турнирде Елеусінов екінші айқасында лицензияға ие болды. Алғашқы кездесуінде ол иорданиялық Ибраһим Салехты 27:4 есебімен жеңсе, екіншісінде оңтүстіккореялық Сонг Ким Чомен қолғап түйістіріп, оны да айқын басымдықпен ұтты. Есеп – 16:7. Десе де бұл ширек финалдық айқас біздің боксшыға оңай болған жоқ. Корей боксшысымен Данияр бұған дейін еш жерде кездеспеген екен. Сондықтан болар, оған алғашқы екі раундта қарсыласын әбден зерттеп, қыр-сырын сүзгіден өткізуге тура келген. «Қарсыласым мықты боксшы болды. Күші мен тактикасы мықты екен. Егер екеуміз ширек финалда кездеспегенде, ол да лицензия алатын еді», – дейді Д.Елеусінов.
Енді Елеусінов жартылай финалда бұған дейін Қостанайда өткен жастар арасындағы турнирде кездескен өзбек боксшысымен қолғап түйістіреді. Өзбек боксшысы да осалдардың қатарынан емес. Біраз халықаралық жарыстар мен турнирлерге қатысып, тәжірибе жинақтаған боксшы. Сондықтан Елеусіновке турнирге жай жолдама алу үшін ғана емес, жеңімпаз атану үшін келгенін әлі дәлелдеу керек. Ал дәлелдейтін жер дәл осы жер.
Жалпы, оның салмағында Лондон Олимпиадасына жолдама алған тағы бірнеше мықты боксшы бар. Соның ішінде Елеусіновпен бірге Олимпиадаға Мехди Толоутибанди (Иран), Сердар Худойбердиев (Түркіменстан), Ухтамжон Рахмонов (Өзбекстан) лицензияны жеңіп алды. Олар қарсыластарының бәрін бет қаратпай ұтты.
Осы күні 75 кило салмақтағы үнді Вижендер, тәжік Содиржон Назаров, түркімен Нурсаат Паззиев пен өзбек Аббос Атоев біздің Данабек Сужанов сияқты Лондон жолдамасын иеленді.
Демалыс күндері болған тағы бір айқастарда Ілияс Сүлейменов пен Василий Левит шаршы алаңға шықты. Екеуі де жекпе-жектерінде басымдық танытты. Әйтсе де Левитке қарағанда Сүлейменовке қарсыласының оңай шағылатын жаңғақ болмағанын айта кеткен жөн. Сүлейменов қырғыз боксшысы Азат Үсенәлиевті әрең ұтты. Бұл екеуі осыған дейін бір рет кездескен болатын. Былтыр Оңтүстік Кореяда өткен Азия чемпионатында Қырғызстан өкілі біздің боксшыдан айласын асырып кеткен-тін. «Сол кезде кеткен есені қайтарғаныма қуаныштымын. Жекпе-жекте мен реваншты ғана ойладым. Ал жалпы, Азат – жақсы боксшы. Оның да лицензия алатын жөні бар еді», – дейді Сүлейменов. Левит болса, тәжік Дилаваршо Абдурахмановпен кездесіп, оны таза ұтты. Бұл салмақта жалқы лицензия турнирдің жеңімпазына ғана берілетіні белгілі. Сондықтан оған алдағы кездесуде аянбау керек.
Кеше түс ауа 49 кило салмақтағы Біржан Жақып олимпиялық іріктеу сынының жартылай финалына шықты. Ол пәкстандық Мохаммед Нисардан басым түсті. Есеп – 25:5.
Біржан енді жартылай финалда өзбек Шохободдин Зойровпен қолғап түйістіреді.
Кешкісін Ілияс Сүлейменов те шаршы алаңға көтерілді. Ол қытайлық Жанг Янгпен кездесті. Бұл кездесуде Ілияс қарсыласын 19:12 есебімен жеңіп, жолдамаға ие болады.
Дастан КЕНЖАЛИН.